E Foai Mai e Ieova le Malosi e Sili Atu i le Mea e Masani Ai
1 O se faaeaga tautele o le auaunaga paia—o le faiva faa-Kerisiano—lea ua tuuina mai i soo uma lava o Iesu. (Mata. 24:14; 28:19, 20) Ae ona o le lē lelei atoatoa faaletagata ma omiga mai lenei faiga o mea, e tatou te ono manatu ai i nisi taimi ia i tatou lava e faapea, e matuā lē agavaa lava.
2 Pe a tupu mai lena mea e mafai ona faamafanafanaina i tatou i le tusi a le aposetolo o Paulo i Kerisiano faauuina i Korinito. Na ia tusi atu e faapea: “A ua ia te i matou lenei oa i ipu omea.” (2 Kori. 4:7) Sa mautinoa e Paulo e faapea: ‘Ona ua ia te i matou o lenei faiva, o le mea lea matou te lē faavaivai ai.’ (2 Kori. 4:1) E moni, o se luʻi lenei mea mo i tatou uma lava taitoatasi, pe e i le vasega faauuina po o “isi mamoe,” ina ia faaauau pea ona folafola atu le tala lelei ma ia “le faavaivai.” E tatou te manaomia le malosi mai le Atua, o lē na te foai mai ‘le malosi e sili atu i le mea e masani ai.’—Ioa. 10:16; 2 Kori. 4:7e.
3 Ua avea o se faamalosiau le toatele o Molimau o loo avea ma faievagelia maelega e ui lava o loo tauivi ma teteega matautia, faafitauli matuia o le soifua maloloina, po o le utiuti o le seleni. E tatau ia i tatou uma lava ona iloa e faapea, o lo tatou tofiga e talaʻi, o loo lagolagoina e Ieova. Nai lo o le faatagaina o le loto vaivai ma le lē malamalama e faavaivaia la tatou filifiliga mausali e talaʻi, seʻi o tatou ‘faaauau pea ona maua le malosi mai le Alii ma le malosi o lona mana.’—Efe. 6:10; Faata. 24:10.
4 Le Auala e Maua ai le Malosi Mai le Atua: Ia finafinau i le tatalo, ma talosaga atu mo le fesoasoani ma le malosi mai le Atua. (Roma 12:12; Fili. 4:6, 7) Ia, ona e faalagolago atu lea ma lou loto atoa ia Ieova ina ia foai mai le malosi e sili atu i le mea e masani ai. (Faata. 3:5) Faitau tala i olaga o auauna a Ieova i aso nei o loo i a tatou mekasini, auā o loo aumaia ai faamaoniga e iloa ai o loo fesoasoani Ieova i ana auauna i aso nei ina ia tumau ai i tofotofoga. Ia tausia pea le aufaatasi vavalalata ma uso i le faapotopotoga, ma aua neʻi tuulafoaiina sauniga a le faapotopotoga.—Roma 1:11, 12; Epe. 10:24, 25.
5 Seʻi o tatou faia mea uma lava tatou te mafaia ina ia maua ai le malosi mai ia Ieova—le malosi e sili atu i le mea e masani ai, ma o le a fesoasoani lena ia i tatou e tatou te lē faavaivai ai i le galuega e sili atu ona tāua o le talaʻiina lea o le Malo.