Fuafua Mamao—Mo le Ā?
1 O i tatou uma lava e tatou te mafaufau i a tatou fuafuaga mo le lumanaʻi. O i latou e faamoemoe e ola i le lalolagi, o loo vaavaai atu i luma e ola e faavavau i le lalolagi fou amiotonu a le Atua. Ae o loo iai faatosinaga e mafai ona faoesea lena faamoemoe mai o tatou loto. E manaʻomia ni taumafaiga faamaoni ina ia atiina aʻe ai pea o tatou olaga e faaautū i gaoioiga tau i le Malo ma ia aua neʻi faasesēina i tatou i tuʻinanauga faatosina o le tino.—1 Ioa. 2:15-17.
2 E lē mafai ona malamalama le lalolagi i faanaunauga po o sini o tagata faaleagaga. (1 Kori. 2:14) A o tauivi isi o le fanau a tagata i le fia maua o le tulaga taʻutaʻua, le pule, po o ʻoa faaletino, ae o loo tatou tauivi ina ia maua ʻoa faaleagaga. (Mata. 6:19-21) Afai tatou te taumafai ina ia suia o tatou mafaufauga ina ia ōgatusa ma manatu o le lalolagi e uiga i le lumanaʻi, po o le a mafai ea la ona ausia o tatou sini faaleagaga? O le a lē pine ae faatumuina e mea faalelalolagi o tatou loto. E mafai faapefea ona tatou taofia le tupu o lenei mea?
3 “Ia Outou Oofu i le Alii o Iesu Keriso”: O le tasi o auala e iloa ai po o tatou atiina aʻe lo tatou lumanaʻi i gaoioiga tau i le Malo, o le iloiloina lea o a tatou talanoaga. Po o tatou talanoa soo e uiga i mea faitino ma mea e naunau i ai le lalolagi? Afai o lena, e tatau ona tatou iloiloina po ua mou atu le fiafia i o tatou loto mo mea tāua faaleagaga. Atonu e manaʻomia ona tatou matuā faatāuaina le ‘ofuina o le Alii o Iesu Keriso na i lo o le sauniuni mo tuʻinanauga o le tino.’—Roma 13:14.
4 E mafai e talavou ona ʻoofu i le Keriso’ e ala i le sauniuni mamao mo le aso e latou te ulufale atu ai i le faiva faataimi atoa. O se talavou o lē na manaʻo e paeonia sauatoa sa ola aʻe i se aganuu lea e ao ona lelei le tulaga tautupe o tama talavou. O lea na matuā aafia ai o ia i faiga faapisinisi ma oo ai ina fai ma masani le na ona auai i sauniga ma faia se sao i le faiva. I le taimi lava na ia faatuatuaina ai fetalaiga a Iesu na o loo maua i le Mataio 6:33, sa ia tuua ai loa lena olaga o le galue fitā faifai pea, ma amata ona ia auai i le auaunaga faataimi atoa. I le taimi nei, o loo auauna o ia ia Ieova ma se lotofuatiaifo lelei, e pei ona ia faapea mai ‘ma lona tomai atoatoa.’
5 Ua taʻua i le Tusi Paia e faapea o se faiga atamai le fuafua mamao mo le lumanaʻi. (Faata. 21:5) Talosia ia faia faapea e i tatou uma lava ma ia faamuamua le finagalo o le Atua i a tatou fuafuaga.—Efe. 5:15-17.