‘Tatou te Le Mafaia Ona Le Tautala’
1 O loo matuā mataʻitūina e Iesu Keriso le galuega talaʻi. (Mata. 28:20; Mare. 13:10) E ui o loo iai le toetoe lava ono miliona tagata tiotio o ē folafola le tala lelei o loo avatua se molimau i atunuu e 234, ae lē tatau ai ona tatou manatu e faapea ua uma la tatou molimau atu. E ‘tatou te le mafaia ona le tautala’ e uiga i mea ua aʻoaʻoina ai i tatou seʻiloga lava ua fetalai mai le Atua ua uma le galuega.—Galu. 4:20.
2 Ia Faalagolago i le Agaga o le Atua: Ua faaaogā e Satani le tele o omiga e faavaivaia ai i tatou. (Faaa. 12:17) Ua faapuapuagatia foʻi i tatou e o tatou lava tino lē lelei atoatoa i le tele o faafitauli. O mea faapena e mafai ona faatosina ese ai o tatou manatu mai le galuega talaʻi e sili ona tāua. Ae peitaʻi, afai tatou te faatuatua ia Ieova, o le a fesoasoani lona agaga ia i tatou i le faafesagaʻia o so o se toʻatugā.
3 Ina ua ogaoga sauāga na oo i le faapotopotoga Kerisiano o le uluaʻi senituri, na tatalo atu uso i le Atua mo se fesoasoani ina ia tautala atu ai pea i lana afioga ma le matuā lototetele. Sa tali mai Ieova i a latou tatalo, i le faatumuina o i latou i lona agaga ma tuuina atu ia i latou le maelega ma le maumauaʻi e manaʻomia ina ia faaauau ai pea ona talaʻi. O le iʻuga, na latou faaauau pea e leʻi mapu i le folafolaina atu ma le lototetele o le tala lelei.—Galu. 4:29, 31; 5:42.
4 Aua le Matataʻu i Tala e Faalotovaivai Ai: O manatu taatele po o faasalalauga taufaaleaga e ono oo mai ai ni āuga e faamataʻuina ai i tatou. Ae peitaʻi, ia manatua faamatalaga lototetele a Peteru ma isi aposetolo i le ʻau Saniterini, lea o loo faamauina i le Galuega 5:29-32. E pei ona taʻutino atu e le aʻoaʻo Tulafono o Kamalielu e faapea, e lē mafai ona faalēaogāina le galuega a le Atua. E lē o faataunuuina i so tatou lava malosi. O lenei galuega silisili o loo lagolagoina e le Atua, ma e na o ia e mafai ona faataunuuina!—Saka. 4:6.
5 Seʻi o tatou matuā ole atu ia Ieova i aso taʻitasi mo le fesoasoani a lona agaga ia i tatou ina ia folafola atu ma le maelega le tala lelei. Seʻi o tatou fai atu e pei ona sa faia e Ieremia e faapea, o le feʻau o le Malo ua pei o se afi e mumū ua punitia i o tatou ivi. (Iere. 20:9) E lē mafai la ona tatou lē tautatala!