“Tau le Taua Lelei i la le Faatuatua”
1 Sa apoapoaʻi atu Paulo ia Timoteo ina ia “tau le taua lelei i la le faatuatua.” (1 Timo. 6:12) Sa ola Paulo lava ia e tusa ma na upu. I taimi mulimuli o lona soifuaga, na ia talanoa mai ai ma le mautinoa e faapea, na tau e ia lava se taua lelei. (2 Timo. 4:6-8) I vala uma lava, sa ia faia pea le faiva ma le faamalosi, lototele, ma le onosai. E ala i le faataʻitaʻi i lana faaaʻoaʻoga, e mafai ai ona tatou maua le lagona mautinoa i o tatou loto e faapea o loo tatou faia le mea e aupito sili tatou te mafaia i la tatou taua mo le faatuatua faa-Kerisiano.
2 Tuu Atu Taumafaiga Manaʻomia: Sa galue mamafa Paulo i le faiva. (1 Kori. 15:10) O lea e faapena foʻi i tatou a o tatou saʻili ina ia maua i latou uma ua tatau ai o i la tatou oganuu. (Mata. 10:11) Ina ia oo atu i nisi o i latou, atonu o lona uiga ia alapō ina ia molimau atu ia i latou e tatou te fetaui i le auala. Pe e mafai foʻi ona uiga i le galue i le afiafi po o le afiafi pō e faafeiloaʻi tagata a o latou foʻi atu i o latou aiga.
3 E manaʻomia ai le pulea lelei o oe lava ma se faasologa lelei ina ia iai i le taimi tonu e feiloaʻi ai ma la tatou vaega o suʻesuʻega tautusi mo le auaunaga i le fanua. Mo se faaaʻoaʻoga, o nisi o le aiga Peteli e faimalaga atu mo le 60 minute i le alu atu ma toe foʻi mai ina ia auai i le faiva i faaiʻuga o vaiaso faatasi ma faapotopotoga ua tofia i ai i latou. E lē gata i lea, e tatou te ono viiviia foʻi nisi tagata ma aiga i la tatou faapotopotoga o ē e faimalaga mamao atu ae e taunuu atu lava i le taimi tonu. O na faaaʻoaʻoga o le filigā ma le faamaopoopoina totino e aogā ona faataʻitaʻi i ai.
4 E tatau ona uunaʻia i tatou ina ia toe asia tagata fiafia uma e tatou te maua. E tusa lava pe tufa atu ni lomiga i le auala po o se talaʻiga lē fuafuaina, e manaʻomia ona tatou faia se taumafaiga ina ia maua mai le tuatusi po o le numera o le telefoni a le tagata. Ona mafai lea ona tatou telefoni atu i ai ina ia faatupu le naunau ma taumafai ina ia amataina ai se suʻesuʻega faale-Tusi Paia.
5 Ia Auai e Lē Aunoa i le Auaunaga: Sa maumauaʻi ma fai mea māeʻaeʻa Paulo i le talaʻiga. (Roma 15:19) Ae faapefea oe? Po o faia e lē aunoa sou sao i le faiva? Po ua faia ea sou sao i le auaunaga i le fanua i lenei masina? E matuā fiafia lava ia faisuʻesuʻega o Suʻesuʻega Tautusi a le Faapotopotoga e vaai atu o faia se sao o tagata uma i a latou vaega i le faiva ia Aokuso. O le a latou fesoasoani atu ia te oe e faia faapea.
6 E ala i le faataʻitaʻi i le faaaʻoaʻoga a Paulo i le lagolagosua atoatoa i le tala lelei, o le a faaauau ai pea ona tatou “tau le taua lelei i la le faatuatua.”