Po o E Tumau?
1 “E leai soʻu fiafia e sili i lenei, pe a . . . savavali laʻu fanau i le upu moni.” (3 Ioa. 4) O le tumau o le fanau faaleagaga a Ioane na matuā olioli tele ai o ia. Maʻeu le tatau ona matuā faafiafiaina o lo tatou Tamā faalelagi i le silasila mai i le faitau miliona o i latou o le a avea ma ana fanau i le lumanaʻi o ‘savavali i le upu moni’!—Faata. 23:15, 16; 27:11.
2 A o maumauaʻi pea tagata o le Atua i le avea o se nuu e tasi e maelega i galuega faa-Kerisiano, e iai nisi ua faasolosolo malie atu ina faavaivai. E ui lava o i latou nei atonu sa tiotio i le uluaʻi taimi na latou aʻoaʻoina ai le upu moni, ae a o mavae atu tausaga, ua latou nofoaʻi i se tulaga ua faia na o sina sao itiiti po ua seāseā foʻi auai i le galuega o le faia o soo.
3 E malamalama lelei lava e faapea, atonu ua faagesegese nisi ona o tulaga o le soifua mālōlōina faapea ma āuga o le tino matua. Ae peitaʻi e tatau ona faamālō atu ia i latou ona o lo latou tumau. O loo latou faia le mea latou te mafaia. Ae o tagata taʻitoʻatasi o ē ua tuuina atu o latou ola i le Atua e tatau ona fesili ifo ia te ia lava: ‘Po o oʻu faatagaina aʻu lava e pupū tele atu i le saʻilia o mea ou te naunau i ai ua itiiti ai se taimi e faaalu i le saʻilia o manaʻoga o le Malo i loʻu olaga? Po ua oo ina pei ua ou “faaleogalua,” po o tumau pea ona ou faamalosi ma “finafinau”?’ (Faaa. 3:15, 16; Luka 13:24) Seʻi o tatou manatunatu uma lava faatasi ma le tatalo i mea o loo tatou faia ma faaleleia mea e pei ona manaʻomia, i le manatuaina e faapea, ua folafola mai e Ieova e na te avatua “le viiga, ma le mamalu, ma le manuia ia te i latou uma o e fai amio lelei.”—Roma 2:10.
4 Le Auala e Tumau Ai: O le ā na fesoasoani ia Iesu e tumau ai? Na faamatala e Paulo e faapea: “O le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.” (Epe. 12:1-3) O le olioli lea sa tuu i luma o Iesu sa sili mamao atu na i lo o tofotofoga sa ia fesagaʻia mo sina taimi. O le manatua foʻi la o le olioli lea ua tuu i o tatou luma e mafai ona fesoasoani ia i tatou e tumau ai. (Faaa. 21:4, 7; 22:12) Afai tatou te vaavaai atu ia Ieova e aumaia le malosi e ala i suʻesuʻega totino, auai e lē aunoa i sauniga, ma ia maumauaʻi i le tatalo, o le a mafai ai ona tutumau i le galuega ua ia tuuina mai ia i tatou e fai.
5 E fiafia Ieova i le tumau o ana auauna faamaoni. O lea seʻi o tatou faateleina lona olioli e ala i le faaauau pea ona ‘savavali i le upu moni.’