Ua Faateleina le Tapuaʻiga Moni i Europa i Sasaʻe
1 O Kerisiano o le uluaʻi senituri, sa avea o ni tagata talaʻi maelegā o le Malo. Sa latou olioli ina “ua faatoateleina i lea aso ma lea aso” le aofaʻi o faapotopotoga. (Galu. 16:5) O la latou talaʻiga ma le loto tetele na oo atu ai le tapuaʻiga moni i Asia, Aferika, ma Europa, ma iʻu ai i se seleselega matuā tele o tagata talitonu.
2 I lenei taimi o le iʻuga, ua faaauau ai pea ona faateleina le tapuaʻiga moni i atunuu o Europa i Sasaʻe. I atunuu sa faasāsāina ai e pulega a mālō la tatou galuega seʻia oo i le amataga o tausaga o le 1990 ma agaʻi mai ai, lea ua tatou tofo ai nei i se faatelega mataʻina. Ua faaalia i le 1999 Yearbook e faapea, i atunuu ia e lua o Rusia ma Ukraine, ua lipotia mai ai le sili atu i le taʻi 100,000 tagata talaʻi a le atunuu e tasi na auai i le faiva i le lautele. I oganuu e 15 o le vaega lea na taʻua muamua o le Soviet Union, e talu mai le 1991, e sili atu i le 220,000 tagata ua tuuina atu i latou lava ia Ieova ma ua papatisoina! O lenei faatelega vave ua manaʻomia ai ona faia le tele o Maota o le Malo ma Maota Fono fou faapea foʻi ma le toe faatetelēina o nisi fale o lālā.
3 E pei ona faasilasila atu i le Iunaite Setete i La Tatou Faiva o le Malo o Mati 1997 e faapea, o se vaega o le Faaputuga Tupe a le Sosaiete mo Maota o le Malo i atunuu tetele ua faaaogāina nei e faia ai ni nōgatupe a faapotopotoga i atunuu o loo iai se manaʻoga faanatinati mo nisi Maota o le Malo ae e lē lava ālamanuia ma e iai faafitauli matuā faigatā tau tamaoaiga. Mai ia Mati 1996 e oo ia Oketopa 1998, na faamaonia ai e le Sosaiete ni talosaga se 359 mo ni nōgatupe mai ofisa o lālā o loo vaaia atunuu e 11 o Europa i Sasaʻe, mo le fausiaina o Maota o le Malo. O faaputugā tupe o meaalofa tauofo, ua faaaogāina e faatau ai fanua ma mea faufale mo le fausiaina o Maota fou o le Malo ma fesoasoani ai i faapotopotoga e toe faafou fale o loo iai i le taimi nei. O āta o loo faaalia iinei, ua faailoa mai ai ia i tatou se vaaiga e faatatau i le auala o loo faaaogāina ai meaalofa tauofo i le Faaputugā Tupe a le Sosaiete mo Maota o le Malo i le Iunaite Setete faapea ma isi atunuu, ia ua aogā mo o tatou uso i Europa i Sasaʻe.
4 I le faagasologa o le 1998, na maua ai e Palakeria se faatelega e 12 pasene, ma sa matuā faafiafiaina ai uso ina ua faapaʻiaina lo latou uluaʻi Maota o le Malo ia Aperila o le tausaga lava lena. Na olioli Croatia i se faatelega e 4 pasene, ma i le taimi nei, o loo fausia ai e uso iinā nisi foʻi Maota o le Malo mo le faaauilumaina o le tapuaʻiga moni. I Hagakeri e tusa ma le 80 Maota o le Malo o loo faaaogāina e faapotopotoga e 144. O lona uiga la, mai le 235 faapotopotoga i lena atunuu, e 61 pasene ua iai so latou lava nofoaga o le tapuaʻiga. I Maketonia, ua faamaeʻaina ai e le ʻau faufale o Maota o le Malo ni maota fou se lua, ma e tele atu foʻi isi maota o loo faagasolo ona fausiaina. I le taumāfanafana o le 1999, na faamaeʻaina ai se Maota o le Malo e valalua i le aai laumua o Skopje. O lenei maota, e mafai ona faaaogāina e faapotopotoga e ono pe a itiiti mai. I le tausaga ua mavae i Rusia, o se faatatauga e sili atu i le 260 tagata na papatisoina i vaiaso taʻitasi! I le mulimuli i le faaaʻoaʻoga o loo faaaogāina e isi atunuu, ua faamaopoopoina ai nei e le lālā i Rusia ana Komiti o Faugāfale e 12 i la latou oganuu tele e lagolago ai le polokalame o le fausiaina o nisi Maota o le Malo i le lumanaʻi. I le vaega i mātū o St. Petersburg, o loo fausia ai nei i lena atunuu lo latou uluaʻi Maota o le Malo, lea o le a mafai ona ofi ai le 1,600 tagata. O le a aofia ai foʻi i lenei fale ni Maota o le Malo se lima ma e tofu ma nofoa e taʻi 200. Ina ia faamalieina ai manaʻoga faaleagaga o o tatou uso ma le toʻatele o tagata loto fiafia i Ukraine, e 84 Maota o le Malo ua maeʻa ona fausia, ma le isi 80 o loo faagasolo nei ona fausiaina.
5 Pe e lē olioli ai ea o tatou loto ona o lenei faatelega i Europa i Sasaʻe? E tusa lava po o fea tatou te nonofo ai, ae o le faatelega lea ua iai le tapuaʻiga moni ua faamanatu mai ai ia i tatou e faapea, e lē faailogaina e le Atua tagata, ma o lona onosaʻi o le a iʻu ai i le faaolataga mo “se motu o tagata e toatele.” (Faaa. 7:9; 2 Pete. 3:9) Maʻeu se faaeaga ua tatou maua o le faia o se sao itiiti e saosaolaumea ai i le tuputupu aʻe faaleagaga o isi, e oo lava ia i latou i nuu e mamao! Ua faamautinoa mai e le Faataoto 28:27 ia i tatou e faapea, “o le ua foai atu i le tagata mativa, e le mativa o ia.” O lo tatou loto mālilie e fesoasoani ina ia mafai ona totogia le tau o nei faugāfale, e iʻu ai ‘i le faatutusa’ o mea faitino, ma mafai ai e tagata uma ona tofo i le fiafia e maua e ala i le foaʻi atu, faapea le fiafia e maua ona o le vaai atu ua faatuputeleina le tapuaʻiga moni i le lalolagi aoao.—2 Kori. 8:14, 15; Galu. 20:35.
[Ata i le itulau 3]
Săcele, Romania
[Ata i le itulau 3]
Maardu, Esitonia
[Ata i le itulau 3]
Sevnica, Slovenia
[Ata i le itulau 3]
Tiszavasvári, Hagakeri
[Ata i le itulau 4]
Jūrmala, Latvia
[Ata i le itulau 4, 5]
Taurage, Lithuania
[Ata i le itulau 4, 5]
Belgrade, Yugoslavia
[Ata i le itulau 4]
Tallinn, Esitonia
[Ata i le itulau 5]
Prievidza, Slovakia
[Ata i le itulau 5]
Mátészalka, Hagakeri
[Ata i le itulau 6]
Vranov nad Topl’ou, Slovakia
[Ata i le itulau 6]
Ruma, Yugoslavia
[Ata i le itulau 6]
Tornakalns, Latvia