Le Auala e Ati Aʻe ai le Tomai e Fefulisaʻi Ai
1 O se tasi uiga o le upu “fefulisaʻi” o le “tautala atu i se tasi ina ia taaʻina ai ana gaoioiga po o ona manatu.” Ina ia e uigā atili i le faiva, e manaʻomia ona e atiina aʻe le tomai e fefulisaʻi ai ma i latou e te feiloaʻi atu i ai. (Galu. 17:2-4) Ae e mafai faapēfea ona e ati aʻe lenei tomai?
2 E Amata i le Manatunatu Loloto: Pe a suʻesuʻeina upu moni o le Tusi Paia, o le a e iloa ai le aogā o le mafaufau i le matāʻupu. Pe a fai si lavelave o manatu o loo iai, faaalu sina taimi e fai ai se sāʻiliʻiliga ma manatunatu loloto i tali. Sāʻili ina ia malamalama manino e lē na o le faamatalaga ua aumai ae faapea foʻi ma māfuaʻaga faale-Tusi Paia o na faamatalaga.
3 E Aofia ai le Sauniuni mo le Faiva: Mafaufau i le auala o le a e faamatala atu ai le upu moni i ituʻāiga eseese o tagata. Ia fafau aʻe se fesili faatupu manatu e faagaee ai le naunau. Ia filifili se auala e faafesootaʻi atu ai se manatu faale-Tusi Paia ma fefulisaʻi i ai. Ia nofouta i teteega e ono lāgā ma mafaufau i le auala e talanoaina ai. Fili se manatu tāua mai le lōmiga o loo ofoina lea e sili ona talafeagai mo le tagata.
4 Mulimuli i le Faaaʻoaʻoga a Iesu: Ua faataatia e Iesu le faaaʻoaʻoga aupito sili ona lelei o le fefulisaʻia ma le uigā o manatu mai le Tusi Paia. Ina ia iloiloina le auala na ia aʻoaʻo atu ai, manatunatu i le tala o loo i le Luka 10:25-37. Mātau le faasologa lenei: (1) Tataʻi manatu i le Tusi Paia pe a taliina fesili a tagata. (2) Valaʻaulia i latou e faailoa mai ni o latou lava manatu, ma ia faamālō i ai pe a latou faia mai ni tali uigā. (3) Ia faamautinoa ua taulaʻi atu i le fesootaʻiga o le fesili ma le Tusi Paia. (4) Faaaogā se tala faatusa e pāʻia ai le loto o le tagata ina ia faamautinoa ai ua malamalama i le aano moni o le tali.—Tagaʻi i Le Olomatamata o Novema 1, 1986, itūlau 21-22, palakalafa 8-10.
5 Faaaogā le Meafaigaluega ua Tuuina Mai ia i Tatou: O le tusi Reasoning From the Scriptures ma Le Auala e Amata ma Faaauau ai Talanoaga Faale-Tusi Paia na lōmia e avea o ni tusi mo le faiva i le fanua. O faatomuaga o loo iai, o tali i manatu e ono taofia ai talanoaga, ma manatu e fefulisaʻi ai ua fesoasoani ia i tatou e ati aʻe ai se tomai e fefulisaʻi ai. O le tusi Reasoning ma le tamaʻitusi Amata ma Faaauau ai Talanoaga o ni meafaigaluega tāua e ao ona tatou feaveaʻi e lē aunoa i le auaunaga ma ia aua neʻi faatalatū e faaaogā pe a faia ni talanoaga faale-Tusi Paia. Autalu itūlau e 7-8 o le tusi Reasoning ina ia iloa ai le auala e sili ona aogā e faaaogā ai.
6 O le atiina aʻe o lou tomai e fefulisaʻi ai o le a faaleleia ai lou tomai i le galuega o le talaʻi ma le aʻoaʻo atu. O le a iʻu ai lenei mea i le ʻoa o faamanuiaga mo oe ma i latou o ē e te feiloaʻi atu i ai i le faiva.