Le Silafaga a Ieova i Amioga Sauā
1 E lē tatau ia i tatou uma o auauna a Ieova ona iai sa tatou vaega i le lalolagi. (Ioane 17:16) Tatou te taumafai e faaaʻoaʻo i le silafaga a le Atua i mataupu uma, na i lo le faaaʻoaʻo i manatu o le lalolagi, lea o loo pulea e Satani. Ua faapitoa lava lenei manatu e tusa ai ma tulaga o amioga sauā, lea ua avea o se uiga masani i le toatele.
2 Iinei i Samoa, ua avea amioga sauā o se mea masani e faafoeina ai ni fefinauaiga. E vave tele ona feita tagata ona o ni faafitauli ua tutupu, po o ni faafitauli foi atonu e foliga e ono tutupu, ma e masani lava ona iʻu ai i ni amioga sauā. O le soona manatu faamaualuga o se tasi i lona lava tulaga po o le tulaga o lona aiga, ua taʻitaʻia atu ai i le fia tauimasui, ma saili ina ia toe ‘taui’ atu i nisi sa faatiga mai. Pe a aʻoaʻia e mātua fanau, pe matutua pe laiti, e masani ona iʻu atu i se sasa faamoʻamoʻa. Ona o nei la amioga sauā, ua masani ai ona matuā faamanuʻaina tino o nisi tagata po o le oo lava ina fasiotia ai.
3 Ua maileia foi nisi Kerisiano i lenei agaga, i le taulimaina lea o o latou faafitauli po o faafitauli o o latou aiga ma isi, e ala i le faamataʻu atu po o le faia o ni gaoioiga sauā i lē ua latou manatu na faia se sese. O le lē pulea o le ita ua oo ai ina tuuesea tofiga o tiute tauave faalefaapotopotoga o nisi uso. O nisi sa faateʻaina mai le faapotopotoga Kerisiano. Ona o le ā le mafuaaga autū? O le talia o le manatu faalelalolagi i amioga sauā, na i lo le talia o le silafaga a Ieova.
4 E Inoino Ieova i Amioga Sauā: O le ā le silafaga a Ieova i le tele o amioga sauā? Ua fai mai le Salamo 11:5: “E tofotofo e Ieova i le ua amiotonu; a ua inosia e lona finagalo lē fai amio leaga, ma lē fiafia i le faasaua.” Ioe, e ʻinoʻino Ieova i amioga sauā ma na te faatalitalia foi le ia i tatou o lea lava lagona. (Roma 12:9) Na te taʻusalaina le agaga o le fia tauimasui lea e masani ona taʻitaʻia ai i amioga sauā. (Roma 12:17-21) O amioga sauā o se tasi lea o pogai autū na faaumatia ai le lalolagi o tagata lē amioatua i aso o Noa, ma ua faatulagaina foi lenei lalolagi faasauā mo le faaumatiaga a Ieova. (Kene. 6:13; Mata. 24:37) Sa atagia mai ia Iesu le silafaga a lona tamā, auā sa ia leʻi tali atu i ni amioga sauā, ma na te leʻi faatagaina foi ona soo e faia faapea, e oo lava i se mafuaaga tāua o le puipuiina o le Alo o le Atua.—Mata. 26:52, 53.
5 E tāua tele lo tatou mauaina o le silafaga a Ieova. E ao ona tatou faaeteete i le filifilia o a tatou faafiafiaga ma taaloga. E lē tatau foi ona tatou taui ma sui pe afai ua sese mai se tasi ia i tatou. O nei fautuaga ua tuuina atu ina ia fesoasoani ia i tatou e ʻinoʻino i amioga sauā e pei ona ʻinoʻino i ai Ieova, ma ia tatou aloese i tatou lava mai le toe taui atu i so o se ituaiga o faiga sauā. O le faia faapea, o le a tatou lē faalumaina ai o ia po o lana faalapotopotoga.—1 Pete. 2:12.