Taulimaga e Faigofie ma e Aogā
1 Na folafola e Iesu le Malo o le Atua i se auala e faigofie ma sa tuusaʻo. Sa ia silafia, o le a tali lelei mai tagata pei ni mamoe pe a latou faalogo i le upu moni. Sa ia silafia foi, e eseese manatu o tagata, e eseese mea e fiafia i ai, ma e eseese foi o latou tomai tau le mafaufau. Ina ia ōgatusa la ma na tulaga, sa ia faaaogā fesuisuiai ai upu tomua e faigofie, o fesili, ma faataʻitaʻiga ina ia puʻea manatu o lana au faalogologo ma pāʻia ai o latou loto. E mafai ona tatou faataʻitaʻi i lana faaaʻoaʻoga ma faaaogā lelei taulimaga e faigofie ma e aogā.
2 Faaaogā i se Tulaga e Aogā ai le Tusi Reasoning: O le uluai upu tomua i lalo o le ulutala “Employment/Housing” (Galuega/Fale) i le itulau e 11 o le tusi Reasoning ua talafeagai lelei ma faigofie ona taulimaina.
Atonu e te faapea atu:
◼ “Sa matou talanoa ma ou tuaoi i se mea e mafai ona faia e faamautinoa ai le iai o galuega ma fale mo tagata uma. Pe e te talitonu o se tulaga talafeagai ona faatalitalia faapea o le a faataunuuina e pulega faaletagata lenei mea? . . . Ae o loo iai se tasi na te silafia le auala e foia ai nei faafitauli; o ia lea o Lē na Foafoaina le tagata.” Faitau le Isaia 65:21-23. Ona e fesili atu lea i lē ona le fale po o le ā sona lagona e uiga i lena mea.
3 O le upu tomua i lalo o le ulutala “Injustice/Suffering” (Lē Faamasinotonu/Puapuaga) i le itulau e 12 o le a fiafia i ai le toatele i aso nei.
E mafai ona e fesili atu:
◼ “Pe sa e tau manatu ea: Po o manatu moni mai ea le Atua i le lē faamasino tonu ma puapuaga ia ua oo i tagata?” Faatali mo se tali a lē ona le fale, ona faitau lea i ai o le Failauga 4:1 ma le Salamo 72:12-14. Afai e talafeagai ona faatomua le tusi Ola e Faavavau, ona suʻe lea i ata i le itulau e 150-153 ma faailoa puupuu po ua faapefea i tulaga o le lalolagi i aso nei ona avea o se faataunuuga o le valoaga o le Tusi Paia. Ona suʻe lea i le itulau e 161-162 e faaalia ai po o le ā ua valoia atili e le Atua faapea o se faamanuiaga mo le tagata. Fesili i lē ona le fale po o lē fea vala e sili ona ia fiafia i ai.
4 Pe a uma se talanoaga puupuu ma lē ona le fale, atonu e te filifili faapea, o le a sili ona talafeagai pe a tataʻi lona manatu i se mataupu i se tasi o mekasini, polosiua, po o se sāvali na i lo o le tusi Ola e Faavavau.
Mo se faaaʻoaʻoga, pe a uma ona faaaogā le faatomuaga o loo i le palakalafa e 2 o lenei mataupu, atonu e te faapea atu:
◼ “O lenei polosiua, Po o Silasila Alofa mai ea le Atua ia i Tatou?, o loo faamatala manino ai po o le ā ua folafola mai e le Atua o le a ia faia e tausia ai o tatou manaoga i aso faisoo, ma faaalia ai pe mafai faapefea ona tatou maua ai ni aogā.” Suʻe i le itulau e 26 ma le 27 o le polosiua, ma tataʻi le manatu i le palakalafa e 21.
5 Pe a uma ona faaaogā le faatomuaga i le palakalafa e 3, ona mafai lea ona faamatilatila le sāvali Po o le a Faasaoina ea Lenei Lalolagi?
Atonu e te faapea atu:
◼ “Ua tele nauā mea leaga ma faalavelave i le lalolagi i aso nei. Ua faaalia i lenei sāvali faapea o taua, o oge, ma faafitauli tau i le soifua malōlōina, sa valoia uma mai lava e le Tusi Paia. Ae ua folafola mai foi e le Atua le aumaia o se suiga ofoofogia mo tagata.” Faitau le palakalafa mulimuli i le itulau e 5 o le sāvali.
6 O lo tatou naunau faamaoni i tagata, faatasi ma se taulimaga e faigofie ma e aogā e pāʻia ai le loto, e mautinoa lava o le a fiafia i ai ē pei ni mamoe.—Ioane 10:16.