Faasologa o le Sauniga o le Auaunaga

Vaiaso e Amata ia Fepuari 14

Pese 12 (113)

10 minu: Faasilasilaga a le faapotopotoga. Faasilasilaga e fili mai i La Tatou Faiva o le Malo.

15 minu: “‘Ia Talaʻi le Upu . . . ma le Faanatinati.’” Faatapulaa upu tomua ia lē silia i le minute, ona sosoo ai lea ma le talanoaina o le matāʻupu i fesili ma tali, ia faaaofia ai ma ni faamatalaga mai le tusi Our Ministry, itūlau 170. Fai atu ni fautuaga aogā i le auala e faateleina ai le faia o se sao i le galuega talaʻi i le vaitaimi o le tau e timu ai.

20 minu: “Le Auala e Ati Aʻe ai le Tomai e Fefulisaʻi Ai.” Lauga ma se faataʻitaʻiga. Faamatala le māfuaʻaga e matuā tāua ai le tomai e fefulisaʻi ai i le faiva ma le auala e maua ai lea tomai. Ia talanoa e ni tagata talaʻi tomai se toʻalua le auala e sauniuni ai mo le faiva e ala i le mulimuli i laasaga ia o loo faaauivi mai i le palakalafa 3 o le matāʻupu, ona sosoo lea ma se faataʻitaʻiga o a la taulimaga.

Pese 28 (224) ma le tatalo faaiʻu.

Vaiaso e Amata ia Fepuari 21

Pese 10 (82)

10 minu: Faasilasilaga a le faapotopotoga. Tala o le tupe.

15 minu: “‘O Fafine o Loo Galulue i la le Alii.’” Faapuupuu upu tomua ia lē silia i le minute, ona sosoo lea ma le talanoaina o le matāʻupu i fesili ma tali. Ia faaaofia ai ni tala mai Le Olomatamata o Setema 15, 1996, itūlau e 14-15, palakalafa 18-19. Ia faamālō atu ma le māfana i tuafāfine ona o la latou lagolagosua ma le lotomalie, i auaunaga aogā ua latou faia mo isi, faapea lo latou māʻelegā i le galuega talaʻi.

20 minu: “O le ā e Mafai Ona Fesoasoani ia i Tatou ia Tūmau i le Faatuatua?” Lauga e faia e se toeaina. Ua tatou ola i taimi faigatā, ma e manaʻomia e i tatou uma lava se fesoasoani i nisi o auala. Ia autalu po o ā mea e mafai ona fai e toeaina ma auauna o le faiva ina ia faamalosiʻau ai ia i latou ua faavaatuʻia ona o faafitauli e lotovaivai ai. (Tagaʻi i le ulutala “Leoleoga e Atiina aʻe Ai” i Le Olomatamata o Setema 15, 1993, itūlau e 21-23.) Faamatala pe mafai faapēfea ona tatou faalāʻeiʻau le tasi i le isi i ni auala o le a faamautūina faaleagaga ai i tatou.—Roma 1:11, 12.

Pese 16 (143) ma le tatalo faaiʻu.

Vaiaso e Amata ia Fepuari 28

Pese 5 (46)

10 minu: Faasilasilaga a le faapotopotoga. Faamanatu i tagata uma ina ia tuuina atu a latou lipoti o le auaunaga mo Fepuari. Ia autalu puupuu ia “Laasaga Faigofie e Fa” mo le faaaogāina o sāvali e amata ai ni talanoaga ia e faaauivi mai i le itūlau e 4 o La Tatou Faiva o le Malo o le masina ua mavae atu. Faataʻitaʻi mai pe faapēfea ona faaaogā le sāvali e faatatau i se Lalolagi Fou Filemu e faatomua atu ai le tusi o Le Poto. Pe a uma ona fai atu fesili mai le palakalafa amata o le sāvali, ona faitau lea o le palakalafa muamua i le itūlau e 3, e aofia ai le Salamo 37:29. Pe a faaalia le fiafia, ona suʻe lea o le tusi o Le Poto i le itūlau e 5, faitau le pusa, ma ofo se suʻesuʻega. I lenei masina e ao i tagata uma ona faia se taumafaiga faapitoa e amata ni suʻesuʻega fou faale-Tusi Paia i ʻāiga.

5 minu: Pusa Fesili. Lauga a se toeaina.

12 minu: Lagolagoina le Galuega o le Fausiaina o Maota o le Malo. Lauga a se toeaina. Muamua, talanoa i le Faaputugātupe a le Sosaiete mo Maota o le Malo e pei ona faamatalaina i le tusi o Setema 14, 1999, i faapotopotoga uma. Autalu le fuafuaga o le faaputugātupe ma le faaeaga ua ia i tatou i le faia o foaʻi agaʻi i ai. I le oganuu o le lālā o Samoa, e iai nisi galuega o Maota o le Malo ua amataina nei ma o isi galuega o le a lē toe mamao ona amata lea. E tatou te talisapaia galuega fitā a uso o loo faamaopoopoina nei galuega ma o loo auauna i komiti o faugāfale o Maota o le Malo. E faaopoopo i a tatou meaalofa ma tatalo, e mafai e le toʻatele o i tatou ona lagolagoina a latou taumafaiga i le tauofo e faia se sao i le galuega o le fausiaina. Faatalanoa nisi o ē na faia se sao i le fuafuaga o le fausiaina o se Maota o le Malo, ma ia aofia ai i a latou faamatalaga le ʻoliʻoli na latou tofo i ai.—Tagaʻi i Le Olomatamata o Iuni 1, 1999, itūlau 18-19, palakalafa 15-16.

18 minu: “Talaʻia o le Tala Lelei ma le Mautinoa.” Fai ni upu tomua e sau mai le loto e faaalu ai se lua pe tolu ni minute e faavae i le matāʻupu faapea ma mau o loo taʻua ma sii mai ai i le palakalafa 1 ma le 2. Ona talanoa loa lea o le palakalafa e 3-12 i fesili ma tali.

Pese 3 (32) ma le tatalo faaiʻu.

Vaiaso e Amata ia Mati 6

Pese 2 (15)

5 minu: Faasilasilaga a le faapotopotoga.

10 minu: Manaʻoga o le faapotopotoga.

10 minu: “Uaʻi Totoʻa i le Auala o E Faalogo Ai.” E talanoaina e se ulu o se ʻāiga faatasi ma lana avā ma le fanau le mea e mafai ona latou faia ina ia maua atoatoa ai aogā mai sauniga a le faapotopotoga, fonotaga, ma tauaofiaga. E na te lagona e faapea e mafai e le ʻāiga atoa ona uaʻi lelei atu. Latou te autaluina fautuaga o loo lisi mai ai ma talatalanoa i se auala e faatatauina ai fautuaga taʻitasi, e aofia ai le manaʻomia ona faia nisi talanoaga atili e uiga i mea ua aʻoaʻoina. E latou te talatalanoa i le auala e latou te ola ai e tusa ma la latou faaiʻuga ina ia lē misia so o se sauniga po o ni polokalame o se tauaofiaga po o fonotaga pe afai e mafaia.

20 minu: “Talaʻia o le Tala Lelei ma le Mautinoa.” Pe a uma sina autaluga puupuu o le talanoaga i le vaiaso ua mavae o uluaʻi palakalafa e 12 o le faaopoopoga, ona talanoa lea i fesili ma tali le palakalafa e 13-24. Ia faaaogā lelei ia mau o loo sii mai ai ma mau o loo taʻua ai.

Pese 8 (53) ma le tatalo faaiʻu.