Pusa Fesili
◼ Po o e sauniuni mo se faalavelave faafuaseʻi?
I le lalolagi i aso nei, “o le tausaga ma le mea e tupu ai” ua masani ona māfua ai ni manaʻoga faafuaseʻi o ni togafitiga faafomaʻi, e aofia ai omiga ina ia talia se tuigā toto. (Fai. 9:11) Ina ia faamautinoa la ua tatou nofo sauni i se mea faapena e ono tupu, ua saunia ai e Ieova fesoasoani i ni auala se tele e ala mai i lana faalapotopotoga, ae e na te faatalitalia i tatou ina ia faia la tatou vaega. I le pito i lalo o loo iai se lisi o le a fesoasoani ia te oe.
• Ia tauaveina le pepa ua faatoʻā uma ona faafou o Faatonuga ua Muaʻi Saunia mo Fomaʻi ma Tuusaʻoloto Ai (Advance Medical Directive/Release).
• Ia faamautinoa o loo tauaveina e lau fanau le Identity Card ua faatoʻā uma ona faafou.
• Ia autalu le faaopoopoga o La Tatou Faiva o le Malo o Setema 1992, i le faataʻitaʻia lea o le auala e talanoa atu ai i fomaʻi ma faamasino e tusa ai ma togafitiga mo lau tamaitiiti.
• Ia autalu mataupu e faatatau i vaega o le toto ma togafitiga e sui aʻi le toto. (E lelei ona aofia ai: Le Olomatamata, Oketopa 1, 1994, itulau 31; The Watchtower, Iuni 1, 1990, itulau 30-31; Mati 1, 1989, itulau 30-31; Awake!, Tesema 8, 1994, itulau 23-27; Aokuso 8, 1993, itulau 22-25; Novema 22, 1991, itulau 10; ma faaopoopoga o La Tatou Faiva o le Malo, Setema 1992 ma Fepuari 1991. Ia teu i totonu o se faila ina ia faigofie ona maua ma faaaogā.)
• Ia filifili ma le faaeteete pe e te faatagaina le faaaogāina o masini e faataamilo ai le toto i fafo atu o lou tino ma toe faasau i totonu po o lou taliaina foi o isi vailaʻau o loo iai isi vaega o le toto.
• A o e leʻi malaga atu i le falemaʻi, pe a mafai ona fai, ia faailoa atu i toeaina ina ia mafai ona latou lagolago atu ia te oe ma faafesootaʻia le Komiti o Upufai Faafalemaʻi (HLC) pe a manaʻomia ai. Ae afai o se tamaitiiti, talosaga atu i toeaina ina ia vave faailoa atu i le HLC.
Ia Faamanino Atu Lou Teena o le Toto: Ua faaalia i lipoti faapea e iai nisi uso ma tuafāfine e faatali seʻia oo lava i le taimi mulimuli ona faatoʻā taʻu lea i fomaʻi o loo faia togafitiga faapea latou te lē mananaʻo i se toto. E lē fetaui lenei mea ma tulaga o fomaʻi ma e tuua ai oe i se tulaga lamatia o le faia i ai o se tuigā toto. Afai e iloa e fomaʻi ou talitonuga maumauaʻi ma ua lagolagoina lelei ou manaʻoga e ala i faamatalaga ua sainia o loo faailoa atu ai au faatonuga patino, e fesoasoani lea ia i latou e faagāsolo ai loa a latou togafitiga e aunoa ma le faatuai ma e masani ona avatu ai foi ia i latou nisi togafitiga faaopoopo e lē faaaogāina ai le toto e filifili ai.
Talu ai e mafai ona tupu faafuaseʻi se manaʻoga mo ni togafitiga faafomaʻi i so o se taimi lava, e masani lava ona tupu i se taimi e te leʻi faatalitalia, ia faia nei loa ni gaoioiga e leoleomalu ai oe ma lau fanau mai se tuigā toto.—Faata. 16:20; 22:3.