“Ia Faia Mea Uma Ina ia Atiina Aʻe Ai”
1 I le feagai ai ma o tatou uso, e tatau ona tatou faia mea lelei mo le atiina aʻe o i latou. O le uiga o lenei mea, o le manatu mamafa lea i le puipuia o o latou manaʻoga faaleagaga. Afai tatou te auai i se ituaiga o galuega totogi e aofia ai le faaauilumaina o se mea po o se auaunaga, e manaʻomia ona tatou faaeteete ina ia aua neʻi o tatou faia se mea o le a tausuai ai o tatou uso.—2 Kori. 6:3; Fili. 1:9, 10.
2 Ua oo ina aafia nisi i le faia o taumafaiga o pisinisi eseese ma ua manatu i uso Kerisiano e faapea o a latou tagata faatau. Ua faalaeiauina e nisi faalapotopotoga o loo faatau atu a latou mea o latou tagata faigaluega ina ia vaai i tagata uma e peiseai o ni a latou tagata faatau—e aofia ai ma tagata o la latou lava lotu. O nisi uso ua faamaopoopoina ni faatasitasiga tetele o Molimau ma se fuafuaga ia faalaeiauina i latou ina ia aufaatasi ma i latou i le faia o se pisinisi. O isi ua faaauilumaina a latou taumafaiga faapisinisi e ala i le faaali atu o mataupu faatosina, polosiua, faamatalaga i le Initineti po o vitiō ma kaseti i uso talitonu e ui e leʻi tāpāina mai. Po o se mea saʻo ea mo se Kerisiano le faaaogā o ona sootaga faatiokarate e faaaogā ai ona uso faaleagaga? E leai!—1 Kori. 10:23, 24, 31-33.
3 E Tatau i Uso Ona Faaeteete: E lē o le uiga o lenei mea faapea e lē mafai e se Kerisiano ona fai se pisinisi ma se uso. O se mataupu lena e fitoitonu i le tagata lava ia. Ae peitaʻi, ua faamaʻite e nisi ni faiga pisinisi e faaosofia ai le matapeʻapeʻa, ma ua latou uunaʻia o latou uso talitonu e avea ma a latou paaga po o ē nonō tupe. O le tele o nei taumafaiga faapisinisi ua oo ina gau, ma matuā tele ni tupe a i latou o loo auai ua leiloloa atu ai. E ui lava atonu na uunaʻia i latou o loo auai i sea pisinisi e se faanaunauga ina ia maua vave ai ni tupe faasili, ae e lē tatau ona manatu lē o faamaopoopoina sea pisinisi faapea, e lē tuuaʻia o ia pe afai e gau le pisinisi. E tatau ona ia muaʻi manatunatu ma le faaeteete i le aafiaga o le a iai le tulaga lelei faaleagaga ma le faaletino o ona uso i le mea e tupu pe a gau le pisinisi. O i latou o umia tulaga o tiute tauave faatiokarate e ao ona matuā faaeteete lava i a latou taumafaiga faapisinisi auā atonu e vaavaai atu ma le faaaloalo isi ia i latou ma matuā faatuatua atu ia i latou. O le a lē saʻo pe a faaaogāsesēina lena faatuatuaga. E ono mafai ona aveesea ai faaeaga o le auaunaga paia pe afai ua lē toe faaaloalogia se uso e isi tagata.
4 O lo tatou sini e tatau ona “ia faia mea uma ina ia atiina aʻe ai.” (1 Kori. 14:26, NW) E tatau ona tatou alofia le faia o so o se mea e faaofi atu ai pe faaauiluma ai ni faiga faapisinisi i totonu o le faapotopotoga. E leai lava se fesootaʻiga o na mea ma māfuaaga faale-Tusi Paia e tatou te faapotopoto faatasi ai.—Epe. 10:24, 25.