Ia Faasilisilia le Suafa Mamalu o Ieova
1 Na faalumaina e Satani le suafa o le Atua ina ua ia faaseseina o tatou uluai mātua e faia le agasala. Na faia e le Tiapolo i se auala faaʻoleʻole se tuuaʻiga sese e faapea, sa pepelo Ieova ia Atamu. (Kene. 3:1-5) Talu ai o le suafa tauatua e fesootai atu ma le tomai o le Atua e faataunuuina ai lana afioga, na avea ai le tuuaʻiga a Satani o se taufaaleaga e sili atu ona leaga. E ala i le faataunuuina faasolosolo o lana fuafuaga tauatua, ua faamamāina ai e Ieova lona suafa mai le faalumaina, ma faamamaluina ai.—Isa. 63:12-14.
2 O i tatou, o tagata ua ‘faaigoaina e Ieova i lona suafa.’ (Galu. 15:14, 17) O lenei mea ua aumaia ai ia i tatou le avanoa e faaalia ai le lagona o ia i tatou e uiga i le faapaiaina o lea suafa. Ua tatou iloa e ese le manaia o le suafa o Ieova, auā ua fai ma sui o mea lelei uma, le agalelei, le alofa, le alofa mutimutivale, ma le amiotonu. Ua faatumuina i tatou i le mataʻu ona o le silisili o le suafa paia o le Atua. (Sala. 8:1; 99:3; 148:13) O le ā e tatau ona uunaia i tatou e faia?
3 Ia Faapaiaina le Suafa o le Atua: E lē mafai ona faia le suafa o le Atua ia sili atu ona paia auā ua uma ona faapaiaina i se tulaga e silisili lava. Ae ala i a tatou amioga mamā ma le talaʻiga o le Malo, ua mafai ona tatou faaalia atu ai tatou te matuā faasilisiliina le suafa o le Atua i se tulaga e silisili ona maualuga. Seʻi o tatou alalaga atu e faapea: “Ia outou vivii atu ia Ieova, ina valaau atu ia i lona suafa; ia outou faailoa atu i nuu o ana galuega; ia outou taʻutaʻu atu ua [“faasilisiliina,” NW] lona suafa.” (Isa. 12:4) E mafai faapefea ona tatou faia o lenei mea?
4 E mafai ona tatou faaaogā avanoa uma e faalauiloa atu ai le suafa o Ieova ma mea uma ua suitulaga ai. Pe talaʻi fuafuaina pe lē fuafuaina, pe mai lea fale i lea fale, mai lea faleoloa i lea faleoloa, i le alatele pe talaʻi i le telefoni, o la tatou galuega talaʻi e faamamaluina ai Ieova. Pe a tatou maua ni tagata loto fiafia e faalogo mai, e tatau ona tatou faia ni tonu maʻoti e toe asiasi atu ma aʻoaʻo atili i latou e uiga ia Ieova. O lona uiga e tatau ona tatou tausisia e aunoa ma le faaletonu na tuutuuga ma finafinau i a tatou taumafaiga ina ia amataina ni suesuega faale-Tusi Paia. O se fiafiaga lea, auā i tausaga uma e faitau selau afe e ō mai ina ia iloa Ieova, ia faaaloalo, ma faapaiaina lona suafa mamalu.
5 O le faia ma le loto atoa o so tatou sao i le galuega o le faapaiaina o le suafa o le Atua, ua faaalia manino ai le itu o loo tatou tutū ai i le finauga lea na lagā e Satani i Etena. O le galuega aupito sili lenei ona lelei ma mamalu ua mafai ona tatou faia. Seʻi o tatou matuā faasilisiliina ma vivii ma le maelega i le suafa manaia o Ieova!—1 No. 29:13.