Po o Oe o Sē Folafolaina le Malo e Lē Aunoa?
1 Sa tatou olioli uma lava ina ua iloa e faapea, na ausia e Samoa se tumutumuga matuā maualuga e 399 o le ʻautalaʻi ia Aokuso 1999. O le mea moni o se taumafaiga autasi ma le maumauaʻi! E manino mai, i masina mulimuli ane, sa iai ni faigatā i nisi o nei tagata talaʻi i le avea o ni ē folafolaina le Malo e lē aunoa, talu ai o le faatatauga faalemasina o tagata talaʻi talu mai lena taimi ua tusa ma le 374. E faaalia ai i lenei mea e faapea, e 1 mai le 16 tagata talaʻi sa leʻi iai se lipoti i le faia o se sao i le faiva i masina uma. Ua matou talitonu o le faalāʻeiʻauga o loo mulimuli mai e mafai ona fesoasoani i le foʻiaina o lea tulaga.
2 Talisapaia le Faaeaga: E tatau ona matuā loloto lo tatou talisapaia mo le faaeaga ua tatou maua e tufa atu le tala lelei o le Malo i isi. O lenei galuega ua faafiafiaina ai le finagalo o Ieova ma e fesoasoani foʻi i ē lotofaamaoni e aʻoaʻoina le ala i le ola. (Faata. 27:11; 1 Timo. 4:16) O le molimau atu e lē aunoa e atiina aʻe ai lo tatou poto masani i le faiva ma iʻu ai i lagona olioli ma le faataunuuina o se mea.
3 Lipoti le Galuega: O nisi o ē auai i le auaunaga i le fanua ua faatalalē i le lipotiina atu o la latou galuega i le taimi e tatau ai. Aua lava neʻi ia i tatou le lagona e faapea e lē aogā ona lipoti atu la tatou galuega. (Faatusatusa i le Mareko 12:41-44.) Ma le mautinoa lava, e tatau ona lipoti atu mea na tatou faia! O le iai o se faasologa i le fale, e pei o le faaaogāina o se kalena, mo le faamaumauina o taimi na faaalu i le faiva, o le a avea o se mea e faamanatu ai pea ina ia vave ona faia se lipoti saʻo i le faaiʻuga o masina taʻitasi.
4 Avatu le Fesoasoani Manaʻomia: Atonu e manaʻomia ona faaleleia fuafuaga a le faapotopotoga ina ia fesoasoani atu ia i latou o ē o manaʻomia se fesoasoani ina ia faia ai pea se sao i le faiva. E ao i le failautusi a le faapotopotoga ma faisuʻesuʻega o suʻesuʻega tautusi ona fuafuaina mo ni tagata talaʻi tomai e avatua le fesoasoani. Afai e iai sau fanau po o nisi tagata suʻesuʻe o le Tusi Paia o ni tagata talaʻi e leʻi papatisoina, aʻoaʻo i latou ina ia lipoti atu a latou galuega i masina uma.
5 Ia manatua le talaʻaga o le soifuaga, “Loto Faafetai mo se Olaga Umi i le Auaunaga ia Ieova,” i Le Olomatamata o Oketopa 1, 1997. O le tuafafine o Ottilie Mydland mai Nōue na avea ma tagata talaʻi e lē aunoa o le tala lelei a o leʻi papatisoina o ia i le 1921. I le fitusefulu ono tausaga mulimuli ane, i le 99 o ona tausaga, na faapea mai ai o ia: “Ou te fiafia ona o lea lava e mafai ona ou talaʻi pea.” Maʻeu se uiga mataʻina e tatau ona faataʻitaʻi i ai auauna uma a Ieova!