Ia Faamautinoa E te Toe Foʻi!
1 “E ese le manaia o le talanoaga! E tatau lava ona ou manatua ou te toe foʻi e asi.” Pe sa e faia se faaupuga faapena, ae mulimuli ane ua galo le mea e nofo ai le tagata? Afai o lea, e na o le pau lava le auala e mafai ai ona e faamautinoa lou toe foʻi atu, o le tusia lea i lalo.
2 Tusi i Lalo Mea Uma: A o manatua lelei pea i lou mafaufau se talanoaga na e faia ma se tagata lotofiafia, faaalu sina taimi e tusi ai i lalo ia faamatalaga tāua uma e uiga i le asiasiga. Ia tusi i lalo le suafa o le tagata ma le auala o le a e iloa ai o ia. Tusi i lalo lona tuatusi (po o se faamatalaga i foliga o le fale ma le nofoaga o i ai) ae aua le taumateina—ia faamautinoa e saʻo mea ua e tusia. Tusi i lalo le mataupu na lua talanoa i ai, ni mau na e faitauina ma ni lomiga na tuu ai.
3 Afai na e faia se fesili i le tagata ina ia taliina i le isi au asiasiga, ia tusi i lalo. Pe e iai se mea na e iloa e uiga i le tagata, lona ʻāiga, po o lana lotu? Afai o lea, ia faia se faamaumauga o lena mea. O le isi la taimi e te asiasi atu ai, o lou toe taʻua o na mea o le a faaalia atu ai lou naunau tōtino i le tagata. Mulimuli lava, ia tusi le aso ma le taimi na e uluaʻi asiasi atu ai ma le aso na e taʻu atu e te toe foʻi atu ai. O le faia o faamaumauga saʻo, o le a e maua ai ni faamanatuga manino ma e foliga mai o le a lē galo ai lau folafolaga e te toe foʻi atu.—1 Timo. 1:12.
4 E uma loa ona fai au faamaumauga, ona tuu faatasi lea ma isi au mea uma mo le auaunaga i le fanua—ato tusi, Tusi Paia, tamaʻitusi o le Amata ma Faaauau ai Talanoaga, tusi Reasoning, ma lomiga—ina ia iai pea ma faigofie ona maua. E sili pe a faamaumau fale e leʻi maua i ai ni tagata i pepa faamaumau o le galuega i lea fale i lea fale e ese mai au pepa na e te faaaogāina e faamaumau ai au toe asiga. O le mea moni, e tusa lava po o ā taumafaiga o loo e faia ina ia tausia ai se faamaumauga saʻo o toe asiga, a o le mea tāua o le faamautinoa lea ua e toe foʻi e asia le tagata!
5 Mafaufau i le Tagata: A o e sauniuni mo le faiva, ia toe autalu au faamaumauga o toe asiga. Mafaufau i tagata taʻitoʻatasi ma po o le ā le faafeiloaʻiga e sili ona lelei e te ono faaaogāina pe a faia le asiga e sosoo ai. Mafaufau i se auala e faatupu ai le naunau fiafia o le tagata e faia se suʻesuʻega faale-Tusi Paia i le ʻāiga. O na fuafuaga e mafai ona faateleina ai lou taulau manuia i le avea o se faifeau o le tala lelei ma ona o lea, o lou lava ʻoliʻoli tōtino.—Faata. 21:5a.
6 O lea, o se isi taimi e te maua ai se tagata e fia faalogo mai, aua neʻi e manatu faapea e faigofie lava ona e manatua le asiga. Na i lo o lea, ia tusi i lalo, ia toe tilofaʻi au faamaumauga, ma mafaufau pea i le tagata, ma ia faamautinoa e te toe foʻi!