Ovasia o Loo Taimua—Le Ovasia o le Auaunaga
1 E matuā naunau lava le ovasia o le auaunaga i mea uma e fesootai atu ma le agaigai i luma o le galuega faaevagelia i le oganuu ua tofia i le faapotopotoga. I lea, ua ia faia ai se vaega tāua e fesoasoani ai ia i tatou e faataunuuina la tatou tiute tauave o le talaʻia o le tala lelei. I le avea o se faievagelia maelega, e taimua ai o ia i le faamaopoopoina o mea uma e fesootai atu ma le auaunaga. I le avea o se faiaʻoga tomai, e fesoasoani o ia i tagata talaʻi taitoatasi ina ia faaleleia le uigā o la latou faiva.—Efe. 4:11, 12.
2 O le toeaina lenei na te vaaia tuusaʻo lava le galuega a auauna o le faiva ua tofia e taulimaina tusi, mekasini, ma oganuu. E ia te ia le tiute tauave e faamautinoa ua lava tusi, mekasini, ma pepa mo le auaunaga i masina taitasi mo i tatou. E faatasi i le tausaga ona ia autaluina le faila mo tuatusi uma o aiga i le oganuu lea na fautuaina ai i tatou ina ia aua neʻi toe asia, ma o ia foi e tofia ni uso agavaa e asia nei aiga.
3 O le tiute tauave a le ovasia o le auaunaga le vaaia o vala eseese o le talaʻiga, e aofia ai le molimau atu i oganuu o pisinisi, i ala tetele, ma le molimau atu i telefoni. E mataalia o ia i le faamaopoopoina o fuafuaga aogā mo faatasiga mo le auaunaga i le faagasologa o le vaiaso e aofia ai aso mālōlō. E faaalia lona naunau moni i le galuega o le faia o suesuega faale-Tusi Paia. E vaavaai o ia mo ni auala e avatu ai le fesoasoani faaleagaga ia i latou o ē ua seāseā talaʻi po ua lē toe talaʻi foi. E matuā manatu mamafa o ia i le galuega a paeonia, ma o ia na te vaaia le polokalame o le E Fesoasoani Paeonia i Isi.
4 Ona o se tasi o le Komiti o le Auaunaga a le Faapotopotoga, e faailoa atu ai e le ovasia o le auaunaga ni fesuiaiga e manaomia ona faia i vaega o Suesuega Tautusi a le Faapotopotoga. Pe a ia asia la outou vaega, ia faamautinoa ua e auai ma ia lua ō faatasi foi i le auaunaga i le fanua.
5 E tatau i tagata uma o le faapotopotoga ona naunau e felagolagomai i faatonuga e tuuina atu e le ovasia o le auaunaga. O le a fesoasoani lenei ia i tatou e faaleleia ai le uigā o la tatou galuega o le faia o soo, ma maua ai le olioli tele i la tatou faiva.