Ia Fuafua Mamao!
1 Ua saunia e le faalapotopotoga a Ieova se polokalame faifai pea o gaoioiga faatiokarate ua fuafuaina e faamalie ai o tatou manaoga faaleagaga. O le talisapaia ua uunaia ai i tatou ia faaaogā atoatoa mea uma ua fuafuaina, e pei o asiasiga a ovasia femalagaai, fonotaga ma tauaofiaga, ma isi gaoioiga faapitoa ua fuafuaina e le faapotopotoga. (Mata. 5:3) Ae peitai, ua lē taulau ona maua e nisi aogā mai le tele o nei sauniuniga faaleagaga ona o isi a latou fuafuaga. O le ā se mea e mafai ona faia ina ia taofia ai lenei mea? E mafai faapefea ona tatou faamautinoa ua lē faalavelavea e isi gaoioiga e lē faatiokarate “mea e sili atu ona tāua”?—Fili. 1:10, NW.
2 E Tāua Tele Fuafuaga Atamai: Ua apoapoai mai le Faataoto 21:5 (NW) e faapea: “O fuafuaga a lē filigā e mautinoa le tele o mea aogā e iu i ai, a o ē uma e faataalise, e mautinoa le iu ai i le mativa.” Ina ia maua “aogā” faaleagaga, e manaomia ai ona tatou fuafua mamao ma le filigā, i le manatua pea o gaoioiga faatiokarate ua uma ona fuafuaina. E tatau ona faia se faasologa o taimi mo a tatou gaoioiga totino ina ia lē faalavelave ai i lo tatou faia o se sao i le seleseleina o faamanuiaga faaleagaga. Afai e faatopelau ona faia o a tatou fuafuaga i mea o tatou mananao i ai e fai e aunoa ma le mafaufau i gaoioiga faatiokarate ia o loo i luma, e foliga mai o le a tatou pagatia ai i le “mativa” faaleagaga.
3 Aua Neʻi Misia! Ua faia e i tatou uma lava ni fuafuaga mo le lumanai, e aofia ai fuafuaga mo faiga malologa, malaga faapisinisi, asiasi atu i aiga, ma isi lava mea faapena. A o e lei maumauai i ai, pe lei faia foi lau faaiuga mautū i au fuafuaga, ia vaai muamua i lau faasologa o gaoioiga faaleagaga o loo faagasolo mai. Afai e te iloa o loo loma se asiasiga a le ovasia matagaluega po o iai foi se fonotaga o iai i le faasologa mo le taimi lea o le a toesea ai oe, ia fai se taumafaiga faamaoni e toe fetuunai au fuafuaga ina ia mafai ai ona e auai. Ua faailoa mamao mai lava ia i tatou mea faapitoa o loo fuafuaina mo le lumanai. E mafai e toeaina o la outou faapotopotoga ona faailoa atu ia te oe ni mea ua fuafuaina e le faapotopotoga.
4 O le faaalia o le tofamamao ma le fuafua mamao mo mea e sili atu ona tāua, o le a ‘tutumu ai i [tatou] i fua o le amiotonu . . . ina ia viia ai ma faaneeneeina ai le Atua.’—Fili. 1:11.