Faatatauga o le Suesuega Tau Tusi a le Faapotopotoga
Vaega 5: Asiasiga a le Ovasia o le Auaunaga
1 E ao ona avea le ovasia o le auaunaga o se faievagelia ma o se faiaʻoga. Na te faatinoina se matafaioi autū o le fesoasoani lea i le faapotopotoga e faataunuu lana avega tauave e talaʻi le tala lelei i ona oganuu tofia. (Mare. 13:10) Pe a ia faatinoina lana avega tauave ma le uigā ma felagolagomai ma tagata uma, o le a atiina aʻe ai e tagata talaʻi le tomai e sili atu i le taulimaina o le tala lelei ma o le a maeʻaeʻa atili ai ona galueaiina le oganuu.
2 E uaʻi atu le ovasia o le auaunaga i le faamaʻiteina o galuega e sili atu i le faiva i le fanua. O le a faataunuuina lenei mea, muamua e ala i le Suesuega Tau Tusi a le Faapotopotoga. O le mea e masani ai, e tofia le ovasia o le auaunaga e taʻitaʻia se suesuega tau tusi, peitai e faatasi i masina taitasi, e mafai ai e lana fesoasoani ona sui ia te ia a o ia asiasi atu i se isi vaega.—km 10/81 itu. 1, 7.
3 Sauniuniga mo le Asiasiga: A o lumanai le vaiaso o lenei asiasiga, e ao i le ovasia o le auaunaga ona siaki pepa Faamaumau a Tagata Talaʻi o le Faapotopotoga, a i latou o loo auai i le vaega. E ao foi ona ia fuafua e feiloai ma le taʻitaʻi ma autaluina galuega a tagata talaʻi ua tofia i le vaega. E mafai e le taʻitaʻi ona faailoa atu i le ovasia o le auaunaga ni faafitauli e fesootai ma le auaunaga po o ni manaoga atonu e lē o faaalia mai i pepa faamaumau. E ao ona toe faamanatu i le taʻitaʻi faapea e na o le 45 minute le umi o le suesuega ina ia faaavanoa ai le taimi mo se lauga o le auaunaga e 15 minute a le ovasia o le auaunaga.
4 O le a faaautū lenei lauga i le siitiaina o le talisapaia atili mo le faiva. Afai e manomia e tagata talaʻi se fesoasoani i nisi o vala o le faiva, e ao i le ovasia o le auaunaga ona ofoina atu ni faufautuaga aogā e faaleleia ai. E ao i ona manatu ona mautinoa ma faalaeiau ina ia lē faalumaina ai pe faavaivaia ai se tasi e ala i ni faamatalaga faavaivai loto. O le a na ona soloia ai e lena le fuafuaga o le asiasiga. E ao i lana lauga ona faalaeiau ai tagata uma ina ia faia se faaleleiga.
5 O le a taumafai le ovasia o le auaunaga e uaʻi totino atu i le toatele o uso ma tuafāfine pe afai e avanoa lana faasologa. E mafai ona ia faia ni fuafuaga e galulue faatasi ai ma tagata eseese i le auaunaga. A o galulue faatasi ma tagata talaʻi i lea fale ma lea fale, e mafai ona ia ofoina atu se faufautuaga aogā e tasi pe lua i ni auala e faaleleia ai a latou taulimaga. E ao ona faia lenei mea e lē i se auala faitio, ae i se faanaunauga faamaoni e fia fesoasoani. Atonu e ofo atu foi o ia e ō faatasi ma tagata talaʻi i toe asiga ma suesuega faale-Tusi Paia. Afai e foliga mai e iai nisi i le vaega e manaomia se fesoasoani totoino, e mafai ona ia faia se asiasiga faaleoleo mamoe i lena vaiaso e fesoasoani ai ia i latou. Mulimuli ane, e mafai ona ia faailoa atu i le taʻitaʻi faufautuaga na ia ofoina atu. O lenei uaʻi totino atu mafana, ua faagaeeina ai nisi o ē sa faapalapala i la latou auaunaga i le fanua.
6 Faatasiga mo le Auaunaga: O faatasiga mo le auaunaga i le fanua i lena vaiaso e ao ona taʻitaʻia e le ovasia o le auaunaga. E ao ona amata tonu i le taimi e tusa lava pe na o se toaitiiti o loo auai. E lē tatau ona umi atu le faatasiga na i lo le 10 i le 15 minute. Filifili pe talanoaina le Mau autū o le aso. A o leʻi tāʻape le vaega, e ao ona iloa e tagata uma po o fea ma o ai o le a la galulue. (1 Kori. 14:33, 40) Ona ao lea i le ovasia o le auaunaga ona faalaeiau tagata uma e ō i le auaunaga i le fanua e aunoa ma le faatuai.
7 E mafai ona avea asiasiga faifai pea a le ovasia o le auaunaga i vaega o suesuega tau tusi o se faamanuiaga moni i le faapotopotoga. E ala i lo tatou felagolagomai taitoatasi ma ia pe a ia asiasi atu, o le a maopoopo ai ma uigā la tatou faiva. E lē gata i lena, o le a ia maua ai le olioli mai lana galuega. (Epe. 13:17) O le a aoaoina ai ē pei ni mamoe, ma o le a tatou mauaina ai le olioli i le iloaina ua tatou faataunuuina lo tatou tofiga e talaʻi atu i ē uma o le a faalogo mai.—Isaia 61:1,2; Eseki. 9:11; Ioane 17:26.