‘Ia Faalogo ma Faatupuina Atili le Poto’

¹ O loo faamatala mai e le tusi o Faataoto, le valaau atu a le atamai e faapea: “Ia outou faalogologo mai, auā ou te tautalatala i mea sili; e tautala oʻu laugutu i mea tonu. Ua ia te au le mafaufau ma le poto; . . . faalogologo mai ia ia te au; amuia lava i latou o e tausi i oʻu ala. Auā o le ua maua aʻu, ua maua e ia le ola; e maua foi e ia le alofa mai ia Ieova.” (Faata. 8:6, 14, 32, 35) O upu na o loo lelei ona faamatala mai ai faatonuga ia o loo tatou talitalia i le Tauaofiaga Itumalo o “Faiaʻoga o le Afioga a le Atua.”

² Ua iloiloina māeʻaeʻa manaʻoga o le ʻauuso i le lalolagi aoao, ma ua sauniunia ai le polokalame o le tauaofiaga ina ia taulimaina ai nei manaʻoga. Pe afai tatou te faatatauina faatonuga faaleagaga ma fautuaga aogā o le a tauaaoina mai ai, o le a fesoasoani ina ia tatou maua le fiafia, o le a faatumauina ai sa tatou faiā lelei ma Ieova, ma tatou savavali ai pea i le ala e tau atu i le ola e faavavau. Ua iā i tatou la se māfuaaga lelei e ‘faalogo ai ma faatupuina atili le poto.’—Faata. 1:5.

³ A o Leʻi Amata le Polokalame: Ina ia aogā atoatoa iā i tatou mataupu o le a tolaulauina, e manaʻomia ona tatou alaala i o tatou nofoa ma ia sagatonu lelei le mafaufau a o amataina le polokalame. E manaʻomia ai se faamaopoopoga lelei a le tagata lava ia. O le ki autū la, o le vave sauniuni. Ia vave ona moe i le pō a o lumanaʻi le amataga o le tauaofiaga. Ia vave ona alausu, ina ia lava ai se taimi mo isi uma tagata o le tou vaega e tapenapena ai ma ia iai sina mea e talialo ai. Ia vave ona taunuu i le nofoaga e faia ai le tauaofiaga ina ia mafai ona maua sou nofoa ma fai uma isi mea e tatau ona faatino a o leʻi amataina le polokalame. E amata le polokalame o aso taʻitasi i le 9:30 i le taeao.

⁴ Talu ai o le fuafuaga autū lava mo le faapotopoto, ina ia vivii atu ai iā Ieova “i totonu o faapotopotoga,” e tatau ai ona amataina vaega taʻitasi i se tulaga e faamamaluina ai lo tatou Atua. (Sala. 26:12) E tusa ai o lena faamoemoe, ua faalaeiauina tagata uma ina ia alaala i o latou nofoa a o leʻi faasilasilaina atu le pese amata. E ōgatusa lena ma le timaʻiga a le Tusi Paia: “Ia faia mea uma lava ma le matagofie ma le sauni lelei.” (1 Kori. 14:40) O le ā le uiga o lena manatu mo i tatou taʻitoʻatasi? Pe a e tagaʻi atu ua alaala mai le taʻitaʻifono i luga o le pulelaa a o tātāina musika faalogologo na e faailoa mai ai o le a amata le polokalame, ia vave loa ona e taliu atu i lou nofoa. O lou faia faapena o le a mafai ai ona e usuina ma le loto atoa le pese lea e tomua ai vaega taʻitasi, ma sii aʻe ai le viiga iā Ieova.—Sala. 149:1.

⁵ A o Faagasolo le Polokalame: “Na saunia e Esera lona loto e saili i le tulafono a Ieova ma fai ai.” (Esera 7:10) E mafai faapefea ona tatou sauniunia o tatou loto ina ia talia faatonuga o loo saunia mai e Ieova? A o e autaluina matua o vaega eseese o loo lisi atu i le polokalame ua lolomia, ia fesili ifo iā te oe lava, ‘⁠O le ā se mea o loo fetalai mai ai Ieova iā te aʻu i lenei polokalame? E mafai faapefea ona ou faaaogā nei faamatalaga ina ia manuia ai aʻu ma loʻu aiga?’ (Isa. 30:21; Efe. 5:17) Ia faaauau ona e fesiligia na fesili a o faagasolo le tauaofiaga atoa. Ia fai sau faamaumauga o ni manatu autū e te fuafua e faaaogā. Ia faaalu se taimi e talanoaina ai na manatu i le faaiʻuga o polokalame i aso taʻitasi. O le a fesoasoani lena iā te oe e te taofimau ai ma faatatauina faamatalaga.

⁶ E ono avea o se luʻi le taumafai e uaʻi lelei atu mo le tele o ni itula. O le ā e mafai ona fesoasoani iā i tatou e teena ai le fealualuaʻi solo o le mafaufau? Ia faaaogā lelei le malosi o mata. I se tulaga tele, o mea e taulaʻi atu i ai o tatou mata, e tosina atu foʻi i ai ma o tatou mafaufau. (Mata. 6:22) O lea la, ia teena le naunautaʻiga o le tilotilo solo i so o se paʻō po o so o se minoi e ono tupu ane. Ia taulaʻi tasi atu ou mata i le failauga. Ia suʻe lau Tusi Paia ma mulimuli i ai a o faitauina se mau, ona tatala ai pea lea o lau Tusi Paia a o talanoaina le mau.

⁷ O le alofa faa-Kerisiano o le a tatou lē faalavelave ai i isi a o faagasolo le polokalame. (1 Kori. 13:5) O le taimi lena e “faalologo” ma fifilemu ai. (Fai. 3:7) O lea la, ia ʻalofia le tautala ma le minoi soo e aunoa ma se māfuaaga tatau. Ia faaitiitia le agaʻi soo atu i le faleese e ala i le muaʻi fai o na mataupu a o leʻi amataina le polokalame. Aua e te ʻai pe inu a o leʻi oo i le taimi ua faatulagaina mo lena fuafuaga, seʻi vaganā ni vala tugā e aafia ai le soifua mālōlōina. O i latou e aumai a latou telefoni feaveaʻi, o uaealesi, o meapuʻeata ma meapuʻeata vitiō, e lē tatau ona latou faaaogāina nei mea i se auala e faalavelave ai i isi. E tatau i mātua ona faia se fuafuaga mo lo latou aiga atoa—e aofia ai ma le fanau talavou—ia nonofo faatasi ina ia mafai ai ona la vaavaaia lelei le la fanau.—Faata. 29:15.

⁸ I le tausaga talu ai, na taʻua ai e se toeaina, o lē sa auai atu i ni tauaofiaga mo le tele o tausaga, e faapea: “Sa ou lagona, e iai se mea na matuā tulagaese ai lava lenei tauaofiaga. E toetoe lava o le aofia atoa sa fai a latou faamaumauga, e oo lava i le fanau laiti. O se vaaiga matagofie. Sa faaaogāina lelei Tusi Paia pe a valaaulia mai e failauga ina ia tatala a latou tusi i nisi o mau.” Ua matuā tatau lava ona avatu le faamālō i lena faalogologo lelei. E lē gata ina aogā iā i tatou ma isi o tatou uso o loo tatou auai faatasi i le tauaofiaga, ae o le silisili o na mea uma, e faamamaluina ai lo tatou Aʻoaʻo Sili, o Ieova le Atua.—Isa. 30:20.