Ia Faaalia le Faaaloalo mo le Nofoaga o le Tapuaiga ia Ieova

¹ Pe a faapea o i tatou o ni mālō i se fale o se tasi, e tatou te faaalia le faaaloalo i mea totino a lena tagata, e lē faia se mea e faaleagaina ai, ma e tatou te lē faaleagaina le tulaga maopoopo ua masani ai lena aiga. Pe e lē sili ai ea la ona tatou faia faapea pe a avea i tatou ma mālō a Ieova! E manaomia ona tatou iloa a tatou amio e tatau ona fai i lona maota. (Sala. 15:1; 1 Timo. 3:15) E tusa lava pe fai a tatou sauniga faa-Kerisiano i le Maota o le Malo, i se fale o se aiga, po o se fale mo le lautele, o le toatele lava o i tatou e masani ona faaalia le faaaloalo mo lo tatou nofoaga o le tapuaiga e pei lava o loo faia i le fale o Ieova, o lē ‘e sili atu ona mamalu i le lagi atoa ma le lalolagi.’—Sala. 148:13.

² Ua faaalia e nisi uso le leai o se faaaloalo i sauniga e ala i le pisa, ma faaalia uiga e peiseai e lē tāua faamatalaga o loo fofogaina mai. E iai foi nisi tagata matutua e faia ni talanoaga lē tatau i le poletito, faleese, po o fafo atu o le Maota o le Malo a o faagasolo le sauniga. Afai e tuuina se tamaitiiti matua e vaaia se tamaitiiti laitiiti, i nisi taimi e oo ai ina taaalo le toalua lea ma lē maua ai ni aogā mai le polokalame. Ua vaaia foi nisi talavou i fafo atu o le Maota o le Malo pe a uma sauniga o taaalo, ma matuā pisapisao ai, ma oo lava ina faia ai taugā karate. I nisi tulaga, ua latou faasoesa ai i tuaoi pe faalavelave ai foi i taavale o loo tutū i le paka po o le alatele.

³ Le Auala e Alofia ai le Lē Faaaloalo: O le talisapaia o le mamalu ma le paia o la tatou tapuaiga, e lē taumatea tatou te lē mananao ai e faalavelave i isi i lo tatou taumusumusu, aai, lamu pulu, faagasē pepa, ō soo i le faleese ae lē manaomia, po o le fai ma masani le tuai mai i sauniga. O mātua e faaaloalo ma iai le agaga talisapaia, e latou te lē faatagaina a latou fanau e faaeleelea le kapeta, faamalū o nofoa, po o puipui o le Maota o le Malo, po o le fale o loo faia ai suesuega tautusi. E mautinoa, e tatou te ioe uma lava e faapea, o le mea moni e leai se avanoa mo so o se ituaiga o amioga matagā, faia o tala valea, po o ni tausuaga i upu masoā i a tatou sauniga.—Efe. 5:4.

⁴ Afai tatou te manatua pea le fuafuaga o a tatou sauniga faa-Kerisiano, o le a tatou faamautinoaina e faapea, e tatau ia i tatou ma a tatou fanau ona faaalia le faaaloalo e tatau ai mo le nofoaga o le tapuaiga ia Ieova lea ua tatou ‘filifilia e tutū ai.’—Sala. 84:10.