Sauniga o le Auaunaga mo Iulai

Vaiaso e Amata ia Iulai 6

Pese 9 (37)

10 minu: Faasilasilaga a le faapotopotoga. Faasilasilaga e fili mai i La Tatou Faiva o le Malo. Talanoa i le lipoti o le auaunaga i le fanua mo le atunuu ma le faapotopotoga ia Aperila. Tala Faatiokarate.

20 minu: “Tauaofiaga Itumalo ma Faava-o-atunuu o le 1998 o ‘Le Ala a le Atua i le Ola.’” (Palakalafa 1-17) Fesili ma tali. Faitau le palakalafa 11 ma le 12. Ia faamamafa le tāua o le tausia ma le faaeteete o o tatou foliga onomea faa-Kerisiano ma amioga ma ia vaavaai lelei a tatou fanau.

15 minu: “E Manaomia Ona Faalogo o Tatou Tuaoi i le Tala Lelei.” Fuafua mo ni tagata talaʻi tomai se toalua pe toatolu e autaluina fautuaga mo le taulimaina o nisi o polosiua atonu o iai pea i le faapotopotoga. Ia faamatala mai pe aisea e mafai ai ona aogā i le oganuu a la outou faapotopotoga. Ia faamamafa le sini o le amataina o ni suesuega faale-Tusi Paia i le polosiua o le Manaomia po o le tusi o Le Poto. Ia faataitai se taulimaga i le uluai asiasiga ona sosoo ai lea ma se toe asiga ma le ofo o se suesuega faale-Tusi Paia. Ia manatua e taʻua le fuafuaga mo ni foai tauofo.

Pese 13 (124) ma le tatalo faaiu.

Vaiaso e Amata ia Iulai 13

Pese 27 (221)

8 minu: Faasilasilaga a le faapotopotoga. Tala o le tupe. Faalaeiau tagata uma ina ia manatunatu mamafa i le tusia o o latou igoa e avea o ni paeonia lagolago ia Aokuso, ona e lima faaiuga o vaiaso.

15 minu: “Se Mea Ina a Lelei o le Auai Pea!” Fesili ma tali. Ia faaaofia ai ni faamatalaga mai le Awake! o Iuni 8, 1988, itulau 19-21, e faalaeiau ai i tagata talavou ina ia auai e lē aunoa i sauniga.

22 minu: “Tauaofiaga Itumalo ma Faava-o-atunuu o le 1998 o ‘Le Ala a le Atua i le Ola.’” (Palakalafa 18-24) Fesili ma tali. Faitau le palakalafa 18 ma le mau o taʻua ai. Ia faamamafa le manaomia ona faatulaga lelei ma ia magafagafa mo isi, ae maise lava pe a oo mai i le taofia o nofoa. Ia faaiu i se lauga puupuu e autaluina ai “Mea e Faamanatu mo le Tauaofiaga.”

Pese 29 (222) ma le tatalo faaiu.

Vaiaso e Amata ia Iulai 20

Pese 12 (113)

8 minu: Faasilasilaga a le faapotopotoga. Autalu le pusa o loo faaulutalaina “Se Tumutumuga Fou?”

12 minu: “Se Asiasiga e Mafai Ona Avea o se Faamanuiaga.” Talanoaga a ni toeaina se toalua. Faamatala sini o le galuega faaleoleo mamoe e pei ona autaluina i Le Olomatamata o Setema 15, 1993, itulau 20-23. Ia faalaeiau ma le māfana le faapotopotoga ina ia āloālo atu mo asiasiga a toeaina.

25 minu: “Auaunaga Faapaeonia—Pe e mo Oe?” (Palakalafa 1-14) Ia amata e le ovasia o le auaunaga i ni nai faamatalaga pupuu, e faalaeiau ai tagata uma ina ia mafaufau loloto e uiga i le auaunaga o le paeonia sauatoa. Ona ia talanoaina lea o le fesili 1, ma faaaofia ai ni faamatalaga mai le mataupu “Enthusiastic Pioneer Spirit” (Agaga Aasa Faapaeonia) i le 1998 Yearbook, itulau e 104-105. Ia aufaatasi ma ia ni tagata talaʻi se toalua pe toatolu o le faapotopotoga o ē e iai le tomai faapaeonia, latou te talanoaina faatasi le fesili lona 2. Ia latou fetufai ni manatu aogā ma moni, i le auala e mafai ai ona sologa lelei i mea faitino a o avea ma paeonia. Ona aufaatasi atu lea o ni mātua se toalua i le vaega lena ina ia talanoaina le fesili lona 3. Ia latou faailoa mai ni mafuaaga mautinoa e tatau ai i talavou ona mafaufau loloto i se galuega i le auaunaga faataimi atoa. Ia faalaeiau tagata uma ina ia auai i le Sauniga o le Auaunaga i le isi vaiaso o sosoo mai, o le a talanoaina ai isi fesili o loo totoe.

Pese 11 (85) ma le tatalo faaiu.

Vaiaso e Amata ia Iulai 27

Pese 15 (127)

15 minu: Faasilasilaga a le faapotopotoga. Ia faamanatu i tagata uma ina ia tuuina atu a latou lipoti o le auaunaga i le fanua mo Iulai. Faasilasila atu ni fuafuaga mo le auaunaga mo le uluai faaiuga o le vaiaso o Aokuso, ma faalaeiau tagata uma ina ia faia ai se sao. Autalu le “Polokalame Fou o le Fonotaga Matagaluega.”

30 minu: “Auaunaga Faapaeonia—Pe e mo Oe?” (Palakalafa 15-25) Lauga ma se talanoaga e faatautaia e se toeaina. Ia fuafua mamao mo paeonia ma i latou na paeonia i tausaga ua mavae ina ia fai mai ni faamatalaga mai le loto e tali atu ai i fesili e 4-5. Ia latou faamamafa mai le manaomia o se faasologa lelei ma pipii i ai, ma aumai ni faaaoaoga i le aogā o le faia o ni faasologa faalevaiaso o le auaunaga e mafai ona aogā moni. Ia faaiu e le toeaina i se lauga faagaeeloto e taliina ai le fesili e 6. O le amataga o le tausaga faaleauaunaga ia Setema 1, o se taimi lelei lea mo paeonia fou e amata ai la latou auaunaga faataimi atoa. E mafai ona maua pepa mo talosaga mai so o se sui o le Komiti o le Auaunaga a le Faapotopotoga.

Pese 7 (51) ma le tatalo faaiu.