“Le Meleniuma Fou—O le ā o i le Lumanaʻi mo Oe?”
1 O lena fesili o loo iai pea i mafaufau o tagata i le lalolagi aoao. E ui i le tele o mea ua faataunuuina e le fanau a tagata i le faagasologa o senituri, ae o loo lē mautonu pea tagata ona o le tumau pea o faafitauli autū ia o loo malaia ai le fanau a tagata mo le faitau meleniuma. (Iopu 14:1; Sala. 90:10) O fea e mafai ona maua ai e le fanau a tagata se mapusaga?
2 I masina o Oketopa ma Novema, o le a tatou maua ai se avanoa faapitoa e saunia ai se tali o lena fesili mo o tatou tuaoi. E faapefea? E ala i le tufatufaina atu o le Tala o le Malo Nu. 36. O lona matua e faapea “Le Meleniuma Fou—O le ā o i le Lumanaʻi mo Oe?” I le faagasologa o le ʻafa muamua o Oketopa, o le a tatou ofoina ai ia mekasini o le Olomatamata ma le Ala Mai! Ona amata mai lea i le Aso Gafua, Oketopa 16, e oo i le Aso Faraile, Novema 17, o le a tatou auai ai ma le faamalosi i le tufatufaina atu o le Tala o le Malo Nu. 36. I le faagasologa o lenei tauiviga, o le a tatou uaʻi atu ai i le tufatufaina atu o le Tala o le Malo Nu. 36 i aso o le vaiaso. I faaiʻuga o vaiaso, o le a tatou ofoina atu ai le Tala o le Malo Nu. 36 faatasi ma mekasini fou.
3 Po o le a E Faia ai se Sao Atoatoa? O le a mananaʻo ia toeaina, auauna o le faiva, ma paeonia ina ia taʻimua i lenei tauiviga, talu ai o i latou o loo i le muaʻau o le galuega. E toʻatele tagata talaʻi ua uma ona fetuunaʻi o latou tulaga ina ia mafai ai ona paeonia lagolago i se masina po o masina uma e lua mo le tufatufaina atu o lenei sāvali. Ua fuafua e isi ina ia faaalu se taimi e sili atu na i lo o le tulaga masani i le faiva.
4 E mafai ona fesoasoani ia faisuʻesuʻega o Suʻesuʻega Tautusi a le Faapotopotoga i le faalaeiauina o tagata uma o a latou vaega ina ia faia se sao i le tele latou te mafaia i le tufatufaina atu o le Tala o le Malo Nu. 36. Atonu o iai ni tagata talaʻi o ē ua lē toe talaʻi. E ao i toeaina ona asiasi atu ia i latou na ina ia iloa ai po o le ā se mea e mafai ona faia e fesoasoani ai ia i latou. Atonu e mafai ona faia se fuafuaga mo se tagata talaʻi tomai e ō faatasi ma tagata ua lē toe talaʻi i le auaunaga i le fanua i nei masina. Atonu e na o le pau lava le mea e manaʻomia o sina taulimaga faigofie o le Tala o le Malo Nu. 36 ina ia toe faaolaola ai nei tagata talaʻi.
5 O le a avea foʻi o se avanoa lelei lenei mo tagata suʻesuʻe o le Tusi Paia o ē ua toeitiiti uma ona suʻesuʻeina le tusi o le Poto ma ē ua agavaa e avea ma tagata talaʻi lē papatisoina e amata ona auai i le faiva. E oo lava i ē laiti e mafai ona faia se sao lelei i lenei galuega fiafia.
6 E na o le pau lava le mea e manaʻomia o se taulimaga faigofie. E mafai ona e faapea atu:
◼ “Ua ou ofoina atu loʻu taimi e fesoasoani ai i le tufatufaina atu i aiga uma i [igoa o le nuu po o le atunuu] lenei feʻau e sili ona tāua. O lau kopi lea. Faamolemole ia faitau i ai.” E foliga mai atonu e lelei pe a aua le aveina se ato talaʻi pe a tufatufaina atu le Tala o le Malo Nu. 36.
7 Faatasiga Fuafuaina Lelei mo le Auaunaga i le Fanua: E tatau ona vaai lelei toeaina po ua talafeagai ma aogā ia fuafuaga mo le molimau atu. Aemaise lava le ovasia o le auaunaga, e tatau ona faamautinoa ua tele ma lava ni oganuu o iai mai lea fale i lea fale ma oganuu o pisinisi ina ia mafai ai e tagata uma ona faia se sao atoatoa i le galuega. Pe afai e mafai, e tatau ona faamaopoopoina faatasiga mo le auaunaga i aso taʻitasi o le vaiaso, mo faaiʻuga o vaiaso, ma afiafi. E mafai ona faia ni fuafuaga ina ia feiloaʻi i afiafi mo le lelei o tamaiti aʻoga, tagata faigaluega e fai sifi, ma isi.
8 Le Mea e Fai ia i Latou e Lē Maua Atu i Fale: O lo tatou sini o le talanoa atu lea i le toʻatele o tagata o aiga e mafai ona tatou talanoa atu i ai. Afai e leai se tasi i le fale pe a e asiasi atu, ia faamau i lalo le tuatusi ma ia toe asiasi atu i se isi taimi o le aso. Pe afai e oo ane i le vaiaso mulimuli o le tauiviga ae leʻi mafai ona e feiloaʻi i tagata o na aiga, e mafai ona e tuu se kopi o le Tala o le Malo Nu. 36 mo i latou i se mea e lē mafai ona iloa atu e se tagata e ui ane. E mafai e toeaina o le faapotopotoga ona faatonuina le faapotopotoga ina ia tuu se kopi o le Tala o le Malo Nu. 36 i se fale e lē o maua i ai se tagata i le uluaʻi asiasiga pe a galueaʻiina ia oganuu maotua ma oganuu e tetelē atu na i lo o le mea e mafaia ona galueaʻiina i le taimi o le tauiviga.
9 Tatou Ō Loa! E tatau ona taumafai ia faapotopotoga ina ia galueaʻiina atoa a latou oganuu a o leʻi faaiʻuina le tauiviga ia Novema 17. Afai e telē tele la outou oganuu, e mafai ona galulue taʻitoʻatasi nisi tagata talaʻi pe afai e mafai ma e saogalemu. O lenei fuafuaga o le a faafaigofie ai ona oo atu i le toʻatele o ē ua tatau ai i le tele e mafaia ai. Ia faamautinoa ua faia ni faamaumauga lelei o i latou uma e fiafia na maua.
10 E tatau ona fuafuaina e toeaina po o le ā le tele o mekasini faaopoopo o le a manaʻomia e le faapotopotoga ona ota lea e tusa ai ma lea manaʻoga. E lē manaʻomia ona otaina ni Tala o le Malo Nu. 36, talu ai ua aauina atu i faapotopotoga taʻitasi e tusa ma mea e manaʻomia. O paeonia faapito, sauatoa, ma paeonia lagolago e tatau ona maua le 250 kopi a le tagata e toʻatasi e tufatufa atu, a o tagata talaʻi o le faapotopotoga o le a tuuina atu i ai le taʻi 50 kopi a le tagata e toʻatasi. O lea la, po ua e nofosauni ma naunau e alu atu loa i lenei galuega tāua? Maʻeu se faaeaga mo i tatou o le faailoa atu lea i o tatou tuaoi uma o le mea ua folafola mai e le Atua mo le lumanaʻi lata mai!