Tatou ‘Fai Saʻo Atu le Mataupu!’
1 Pe na e feiloai i se tagata e ona le fale na faasalavei atu i lau taulimaga saunia lelei i le faapea atu: “O le ā le mea e te manao i ai? Fai saʻo mai le mataupu!” O le ā e mafai ona tatou aʻoaʻoina mai se mea faapena?
2 O le toatele o tagata i aso nei e lē lava le onosai. Latou te fia iloa po o ai i tatou ma aisea foi tatou te ō atu ai. Pe a latou iloa o le fuafuaga o la tatou asiasiga o le talanoaina lea o le Tusi Paia, atonu o le a latou mumusu foi e faalogo. O le faitauina o le Tusi Paia ma le talanoaina o mea faaleagaga e lē o ni mea tāua na i olaga o le toatele o tagata. E mafai faapefea ona tatou faatalitonuina na tagata e ona fale faapea, e na o ni nai minute lava latou te faaaluina e talanoaina ai se mataupu faale-Tusi Paia ma i tatou?
3 Le Auala e Sili Ona Aogā: O le ki, o le faailoa lea i lē ona le fale e faapea, ua aumai e le Tusi Paia vaifofo aogā mo faafitauli o loo faapopoleina ai o ia ma ia faia loa e aunoa ma le tele o ni upu. O taulimaga e sili ona aogā, o le faatomua lea o se fesili patino ua fuafuaina ina ia faatupu manatu i lē ona le fale, ona sosoo ai lea ma se mau e tali ai le fesili. Atonu e te fiafia e faataitai nisi o nei fautuaga o loo mulimuli mai. Ua fuafuaina nei fautuaga e fesoasoani ai ia i tatou ina ia vave ona ‘fai saʻo atu le mataupu’ ae i le taimi lava e tasi e faagaeeina ai foi le fiafia o lē e ona le fale.
4 I oganuu e iai tagata e masani ona faapea mai e lē fiafia e faalogo, ia laga se fesili e faaaofia totino ai i latou:
◼ “A o tatou tu lata atu i le isi meleniuma, po o iai sou lagona mautinoa pe e te lē o mautinoa? [Faatali mo se tali.] Na valoia mai e le Tusi Paia le tulaga lē toafilemu o mea tutupu ia o loo tatou vaaia i aso nei faapea ma o latou iuga.” Faitau le 2 Timoteo 3:1, 2, 5 ma le Faataoto 2:21, 22.
◼ “Ua matuā tele le popole i lenei atunuu e uiga i le tausiga o le soifua maloloina. Pe na e silafia ua folafola mai e le Atua e faapea o le a ia foia e faavavau faafitauli uma tau le soifua maloloina?” Faitau le Faaaliga 21:3, 4.
◼ “O le ā sou manatu o le a faapeī ni aogā e maua e lo tatou nuu pe afai e faatatauina e tagata uma o loo nonofo iinei mataupu silisili o le Tusi Paia?” Faitau le Mataio 22:37-39.
5 Talu ai o lo tatou tofiga o le talaʻia lea o le tala lelei o le Malo, i so o se taimi lava e mafai ai, e tatau ai la ona tatou tataʻi atu manatu i mea o le a faataunuuina e le Malo. E mafai ona e faapea atu:
◼ “Pe na e iloa o loo valoia mai i le tusi pito sili ona leva i le lalolagi, le Tusi Paia, e faapea, o le a na o le tasi lava le malo i le lalolagi atoa?” Faitau le Tanielu 2:44.
◼ “O le ā sou manatu i le tulaga o le a iai mea pe afai e pulea e Iesu Keriso le lalolagi?” Faitau le Salamo 72:7, 8.
6 I oganuu e fiafia ai tagata i lotu, e mafai ona e faataʻitaʻia se tasi o faatomuaga nei:
◼ “E toatele tagata ua pagatia i faiga faailogatagata ona o le ituaiga e iai i latou, le lotu, po o le lanu. O le ā sou manatu i lagona o le Atua e uiga i na faiga faailogatagata?” Faitau le Galuega 10:34, 35.
◼ “Ua tatou iloa na faia e Iesu Keriso le tele o vavega i ona aso. Afai e mafai ona e talosaga atu ia te ia ina ia faia le tau o le tasi o se vavega, o le ā lena vavega?” Faitau le Salamo 72:12-14, 16.
7 Afai e faatalatū lē ona le fale e tatala mai le faitotoa, e mafai ona e amata se talanoaga i lou faapea atu:
◼ “O le toatele o tagata i aso nei ua fiu i le faalogo soo i faafitauli. Ua latou fia faalogo i ni vaifofo. E lē taumatea e faapena foi oe. Ae o fea e mafai ona tatou maua ai ni vaifofo moni o o tatou faafitauli?” Faatali mo se tali. Faitau le 2 Timoteo 3:16, 17.
8 Aisea e Lē Faataʻitaʻi ai le Auala Lenei? I nisi taimi, e masani lava e na o se fesili tuusaʻo faigofie e manaomia ina ia faagaee ai le fiafia o lē ona le fale. O se tasi fafine sa masani ona tetee i le taimi muamua, na ia faaulufale ni tuafāfine se toalua i lona fale ina ua uma ona fesili atu se tasi o tuafafine: “E mafai ona e faailoa maia le Malo lea e te tatalo i ai i le Tatalo a le Alii?” Sa naunau fia iloa e le fafine le fesili, ma na ia talia se suesuega faale-Tusi Paia. Ua avea nei o ia ma auauna tuuina atu a Ieova!
9 Pe a e talanoa i se tagata i le fale, ia e faamaoni i au upu. Ia talanoa atu mai lou loto. E foliga mai e sili atu ona tali lelei mai tagata pe afai latou te mautinoa o loo tatou naunau moni atu ia i latou.—Galu. 2:46, 47.
10 O le galuega o le talaʻia o le tala lelei ua avea o se luʻi i aso nei. O nisi tagata e ona fale e masalosalo i tagata ese. O isi e ola i ni olaga pisi ma e tau leai ni taimi e avanoa ai. Peitai, e mafai ona tatou mautinoa o loo iai pea le toatele o ē ua tatau ai e manaomia ona sailia. (Mata. 10:11) O a tatou taumafaiga ina ia sailia i latou e foliga mai o le a sili atu ona taulau manuia pe afai e faapupuu a tatou taulimaga ma ia ‘fai saʻo atu le mataupu!’