E Tatou te Talaʻia le Tala Lelei

¹ Maʻeu se faaeaga mātagōfie ua ia i tatou i le avea o ni ē tauaveina le “tala lelei [o] le manuia!” (Roma 10:15) Ua tatou tauaveina se feʻau e faafouina ai e tufa atu i tagata o ē o loo siʻomia i tulaga fesouaʻiina ma le leai o se faamoemoe. E mafai faapēfea ona tatou fesoasoani ia i latou ia iloa o loo tatou ‘talanoa atu i se tala lelei’?—Isa. 52:7.

² Ia Sauniuni se Feʻau Mautinoa: O a tatou talanoaga i le faiva o le a maua ai se aafiaga lelei pe afai e tatou te taulaʻi atu i mea e ati aʻe ai. O le mea lea, pe a sauniunia a tatou taulimaga ma autaluina le lōmiga lea o le a tatou ofoina, e manaʻomia ona tatou faamatilatila ia vala lelei o le feʻau. O le faailoa atu ma le mautinoa ma le aasa o lo tatou faamoemoe e faavae i le Tusi Paia, e mafai ai ona tatou faatalitalia ia iʻuga e faalāʻeiʻauina ai.—Faata. 25:11.

³ E ui lava e momomo o tatou loto pe a faamatala mai e tagata auala o loo aafia ai i latou i tulaga e sili atu ona leaga i le lalolagi, ae ao ona tatou faasino atu ia i latou le vaifofō moni i faafitauli o tagata, le Malo lea o le Atua. E ui lava o loo talanoa e uiga i le oo mai o le “aso e taui ai ma sui” a Ieova, ae tatou te mananaʻo e faailoa atu le uiga moni o lenei “tala lelei i e ua tigaina.” (Isa. 61:1, 2) E mafai ona tatou toe faamautinoa atu ia i latou o faalogologo mai ia i tatou e faapea, o mea uma lava e faia e Ieova o le a iʻu i le aumaia ai o le fiafiaga sili ma le iʻuga aupito sili ona lelei ua mafai ona maua.

⁴ Molioo Atu le Upu Moni ma le ʻOliʻoli Moni: Pe a mātauina mai e tagata o tatou foliga fiafia ma se leo mautinoa, o le a sili atu ona latou naunau e faalogo. Pe a atagia atu ia i tatou se vaʻaiga mautinoa, o le a manatu loa la tatou ʻaufaalogologo e faapea, e tatou te “olioli i le faamoemoe.” (Roma 12:12) I lea, atonu o le a sili atu ai ona latou naunau e talia le tala lelei. E mautinoa lava, e iai se māfuaʻaga lelei e tatou te faaalia ai pea se uiga mautinoa, ma le ʻoliʻoli i vala uma o la tatou faiva.

⁵ I le avea o ni faifeʻau o le tala lelei, e tatou te faia ai mea e sili mamao atu na i lo o le tau ina faailoa atu. O la tatou talaʻiga e faailoa atu ai se faamoemoe mautinoa e uiga i se olaga e sili atu ona lelei i le taimi nei faapea ma le lumanaʻi. (1 Timo. 4:8) A o tatou talanoa atu i tagata taʻitoʻatasi, o le a atagia atu ia tatou faamatalaga le uiga mautinoa o loo i o tatou mafaufau, ma o le a fesoasoani ai i tagata e talia le tala lelei. O le uaʻi atu i mea tatou te fai atu ai ma le auala tatou te molioo atu ai, seʻi o tatou uunaʻia ai tagata lotofaamaoni e talia le tala lelei fiafia lea o loo tatou talaʻia!