Ia Talaʻi Pea!

¹ O le finagalo o le Atua “ina ia faaolaina o tagata uma lava, ma ia oo ina iloa lelei le upu moni.” (1 Timo. 2:4) O le māfuaaga lenei ua ia tuuina mai ai ia i tatou le tofiga ina ia talaʻi le tala lelei. (Mata. 24:14) Afai tatou te talisapaia le māfuaaga e tatau ai ona tatou talaʻi pea, o so o se mea lava la e faavaivaia ai po o ni faatosinaga e tatou te ono fetaiaʻi, o le a lē taofia ai i tatou.

² Aiseā e Maumauaʻi Ai? E tele faatosinaga o loo iai i le lalolagi ua faapogaia ai ona galo i tagata pe manatu māmā ai foʻi i mea e tatou te talanoa atu ai ia i latou. O lea e tatau ona tatou faamanatu atu ai pea ia i latou e uiga i le feʻau a le Atua o le faaolataga. (Mata. 24:38, 39) E lē gata i lea, e fesuisuiaʻi pea tulaga o olaga o tagata. E oo lava i tulaga o mea i le lalolagi e mafai ona vave suia i le na o se pō e tasi. (1 Kori. 7:31) O tagata e tatou te talaʻi atu i ai atonu e fesagaʻi ma ni faafitauli fou po o popolega a taeao, le vaiaso lea, po o le isi masina, ma faapogaia ai ona latou manatunatu loloto i le tala lelei lea tatou te avatu ia i latou. Pe e te lē lotofaafetai ea ona o le maumauaʻi o le Molimau lea na avatua le upu moni ia te oe?

³ Ina ia Faataʻitaʻi i le Alofa Mutimutivale o le Atua: Ua faatagaina ma le onosai e Ieova se taimi umi e mavae atu a o leʻi faaooina mai lana faamasinoga faaoosala i ē amioleaga. E ala ia i tatou, o loo faaauau pea ona ia ʻaiʻoi atu i ē lotosaʻo ina ia liliu atu ia te ia ma faaolaina ai. (2 Pete. 3:9) O le a tatou nofosala i le toto pe afai sa tatou lē folafola atu le feʻau o le alofa mutimutivale o le Atua i tagata ma lapataʻia i latou e uiga i le faamasinoga faaoosala o loo sau a le Atua ia i latou uma o ē e lē liliu ese mai o latou ala leaga. (Eseki. 33:1-11) E tusa lava pe lē talileleia la tatou talaʻiga i taimi uma, e lē tatau lava ona tatou solomuli mai le faia o taumafaiga uma e fesoasoani ai i ē lotofaamaoni e talisapaia le alofa mutimutivale tele o le Atua.—Galu. 20:26, 27; Roma 12:11.

⁴ Ina ia Faatinoina lo Tatou Alofa: O Ieova le Atua na poloaʻi mai, e ala ia Iesu Keriso, ina ia talaʻi le tala lelei i le lalolagi uma. (Mata. 28:19, 20) E tusa lava pe mumusu tagata e faalogo, ae ua tatou maua ai le avanoa e faaalia ai lo tatou alofa ma le tuutoina atu i le Atua e ala i le finafinau e faia le mea ua tonu.—1 Ioa. 5:3.

⁵ Tau ina ia tatou maumauaʻi e talaʻi pea! Seʻi o tatou faia faapea ma le maelega a o faaauau pea le “aso e faaolaina ai” a Ieova.—2 Kori. 6:2.