Faaaogā a Tatou Lomiga ma le Atamai
1 Na amata lo tatou faaaogāina maopoopo o lomiga i le faasalalauina o kopi e 6,000 o Iulai 1, 1879 o le mekasini Le Olomatamata. Talu mai lena taimi, sa lomia ai ma faasalalauina le matalasi anoanoai o lomiga i se aofaiga tele.
LE FAATATAUGA ATOA O MEAALOFA
2 I le faaiʻuga o Fepuari 1990 (Aperila 1990 i Samoa i Sisifo), na faamalamalamaina ai faapea o le a saunia mekasini ma tusi i tagata talaʻi ma ē naunau i le lautele i se faavae atoa faameaalofa, o lona uiga, e aunoa ma le fesili pe fautuaina e foai se meaalofa iloga o se tulaga mo le mauaina o se lomiga. Pe a ofoina se lomiga, o le a taliaina meaalofa tauofo e lagolagoina ai le galuega o le faalauiloaina o le tala lelei i le lalolagi aoao. Ua ia i tatou le faatuatua faapea o le a faamanuia e Ieova lenei faatatauga.—Faatusatusa Mataio 6:33.
TAULIMAINA O TULAGA I LE FANUA
3 O le a faaauau pea ona tatou faaaogāina le Mataupu mo Talanoaga e faagaee ai le mataʻai. I mea e leai se naunau e faaalia ai, e lē manaomia fua ona ofo i ai se lomiga. Tatou te lē mananao e maimau so o sa tatou lomiga i le ofoina ia i latou e lipi ma se naunau. I le isi itu, e mafai ona ofo i le mea e faaalia ai le naunau ma ioe i ai lē ona le fale e faitau le lomiga. Tatou mananao e faaaogā a tatou lomiga ma le atamai.
4 O loo mulimuli mai nisi o mea atonu e te faia pe a maeʻa ona folasia o le lomiga: “Afai e te olioli e faitau lenei tusi, ou te fiafia e tuu mo oe.” Atonu e fesili lē ona le fale: “E fia lona tau?” E mafai ona e tali atu: “Matou te lē o auai i se galuega faapisinisi. Matou te lē faatauina lenei lomiga. O le galuega o loo matou faia i lo tou vaifale i le asō o loo tauofo ona fai i atunuu e 212 i le faataamilo o le lalolagi e fesoasoani i tagata e aʻoaʻo le ala i le ola e faavavau. Afai e te finagalo e foai se meaalofa agai i lenei galuega, o le a ou fiafia e talia.”
5 Pe a ofoina mekasini, e mafai ona e faatu ni fesili e uiga i se mataupu iloga ona faapea lea: “Ou te manao e te matauina auiliiliga i lenei mataupu. Afai e te finagalo e faitauina nei mekasini e lua, ou te fiafia e tuu i laua ma oe.” Afai e taliaina, e te ono faaopoopo atu: “Ua ou fiafia ua mafai ona faaoo atu nei faamatalaga ia te oe. Ou te manatu o le a ē iloaina le aogā moni o le mataupu. O le mea moni, ou te manao e toe sau i le vaiaso e sosoo ai e taea sou manatu. O le a e matauina o loo lomia Le Olomatamata i gagana e 107 ma ua faasalalauina toeitiiti 14,000,000 kopi i le faataamilo o le lalolagi. Ua lagolagoina uma lenei galuega i meaalofa tauofo. Afai foi e te manatu e fai sina tauofo itiiti agai i lenei galuega tau aʻoaʻoga, matou te fiafia e talia.”
6 I nisi tulaga, atonu e faamaasiasi le talanoaina o le mataupu o tauofo mo la tatou galuega i le lalolagi aoao. Mo se faaaʻoaʻoga, e ono fesili mai lē ona le fale: “E tou te tuu fuaina?” Tatou te ono faapea atu: “Afai e te manao e faitau le lomiga ma fiafia e maua, ioe, e ma oe. Ou te fia oso mai i le vaiaso e sosoo ai e talanoaina mea ua ta feutagai ai ma taʻu atu atili e faatatau i la matou galuega i le lalolagi aoao.” E mafai ona faailoa i lē ona le fale i asiasiga mulimuli ane le auala ua faatupeina ai la tatou galuega.
7 Pe atonu e talia vave e lē ona le fale le lomiga ma faapea mai, “Faafetai lava.” E mafai ona e tali atu: “E talia fiafia oe. Ou te iloa o le a ē olioli i ai. E toatele o loo tau manatu pe faapefea ona faatupeina lenei galuega, ona o loo matou taulimaina i le lalolagi aoao. O le anoanoai o ē talia a matou lomiga ua faaleoina le sapaitalia mo le mea ua latou aʻoaʻoina ma tauofo mai sina meaalofa faatauvaa ina ia mafai ai ona faasalalauina atili. Afai e faapea ona faia e tagata, matou te talia ma le fiafia lea.”
PE I AI SE NAUNAU MONI?
8 E manino e lē o la tatou fuafuaga ia soona faasalalauina lomiga. Tatou te mananao i le lomiga ia taulau lona faamoemoe fuafuaina, o le fesoasoani i tagata loto faamaoni e aʻoaʻo atili e uiga i fuafuaga ofoofogia a Ieova. E ono maimau le tuu o lomiga ma tagata o ē e aunoa ma se talisapaia mo mea faaleagaga. (Epe. 12:16) O le fuatele mai o le faasalalauina o lomiga e faalagolago i lo tatou tomai e mataʻi le naunau moni. E mafai faapefea ona folasia o sea naunau? O le agalelei ma le loto malie lua te felafolafoai o se faailoga lelei. Pe o le uai mai a o e saunoa, tali mai i fesili, ma faaleoina se manatu e faaalia ai le aafia i le fefaaaliaiga. O le talanoa mai ia te oe i se uiga faaaloalo, faituaoi e fautuaina ai se tulaga agalelei. O le mulimuli mai a o e faitauina le Tusi Paia e faaalia ai le faaaloalo mo le Afioga a le Atua. E masani lava, ona fesoasoani le fesili i ai pe o le a latou faitauina le lomiga ua ofo atu. Atonu foi, e te fautuaina se toe asiga e faaauau ai le talanoaga. O se tali maumauai o se faamaoniga atili o lo latou naunau. A ē matauina na faamaoniga o le naunau faamaoni, e aliali mai ai o le a faaaogā lelei e le tagata so o se lomiga ua taliaina.
9 O lenei fetuutuunaiga i la tatou auala o le galuega ua saunia atili ai le faamaoniga faapea ‘tatou te lē faafilogia le afioga a le Atua.’ (2 Kori. 2:17) E faamaonia ai foi tatou te vavae ese mai le lalolagi.—Ioane 17:14.
10 Faatasi ma le lalata mai o le faaumatiaga o Papelonia Tele, o loo tuputupu aʻe pea omiga faasaga i elemeni uma a lotu. O lo tatou popolega autu ia faaauau pea ona agai i luma e aunoa ma le faalavelavea le galuega talaʻi o le Malo e matuā tāua i le lalolagi aoao, ma aumaia ai le toatele i le faaolataga.—Mata. 24:14; Roma 10:13, 14.