Polokalame Fou o le Fonotaga Matagaluega

“Ia Tausisi i Poloaiga a le Atua E te Ola Ai” o le matua lena o le polokalame o le fonotaga matagaluega e lua aso, e amata ia Setema. (Faata. 4:4) O le a faamamafaina le pogai e lē o se avega mamafa ai le usiusitai i poloaiga a le Atua. E lē gata i lea, o le a faailoa mai ai foi le auala ua avea ai le faia o le finagalo o le Atua o se mea e faafouina ai ma maua ai le fiafiaga moni faapea ma se faamoemoe mo le lumanai.—Mata. 11:28-30; Ioa. 13:17.

O i latou e usiusitai i le poloaiga a Keriso ua mananao e papatisoina i lea fonotaga, e tatau ona talanoa atu i le ovasia taimua, ma o le a ia faia ai ni fuafuaga manaomia.—Mata. 28:19, 20.

O le a faamalamalamaina mai ai i se lauga faasolo auala aogā e mafai ona tatou faailoa atu ai le alofa mo le Atua ma o tatou uso. (Ioa. 13:34, 35; 1 Ioa. 5:3) O le a aofia ai i le polokalame ni fautuaga faagaee loto mai le Salamo 19 ma le 119. E ui lava o timaiga faagaeeina i nei salamo na tusia i le faitauafe tausaga ua mavae, ae o le a tatou iloaina ai le auala ua aogā totino ai lenei timaiga mo i tatou i aso nei.

O le lauga lautele o le a faia e le ovasia itumalo o lona matua e faapea, “Ia Mataʻu i le Atua ma Anaana i Ana Poloaiga.” (Fai. 12:13) O le lauga faaiu a le ovasia matagaluega o le a faaalia ai le auala e mafai ona maua ai e talavou aogā silisili mai le olaga i le taimi nei, ma le pogai e mafai ai ona latou maufaatuatuaina le iai o le ola e faavavau i le lumanai. E faaiu e le ovasia itumalo le polokalame e ala i le faailoa maʻoti mai o le tele o aogā e mafai ona maua pe afai e ola e ogatusa ma le “tulafono silisili” o le alofa. (Iako. 2:8) O le mea moni, o se polokalame lenei o le fonotaga o le a leai se tasi e manao na te misia!