‘O le ā se Mea e Mafai Ona Ou Faia?’
1 ‘O le ā se mea e mafai ona ou faia?’ E lē taumatea, o le fesili lena sa i mafaufau o sui o se vaega toʻaitiiti o le suʻesuʻega faale-Tusi Paia lea na faamaopoopoina e Charles Taze Russell i vaitausaga mai le 1870 i le 1879. A o agaʻigaʻi i luma lo latou malamalama i le finagalo o le Atua, atonu sa tau mānatu na uluaʻi tagata aʻoga o le Tusi Paia i se mea e mafai ona latou faia e fesoasoani ai i isi e aʻoaʻoina fuafuaga a le Atua. Ina ia oo atu i le lalolagi atoa le malamalama o le Tusi Paia lea na latou maua, e mautinoa lava o se galuega sa matuā telē.
2 O se mea tatou te fiafia ai, ona sa latou taulau manuia i le faafetaiaʻia o lena luʻi. Faapēfea? Sa faia e tagata taʻitoʻatasi se vaega e foliga mai e itiiti, o lea ua oo ai ina lauiloa Molimau a Ieova i le lalolagi aoao—o se faalapotopotoga e toetoe lava ono miliona o ē folafola le Malo o loo auauna i ni faapotopotoga e 90,000 i atunuu ma atumotu e 234!—Isa. 60:22.
3 Ofo Atu Lau Lagolagosua Atoatoa: E matuā tāua lava mo i tatou taʻitoʻatasi ona faia se sao i le galuega e sili ona telē lea na valoia e Iesu o le a faia i nei aso e gata ai. (Mare. 13:10) E mautinoa lava e lē mafaia ona tuu atu lenei galuega i le na o se aofaʻiga faatapulaa o toeaina; e lē na o paeonia foʻi e paʻū i ai le galuega talaʻi. O le mea moni, o Kerisiano tuuina atu uma lava e iai se vaega tāua e faia. E mafai e i tatou uma lava ona faia se sao i nisi o vala o le galuega talaʻi. (1 Timo. 1:12) Po o le ā lava le tele tatou te faia ai lenei mea, tatou te maua ai aogā mo i tatou lava faapea ma isi.—1 Timo. 4:16.
4 E mafai foʻi e tagata taʻitoʻatasi ona ofo atu se lagolagosua atoatoa i lo tatou ʻauuso Kerisiano i isi auala iloga. E mafai ona tatou lagolagoina sauniga a le faapotopotoga e ala i le auai e lē aunoa ma faia ai ma le aasa se sao. (Sala. 122:1, 8, 9) E mafai ona tatou faia la tatou vaega ina ia tausia ai le mamā tauamio o le faapotopotoga. E mafai ona tatou saunia se lagolagosua tau tupe mo le galuega i le lalolagi aoao e tusa ai ma mea o loo tatou maua. E mafai ona tatou faia se vaega i le faamamāina o le Maota o le Malo. E mafai e tagata uma ona faatupu se agaga māfana o le alofa ma le autasi i le faapotopotoga e ala i le fesoasoani atu i ē fou, le ʻautalavou, faapea ma tagata matutua.—Kolo. 3:12, 14.
5 Atonu e te fesili mai la, ‘O le ā se mea e mafai ona ou faia?’ E ui lava atonu e foliga mai e laʻitiiti sina mea e mafai ona e faia, ae o le faia o lau vaega, ua e saosaolaumea ai i le iai o se faapotopotoga mālosi, olaola, ma le mālōlōina. I lea, ua faia ai e i tatou uma lava se sao e matuā tāua i le faamamaluina o le suafa o Ieova!