“Ia Tamaoaiga i Galuega Lelei”

¹ I tausaga mulimuli o lana faiva maelega, sa galulue vavalalata ai le aposetolo o Paulo ma Timoteo ma Tito. Sa ia tusi atu ni upu faalaeiau talitutusa iā i laʻua taʻitoʻatasi. Na ia faapea atu iā Tito, “o e ua faatuatua i le Atua” e tatau ona naunau “i le faia [o] galuega lelei.” (Tito 3:8) Na ia taʻu atu iā Timoteo e faapea, o i latou e faatuatua atu i le Atua, e tatau ona “tamaoaiga i galuega lelei.” (1 Timo. 6:17, 18) O se fautuaga sili ona lelei lenei mo i tatou uma! Ae o le ā o le a uunaʻia ai i tatou e faia galuega lelei i o tatou olaga? Ma o ā tonu ni galuega e mafai ona tatou faia i aso o i luma?

² O le faanaunauga ina ia tamaoaiga i galuega saʻo e mapuna mai i lo tatou talitonu ma le alofa mo Ieova, ma e auala mai i le faamoemoe ofoofogia ua ia tuuina mai iā i tatou. (1 Timo. 6:19; Tito 2:11) Aemaise lava i lenei vaitaimi o le tausaga, ua faamanatu mai ai iā i tatou e faapea, na auina mai e Ieova lona Alo i le lalolagi ina ia mafai ai e Iesu ona taʻumamāina le suafa o lona Tamā ma saunia ai le auala i le ola mo tagata uma ua tatau i ai. (Mata. 20:28; Ioa. 3:16) O le a matuā faamanino mai lenei mea i le Faamanatuga o le maliu o Keriso iā Mati 28. I le tali atu i le faamoemoe ua tatou maua o le ola e faavavau, pe e lē uunaʻia ai ea i tatou e faia mea uma tatou te mafaia ina “ia tamaoaiga i galuega lelei”? Ioe, o le mea moni lenā! O ā galuega e tatou te ono faia i le taimi nei?

³ Galuega Lelei e Faia iā Mati ma Masina o Loo Mulimuli Mai: E mautinoa lava o le a tatou auai i le Faamanatuga—le sauniga e aupito sili ona tāua i Molimau a Ieova i le lalolagi aoao. (Luka 22:19) Peitaʻi, e tatou te mananaʻo e taʻu atu le fiafia e maua i lenā sauniga i le toʻatele e mafai ona tatou maua. Tagaʻi i le lipoti o le auaunaga i le 2002 Yearbook, ona e iloa ai lea e faapea, i le tele o atunuu i le lalolagi aoao i le tausaga ua mavae, na sili atu i le faatolu, faafā, faalima taimi po o le sili atu foʻi, tagata na auai i lo o le ʻautalaʻi. E mautinoa le tele o taumafaiga filigā na faia e tagata uma o faapotopotoga, i le tufatufaina atu i le lautele o tusi valaaulia o le Faamanatuga i a latou oganuu. O lea la, e tatou te mananaʻo ai e faaalu le tele o le taimi tatou te mafaia e amata atu i le taimi lenei seʻia oo iā Mati 28, i le valaauliaina o tagata i le Faamanatuga ma fesoasoani iā i latou e aʻoaʻo e uiga i le faamoemoe o le faaolataga.

⁴ E oo atu iā Aperila, atonu ua amata ona tatou fiafia e faaaogā ia itula uumi o le ao faapea taimi lagilelei o le tau. E mafai faapefea ona tatou faaaogāina lelei nei avanoa mananaia ina ia “tamaoaiga i galuega lelei”? O le faaauau lea ona faia o se sao maelega i le galuega o le talaʻia o le tala lelei, i le “maelega i galuega lelei.” (Tito 2:14; Mata. 24:14) Afai sa lē mafai ona e paeonia lagolago iā Mati, pe mafai la ona e faia faapea iā Aperila ma Me, ia po o se tasi o na masina? Afai e te paeonia iā Mati, pe mafai ea la ona e faaauau ai pea?

⁵ Ua mafai e nisi o loo faigaluega ona latou faaaluina se itula e tasi pe ā i le auaunaga a o ō atu e faigaluega, i le molimau atu i le auala po o le asiasi atu i tagata faipisinisi e vave ona tatala a latou pisinisi i le taeao. Ua fuafua nisi e molimau atu i taimi o mālōlōga i le aoauli. Ua mafai foʻi e nisi ona faia se suʻesuʻega faale-Tusi Paia ma se tagata la te faigaluega faatasi i lenā taimi. O le toʻatele o tuafāfine tausiaiga ua mafai ona faaavanoa se taimi mo le faiva i le fanua a o ō atu a latou fanau i le aʻoga. O le alapopō o isi i taeao mo le faia o a latou feʻau i le fale, ua lava ai le taimi latou te faaaluina i le aso i le galuega talaʻi ma le aʻoaʻo atu.—Efe. 5:15, 16.

⁶ E tusa lava pe e lē o mafai ona e paeonia lagolago, ae atonu e mafai ona fai sau faasologa totino ina ia faia ai se sao e sili atu i le faiva, i le faia o mea uma e te mafaia ina ia e “agalelei atu, ia tamaoaiga i galuega lelei, ia mataalofa, ia . . . avatu fua” le upu moni i isi.—1 Timo. 6:18.

⁷ Ia Manatua le Galuega Lelei o le Faia o Soo: I tausaga taʻitasi, e iai tagata lotofiafia e ō mai i le Faamanatuga. Pe e mafai e nisi i le faapotopotoga ona uaʻi totoʻa atu iā i latou na, o ē e auai ae e leʻi faia ni a latou suʻesuʻega i le taimi nei? Pe e mafai ona toe asia i latou ma le sini e fesoasoani iā i latou ina ia agaʻigaʻi i luma faaleagaga? Atonu o nisi o i latou ia na auai mai i le Faamanatuga o ni tauaiga o Molimau. O isi atonu o ni tagata na suʻesuʻe i aso ua mavae ma o ē e na o se faalaeiauga lava e manaʻomia, ina ia toe faaauau ai le suʻesuʻega ma auai ai e lē aunoa i sauniga. Maʻeu so tatou fiafia e vaai atu ua avea i latou ma auauna maelega a Ieova faatasi ma i tatou!

⁸ O le faateleina ona faia o se sao i le faiva iā Mati ma masina o loo mulimuli mai, e foliga mai o le a tatou maua ai nisi tagata fiafia e mafai ona tatou toe asia. Taumafai e fai atu se fesili iā i latou. Ona faamautinoa lea i ai o le a taʻu atu le tali i le isi asiasiga. O lo tatou faia o lenei mea, o le a maua ai le avanoa mo se toe asiga. O lo tatou vave asiasi atu i ai, o le sili foʻi lenā ona lelei. Afai e lē mafai ona tatou amataina se suʻesuʻega i le uluaʻi asiasiga, o le a tatou taumafai la e amataina i le isi asiasiga e sosoo ai pe afai e mafai.

⁹ Pe a tatou molimau atu i alatele, e tatau ona tatou mataalia e taumafai e amataina ni talanoaga ma tagata. E toʻatele tagata talaʻi ua latou faamaumauina suafa, tuatusi, ma numera o telefoni a tagata fiafia o ē na latou feiloaʻi i ai a o molimau atu i alatele. Afai o le tagata lea na lua feiloaʻi e lē nofo i lau oganuu, ia faatumu le pepa House to House Record (S-8), ma avatu i le failautusi o le faapotopotoga, o ia o le a na tuuina atu i le faapotopotoga e ona le oganuu lea e nofo ai le tagata. Afai e lē mafai ona faia faapea e le failautusi, o ia na te auina atu i le ofisa o le lālā ina ia faia ai se fuafuaga, ma o le auala lenei e mafai ona tausia ai le tagata fiafia.

¹⁰ Pe afai e na o le numera o le telefoni e mafai ona maua ae e leai se tuatusi, ona faia lea o se toe asiga e ala i le telefoni atu i le tagata. Ia sauniuni mamao se mataupu e te manaʻo e talanoa i ai. Ia ave lau tusi Reasoning ina ia mafai ona suʻe vave atu i ai. Ua taulau manuia nisi i le amataina o ni suʻesuʻega ma tagata e ala i le telefoni, e aofia ai ma i latou o ē na faafaigatā ona maua atu i aiga. Sa fesilisili se tuafafine i fafine fiafia na ia feiloaʻi i ai i le faiva mai lea fale i lea fale mo numera o telefoni, ma o le iʻuga, na mafai ona ia amataina ai ni suʻesuʻega faale-Tusi Paia se lua.

¹¹ Felagolagomaʻi ma Toeaina e Fesoasoani Atu i Tagata ua Lē o Toe Talaʻi: E matuā fiafia lava toeaina e avatu se fesoasoani alofa iā i latou nei. E toʻatele tagata ua toe amata ona ō mai lava i latou i sauniga a le faapotopotoga. Ua latou iloa le manaʻomia ona saʻili atu mo se faatasitasiga māfana ma le faalapotopotoga a Ieova, ina ia maua ai le saogalemu faaleagaga lea e faamatalaina i le Salamo 91. O nisi o i latou, ua nofo sauni nei e toe faia se sao i le faiva i le fanua. Afai e auai isi tagata o ē ua lē o toe talaʻi i le Faamanatuga i lenei masina, atonu o le a latou talia le faia o sa latou lava suʻesuʻega faale-Tusi Paia. Pe afai o lenā le tulaga, o le a fuafuaina e toeaina se tasi e suʻesuʻe ma i latou o loo manaʻomia se fesoasoani. Afai e tofia oe e avatua lea fesoasoani, o le a matuā talisapaia lava lau lagolagosua.—Roma 15:1, 2.

¹² “Tausisia Pea Galuega Lelei”: O le toʻatele o ē na auai i le auaunaga faapaeonia lagolago mo se masina po o le sili atu foʻi, ua latou iloa le faateleina o la latou galuega i le fanua i masina ia e mulimuli mai. Sa latou feiloaʻi ma tagata fiafia o ē na latou lagona e manaʻomia ona toe asiasi atu i ai. Ua uunaʻia ai i latou e lenei mea ina ia faia atili ni taumafaiga faaopoopo, ina ia faateleina la latou auaunaga i le fanua ina ia toe faafesootaʻi tagata fiafia. Sa mafai e nisi ona amataina ni suʻesuʻega, ma sa fesoasoani lenā mea iā i latou ina ia faia ai se sao e sili atu i le faiva.

¹³ A o isi, sa fiafia tele i latou ona o le faateleina o lo latou sao i le talaʻiga ma le galuega o le faia o soo, o lea ua uunaʻia ai i latou e iloilo mea e latou te faamuamuaina. O le iʻuga, ua mafai ai e nisi ona faaitiitia taimi i galuega totogi ae faaauau pea ona avea ma paeonia lagolago. O isi ua mafai ona ulu atu i le auaunaga faapaeonia sauatoa. Ua mafai ona tuu atoatoa atu lo latou faamoemoe i le Atua, ae e lē o mea ua ofoina mai e le lalolagi. Ua latou iloa o le ‘mataalofa, ma le avatu fua o a latou mea,’ ua maua ai le mau faamanuiaga mai iā Ieova ma ua faamalosia ai lo latou faamoemoe e olioli “i le ola moni.” (1 Timo. 6:18, 19) A o faateleina i latou e auai i le auaunaga paeonia, o le mea moni, e maua ai foʻi e le faapotopotoga atoa aogā. E tele lava ina fia talanoa paeonia e uiga i mea na tutupu i la latou auaunaga ma valaaulia isi ina ia auai ma i latou i le faiva, ma ua faapogaia ai e lenei mea se agaga e maualuga faaleagaga i le faapotopotoga.

¹⁴ Tau ina “ia tamaoaiga i galuega lelei” i tatou uma i le vaitaimi o le Faamanatuga ma masina o loo mulimuli mai i le faateleina o lo tatou sao i le faiva faa-Kerisiano. Seʻi faaalia lo tatou lotofaafetai mo mea ua faia e Ieova, i le aumaia iā i tatou o le faamoemoe o le ola e faavavau i le lalolagi fou amiotonu.—2 Pete. 3:13.