O le ā o le a E Fai Atu ai i se Tagata Hinitū?
1 E pei ona e silafia, e toʻatele tagata Hinitū o loo nonofo i atunuu eseese, ua iai foʻi nisi i lenei atunuu. O lona uiga, e iai se taimi mulimuli ane atonu o le a e feiloaʻi atu ai i se tagata Hinitū a o faagasolo lau faiva. Pe a e feiloaʻi i ai, o le a faapefea ona e taulimaina le talanoaga?
2 Ia Manatua Manatu Nei: Ua faapea mai ni misionare o ē na taulau manuia i le molimau atu i tagata Hinitū, e lē tau manaʻomia ona suʻesuʻe loloto i talitonuga faa-Hinitū ina ia avatu ai se molimau uigā. O se taulimaga faigofie ma faautauta o le upu moni, e masani ona maua ai se tali mautinoa. Talosaga i ai e te fia talanoa muamua i le ulu o le aiga. Afai e tali lelei mai, o le a sili atu la ona faigofie ona molimau atu i isi tagata o le aiga. I le amataga ia ʻalofia le fai atu e faapea o loo e avatua se feʻau e sili atu i mea o talitonu i ai lē ona le fale, pe faapea atu foʻi e te manaʻo e talanoa e uiga i le Atua moni e toʻatasi po o tusitusiga paʻia e sili ona leva. Talu ai e toʻatele tagata Hinitū e manatu i le Tusi Paia e faapea o le tusi a tagata o atunuu i Sisifo, e mafai la ona e taofia le manatu faaituʻau i le faamatala atu e faapea, e lē o lagolagoina e le Tusi Paia faiga faakolone pe faapea e sili atu le tasi lanu i lo le isi.
3 Ia Faaaogā Meafaigaluega Saʻo: E lua polosiua ua saunia faapitoa mo tagata Hinitū. Why Should We Worship God in Love and Truth? ua lomia i le gagana Gujarati ma le Punjabi. O le polosiua, Our Problems—Who Will Help Us Solve Them? ua lomia i isi gagana faaopoopo e 11 a Initia. E maua uma na polosiua i le faa-Peretania. Ua faamaonia foʻi le aogā o le polosiua “Faauta! Ou te Faia ia Fou Mea Uma Lava” ma le Po o Silasila Alofa mai ea le Atua ia i Tatou? a o molimau atu i tagata na tupuga mai o ni Hinitū. E mafai ona faaaogā ma le taulau manuia le polosiua o le Manaomia ma le tusi o Le Poto e faia ai suʻesuʻega faale-Tusi Paia.
4 Faataatia se Faavae e Taufai Ioe Faatasi i Ai: E lē faigatā ona mauaina se faavae e taufai ioe faatasi i ai ma tagata Hinitū. E latou te talitonu e faapea, ua tatou ola i le vaitaimi ua oo ai le amioleaga i lona tumutumuga ma faapea o le a tafiesea e le Atua faafitauli o le lalolagi e ala i se mala sili, ona sosoo mai ai lea ma se vaitaimi o le upu moni. E mafai lava ona e iloa le faigofie ona faafesootaʻi atu nei talitonuga i aʻoaʻoga a le Tusi Paia e uiga i aso e gata ai, le puapuaga tele, ma le lalolagi fou o loo fotuaʻi mai. Talu ai o le toʻatele o tagata Hinitū e manatu i le ola e faapea o se faasologa o faafitauli ia e leai ni vaifofō, e latou te fiafia ai i mataupu e faatatau i le olaga faaleaiga, solitulafono ma le saogalemu, ma le mea e tupu pe a oti. O ni taulimaga faaaʻoaʻo nei se lua e mafai ona e faataʻitaʻia.
5 E ono fetaui lenei i se tamāloa tausi aiga:
◼ “O loo oʻu asiasi atu i tagata o ē o loo popole e uiga i le tulaga o le olaga faaleaiga i le tele o atunuu i aso nei. O le ā e te manatu o le a fesoasoani i le tausia o le autasi o le aiga? [Faatali mo se tali.] Ua iloa e nisi tagata le mea o loo fai mai ai tusitusiga faa-Hinitū e uiga i le aiga, ae latou te leʻi maua lava se avanoa e faatusatusa ai lenei manatu ma mea o fai mai ai le Tusi Paia e uiga i le mataupu. Ou te fia faailoa atu ia te oe le manatu lea o loo i le Kolose 3:12-14.” Pe a uma ona faitau le mau, faaali i lē ona le fale le mataupu e 15 o le tusi o Le Poto ma faapea atu: “Ou te fiafia lava e faaalu sina taimi puupuu e ta te faitau faatasi ai lenei mataupu.”
6 Atonu o se tagata talavou o le a tali mai i lenei taulimaga:
◼ “E lē taumatea e te talitonu i le Atua. O le ā sou manatu o le ā le fuafuaga a le Atua mo i tatou?” [Faatali mo se tali.] Ona faitau lea o le Kenese 1:28, ma faapea atu: “I le tele o vaipanoa i le lalolagi, ua matuā faatoʻateleina ai le faitau aofaʻi o tagata ma pagātia i faafitauli. Pe e te manatu o le a faanaunau Lē na Foafoaina Mea e fesoasoani ia i tatou i le foʻiaina o o tatou faafitauli?” Pe a uma ona faalogo atu i le tali, faasino atu i se lomiga talafeagai.
7 Olioli i Iʻuga Mautinoa: Na faalatalata atu se alii talavou Hinitū e 22 tausaga i se tuafafine sa molimau atu i le maketi ma talosaga atu mo se suʻesuʻega faale-Tusi Paia. Na ia faamatala atu i le tuafafine e faapea, i le valu tausaga muamua atu, na ia faalogo atu ai o faia sa la talanoaga faale-Tusi Paia ma lona tinā. E ui lava sa faafiafiaina ai o ia i tali aogā mai le Tusi Paia i faafitauli o le fanau a tagata, ae sa lē fiafia lona tinā ma sa ia lagona e faapea, sa laitiiti tele o ia e na te sailia ai na o ia le upu moni. I le taimi nei ua avea ma tagata matua, ua ia manaʻo ai e aʻoaʻo atili. Sa leʻi toe faamaʻimauina e le alii talavou se taimi. I le na o le 23 aso, ae maeʻa ona ia suʻesuʻeina le tusi o Le Poto, ma i le na o le fā masina talu ona la feiloaʻi ma le tuafafine i le maketi, ae talosaga atu ina ia papatisoina o ia!
8 Na amata e se uso se suʻesuʻega ma se tamaloa Hinitū o lē na la feiloaʻi i luga o se nofoaafi. Sa oo ni faigatā i le faaipoipoga a le tamāloa. Sa iai foʻi sona faafitauli o le inu tele i le ava malosi. Sa malie le tamāloa e asiasi atu le Molimau ia te ia ma fetufaʻi i fautuaga a le Tusi Paia e faatatau i le olaga faaleaiga. Sa faatupu fiafia i le tamāloa aʻoaʻoga tau i amioga mamā a le Tusi Paia, ma na ioe o ia e faia se suʻesuʻega faale-Tusi Paia. Sa amata ona auai faatasi o ia ma lona aiga i sauniga. Mulimuli ane sa latou faailoa atu le upu moni i a latou uō ma tauaiga. I le taimi nei, o le toʻaono o nei tagata ua talia le upu moni!
9 O le finagalo o le Atua “ia faaolaina o tagata uma lava, ma ia oo ina iloa lelei le upu moni.” (1 Timo. 2:4) E aofia ai i lenei mea tane ma fafine o ē faapea e auai i se lotu e lē faa-Kerisiano, e pei o le lotu Hinitū. Afai o iai ni tagata Hinitū i lau oganuu, aisea e lē asiasi atu ai loa ia te i latou ma faaaogā nisi o fautuaga o loo avatua i lenei mataupu?