Tufa Atu i Isi Le Ala e Maua ai le Fiafia i le Aiga
1 O le aiga o le faavae lea o le olaga masani o tagata, ma o aiga o loo faia aʻe ai nuu, o aai tetele, o setete, ma atunuu uma. I aso nei, ua fesagai ai aiga ma omiga sa lei iai muamua. Ua malolosi taaʻiga ua faamatauina ai le olaga o le aiga. Maeu lo latou loto faafetai, ona ua saunia mai e Ieova, o Lē na Fuafuaina le faatulagaga o aiga, ni faatonuga mo i tatou ina ia mafai ai ona tatou ausia le fiafiaga i le aiga! O i latou o loo mulimuli i ana taiala ua latou iloa ua faaitiitia faafitauli ma ua iu ai i ni aiga e taulau manuia. Ia Setema, ua tatou maua ai se faaeaga o le tufaina atu lea i isi o le tusi, Le Ala e Maua ai le Fiafia i le Aiga. Ia tausolomua i tatou ona talanoa atu i tagata e uiga i le mataupu o le olaga faaleaiga. Ia faaleuo, ia iai uiga mautinoa, ma ia faautauta. O le ā se tala e mafai ona e fai atu ai?
2 E mafai ona e amata e ala i le lagā o se fesili e pei o lenei:
◼ “Po o e mātauina le toatele o aiga ua latou iloa le faigata ona onosaia omiga o le olaga? [Faatali mo se tali.] Ua faaalia i lipoti e faapea, e toatele tagata ua oo i ai tulaga faigata i o latou aiga. O le ā se mea e te talitonu e mafai ona fesoasoani i aiga e maua ai se tulaga e sili atu ona mautū ma fiafia? [Faatali mo se tali.] Talu ai o le Atua na faavaeina le faatulagaga o aiga, po ua lē talafeagai ea la ona iloiloina taiala ua ia tuuina mai? [Faitau 2 Timoteo 3:16, 17.] O na faatonuga aogā o loo otooto mai i le tusi lenei, Le Ala e Maua ai le Fiafia i le Aiga.” Ona fesili atu lea i le tagata i sona manatu po o le ā le faafitauli o loo taatele i aiga, faaali atu i ai le mataupu o loo talanoaina ai lena faafitauli, ma ofo loa le tusi.
3 I le toe asiga, atonu e te taumafai ia ausia le sini o le amataina o se suesuega faale-Tusi Paia e ala i le faapea atu:
◼ “Sa ou mafaufau lava e uiga i lou manatu lea na faaalia e faatatau i le mataupu i le olaga faaleaiga, ma ua ou aumaia ai se mea ou te manatu o le a e fiafia i ai. [Faaali atu le polosiua o le Manaomia, suʻe i le itulau 16, ma faitau fesili e ono o loo i le pito i luga.] Ua manino lava, e tatau i tagata taitoatasi o le aiga ona faia lana vaega e saosaolaumea ai i le fiafiaga o le aiga. Pe afai e te faaavanoa mai ni nai minute, o le a ou faataitai atu ia te oe le auala e te mauaina ai ni aogā sili mai lenei faamatalaga.” Ona amata loa lea ona suesueina le lesona 8.
4 O se isi auala e amataina ai se talanoaga o le taʻua lea o se faafitauli, atonu i le faapea atu:
◼ “E ui lava e mananao tagata uma ina ia latou maua le lagona o le faamalieina, ae foliga mai e toatele aiga e lē o taulau moni i lenei itu. O le ā sou manatu i se auala e mafai ona fesoasoani ia i latou ina ia maua ai le fiafiaga moni? [Faatali mo se tali.] Ua leva lava ona faailoa mai e le Tusi Paia ituaiga o faafitauli o le a tatou vaaia i aiga i aso nei. [Faitau 2 Timoteo 3:1-3.] Ae peitai, ua taʻu mai foi e le Tusi Paia i aiga mea e ao ona latou fai ina ia foia ai nei faafitauli ma maua ai le fiafiaga e tumau. O ona mataupu silisili o loo faatulaga mai ai i lenei tusi, Le Ala e Maua ai le Fiafia i le Aiga.” Ona faaali atu lea o se pusa mo autaluga na o loo i le faaiuga o mataupu talafeagai, faitau atu i ai, ma ofo loa le tusi.
5 Pe a e toe foi atu, ia faaaogā le polosiua o le “Manaomia” e amata ai se suesuega. E mafai ona e faapea atu:
◼ “Sa faagaeetia lava aʻu ona o lou naunau e iloiloina mataupu silisili o le Tusi Paia lea o loo faatatau atu i olaga faaleaiga. Ua faaalia i mea ua tutupu e faapea, e mafai ona maua iuga lelei pe a mulimulitaʻi i fautuaga aogā o loo maua i le Tusi Paia. O se faamalamalamaga faigofie lenei o le mafuaaga ua faapena ai.” Faitau le uluai palakalafa o le lesona 1 i le polosiua o le Manaomia, e aofia ai a lē o le Salamo 1:1-3 o le Isaia 48:17, 18. Pe a lava le taimi, ona talanoa lea o le vaega o totoe o le lesona. Ia fai i ai e te toe foi atu lua te suesueina faatasi le lesona o loo sosoo ai.
6 E Uiga i a Tatou Lomiga: I le iloaina e faapea, e matuā tāua lava a tatou lomiga uma, ma e tele ni tupe e faaaluina ai i le lomiaina, pe e te faalotolotolua ea e ofo atu ia mekasini, polosiua, po o tusi i tagata tou te feiloai? E faapefea ona tatou mautinoa e tatou te lē o foaiina atu a tatou lomiga i tagata latou te lē talisapaia? O le tasi o auala, o le fesili atu lea i le tagata, po o le a ia faamautinoa mai e na te faitauina le lomiga lea e te tuuina atu.
7 Mo se faaaoaoga, pe a ofoina le tusi “Fiafia i le Aiga,” e mafai ona e faapea atu:
◼ “Afai e te faamautinoa mai o le a e faitauina lenei tusi, o le a ou tuua ma oe e leai se tau. [Faatali mo se tali.] Atonu o e tau mafaufau pe faapefea ona matou faia o lenei mea. Talu ai o la matou galuega e lagolagoina e meaalofa tauofo. Afai la e te manao e faia sina meaalofa itiiti i la matou galuega, o le a ou talia lava ma le fiafia.” E iai se uso na seāseā lava ona ia maua ni foai faameaalofa mai tagata seʻi vaganā ai ina ua ia faia ni suiga se lua i ana faaupuga: Muamua, sa ia faaopoopo i ai se upu i le faapea atu: “Pe afai e te finagalo e faia sina meaalofa itiiti i lenei aso i la matou galuega, o le a ou talia lava ma le fiafia.” O lea, na ia faatali ai mo sina taimi seʻi tali mai lē ona le fale. O lea na ia lagona ai ma le mautinoa o le a talisapaia ma o le a faitauina le lomiga.
8 Seʻi o tatou faia ia taumafaiga uma tatou te mafaia, e taʻu atu ai i isi le ala e iu ai i le fiafia i le aiga—i le mulimuli i faatonuga o loo faatulaga mai i le Afioga a le Atua.—Sala. 19:7-10.