Pusa Fesili
◼ Aisea e tatau ai ona tatou uaʻi faapitoa atu i o tatou laei ma teuga pe a asiasi atu i fale o le Sosaiete i Brooklyn, Patterson, ma Wallkill, i Niu Ioka, faapea ma ofisa o lālā i le lalolagi aoao?
Ua faatalitalia Kerisiano ia tausisia teuga onomea ma amioga lelei. I taimi uma lava, e tatau i o tatou laei ma teuga ona atagia atu ai le tulaga maopoopo ma le mamalu e tatau ai mo auauna a Ieova le Atua. Ua faamaonia lena mea ae maise lava pe a asiasi atu i fale o le Sosaiete i Niu Ioka ma i lālā i le lalolagi aoao.
I le faagasologa o le 1998, o le a faia ai tauaofiaga itumalo ma faava-o-atunuu. E faitau afe o tatou uso mai le tele o atunuu o le a asiasi atu i le ofisa ulu o le Sosaiete i Niu Ioka faapea foi ma lālā i isi atunuu. E lē gata i le asiasi atu i na fale, ae i so o se taimi lava, e manaomia ona ‘tauleleia i tatou o ni faifeau a le Atua i mea uma lava,’ e aofia ai ma o tatou laei ma teuga talafeagai.—2 Kori. 6:3, 4.
I le talanoaina o le tāua o laei ma teuga tatau, ua fautua mai ai le tusi, Organized to Accomplish Our Ministry i le manaomia ona mamā faaletino, ia onomea laei, ma ia teuteu lelei pe a auai i le faiva i le fanua pe auai foi i sauniga faa-Kerisiano. I lea, ua faapea mai ai le faamatalaga i le itulau e 131, palakalafa 2: “O le tulaga foi lena e iai pe a asiasi atu i le aiga Peteli i Brooklyn po o isi lava ofisa o lālā o le Sosaiete. Ia manatua, o le igoa Peteli, o lona uiga o le ‘Fale o le Atua,’ o lea e tatau lava ona talafeagai o tatou laei, teuga, ma amioga e tusa ma mea o faatalitalia mai ia i tatou pe a auai i sauniga mo le tapuaiga i le Maota o le Malo.” E tatau foi la ona tausisia lenei lava tulaga maualuga e tagata talaʻi o le Malo mai lea lava vaipanoa faapea foi ma i latou mai isi nofoaga mamao o ē ō mai e fia vaavaai ma auaufaatasi ma sui o le aiga Peteli ma asiasi atu foi i fale o le lālā.
O o tatou laei e ao ona avea o se taaʻiga lelei mo isi i le auala e latou te manatu ai i le tapuaiga moni a Ieova. Ae peitai, ua matauina pe a asiasi atu i fale o le Sosaiete, o nisi o uso ma tuafāfine e matuā faatalalē lava i o latou laei. O laei faapena e lē talafeagai pe a asiasi atu i so o se aiga Peteli. E tusa ai ma lenei mataupu, i le pei o isi foi vala uma o lo tatou olaga faa-Kerisiano, e tatou te faanaunau ai ina ia tausisia lea lava tulaga maualuga ua faaesea ai tagata o le Atua mai le lalolagi i lo tatou faia o mea uma lava e faamamaluina ai le Atua. (Roma 12:2; 1 Kori. 10:31) O se mea lelei foi le talanoa atu i a tatou tagata suesue o le Tusi Paia ma isi o ē atonu o le uluai taimi lea ua asiasi atu ai i Peteli, ma faamanatu atu ia i latou e uiga i le tāua o le uaʻi totoʻa atu i laei ma teuga talafeagai.
O lea, pe a asiasi atu i fale o le Sosaiete, fesili ifo ia te oe lava e faapea: ‘Po o onomea oʻu laei ma aʻu teuga?’ (Faatusatusa i le Mika 6:8.) ‘Po o atagia atu ai se talaaga lelei o le Atua lea ou te tapuai i ai? Po o le a manatu sese pe faatausuaiina ai isi ona o oʻu foliga atu? Po o oʻu faataatia se faaaoaoga saʻo mo isi o ē atonu o le a asiasi atu mo le uluai taimi?’ Tau ina ia avea pea o tatou laei ma teuga ma mea e ‘viia ai i mea uma lava le aʻoaʻoga a le Atua lo tatou Faaola.’—Tito 2:10.