Ua Faamaopoopoina i le “Matagofie ma le Sauni Lelei”
1 Ina ia taulau manuia se tauaofiaga itumalo, e tatau ona iai se tuufaatasiga o ni taumafaiga se tele. E fuafua e le pulega o le tauaofiaga se nofoaga talafeagai mo le faatasiga, faapea foʻi ma le faafesootaʻia o nofoaga e api ai pe a manaʻomia. E fai e tagata taʻitoʻatasi ma aiga a latou tapenapenaga mo auala e faimalaga ai, faapea nofoaga e api ai. Ma e faamaopoopo lelei e faapotopotoga a latou tagata o loo tauofo, ina ia faatulaga ai ni tagata mo le tele o matagaluega e manaʻomia mo le faagaoioiga o le tauaofiaga. O le sini ina ia “faia mea uma lava ma le matagofie ma le sauni lelei.”—1 Kori. 14:40.
2 A o e faafetaui atu au sauniuniga i taumafaiga a i latou o loo faamaopoopoina le tauaofiaga, ia teu i manatu e manaʻomia le tele o masina—o nisi taimi o tausaga—mo le faia o tapenapenaga. E toʻatele uso ua latou faaaluina le tele o taimi i le tau faatulagaina o mea. E aofia ai le totogia o fale ma mea e faaaogā, le aoaoina mai o mea e faaaogā, ma le saʻilia o i latou e faatinoina galuega. O nei muaʻi tapenapenaga e iʻu ai i faamanuiaga faaleagaga mo tagata uma. O le ā se mea e mafai ona tatou fai e fesoasoani atu ai?
3 Le Faiga o Fuafuaga mo Mea Tou te Api Ai: Pe a auai atu i tauaofiaga o loo vaaia e la tatou lālā, e masani iā i latou mai isi atumotu ona fai a latou fuafuaga mo api ma tagata o o latou aiga o loo nonofo i le aai lea e fai ai le tauaofiaga. O le tele o taimi, o nei tauaiga e lē o ni Molimau a Ieova. Pe a faatoʻā amata la fuafuaga mo na api, ia faamanino lelei iā i latou taimi o le a e auai atu ai i le tauaofiaga, ina ia lē faia ai nisi a latou fuafuaga mo oe i na taimi. Ia faamamafa foʻi i ai le manaʻomia tele ona lava sau mālōlōga i le pō a o leʻi malama aso taʻitasi o le tauaofiaga, ina ia ala lelei ai mo le polokalame. O lona uiga la, o le a e lē avanoa ai mo ni evaga uumi e faia i le pō.
4 I isi tulaga, atonu e fai sau fuafuaga e te nofo i se aiga o ni Molimau i le aai e faia ai le tauaofiaga. Ia faamautinoa ua e faafesootaʻia i latou a o leʻi taitai oo mai lena taimi, ina ia mautinoa o le a mafai ona e api ai i inā, ma faia ai ni fuafuaga maʻoti e aofia ai lou taunuu atu ma le taimi e te toe alu ese ai, ma pe toʻafia foʻi tagata o lou aiga o le a tou ō atu i ai. Pe afai e iai nisi o nei fuafuaga e toe suia, ia taumafai e vave ona faailoa atu i le aiga o loo fuafua o le a tou api ai.
5 E iai nisi taimi, tatou te ono fuafua ai e nonofo i se faletalimalo po o se isi falemautotogi. Pe afai ua uma ona tatou faamaʻoti le taofia o se avanoa i inā, e lelei pe a e matuā tausisi atu i lena fuafuaga pe afai e mafai. Pe afai e toʻatele i tatou e toe faalēaogāina a tatou avanoa na taofi pe faia nisi fuafuaga faaopoopo, o le a faapogaia ai le faalētonu i fuafuaga a le pulega o le faletalimalo, faapea foʻi i isi o tatou uso ma tuafāfine o ē atonu sa mananaʻo e maua ni o latou potu i lena lava faletalimalo. Atonu o le a faatalatū ai le pulega e toe faaavanoa mai ni potu mo isi a tatou tauaofiaga i le lumanaʻi, ona ua latou manatu faapea, ailoga foʻi a tatou faamaoni i a tatou taʻutinoga. Maʻeu le sili atu ona lelei pe a tatou faamaoni i a tatou upu, ia avea la tatou ‘Ioe, o le Ioe’!—Mata. 5:37.
6 Auala Autū e Mafai Ona Tatou Lagolagosua Ai: E iai mea faigofie e mafai ona tatou faia i le avea o se tagata usufono o le tauaofiaga, ina ia lagolagosua ai i fuafuaga a le tauaofiaga mo le taofia o potu e api ai. (1) Aua neʻi sili atu le aofaʻi o potu o se faletalimalo e te taofia, na i lo le aofaʻi o loo e fuafua e faaaogā. (2) Ia totogi atu le tiposi talafeagai e taofi ai lou potu. (3) Aua le faataugāina pe soona faia taumafa o loo maua fua mo le mālū taeao, na atonu e saunia ane mo mālō. (4) Ia manatua, ua talafeagai mo tagata e ana faletalimalo ona latou faatalitalia i tatou e usitaia a latou tulafono. (5) Ia feagai i se uiga faaaloalo ma onosai ma le ʻaufaigaluega a le faletalimalo. (6) Ia magafagafa i isi malo a le faletalimalo.
7 Ia Manatunatu i Nei Iʻuga Lelei: Ina ua māeʻa se tasi tauaofiaga, na taʻua ai e se tamāloa e puleaina se vaipanoa e tolauapi ai tagata, e faapea: “Ua ou mātauina le faamaoni tele o Molimau a Ieova i mea uma latou te faia. I le vaiaso talu ai, e toʻa 40 o i latou na nonofo i laʻu togalauapi, ma e aunoa ma se faafitauli na latou faatupuina. E na o i latou lava e ō mai ma taʻu mai, pe afai e iai se isi tagata e toe faaopoopo ane i se taavale toso po o se faleʻie e latou te faaaogāina. I loʻu lava la manatu, o i latou o ni tagata e sili ona lelei e mafai ona e faia i ai se auaunaga.” Maʻeu le matagofie pe a mafai ona maua se tulaga lelei faapena e i latou uma o loo tatou totogia a latou mea mo le faaaogāina! Maʻeu se molimau lelei o le a tuuina atu ai!
8 Ia Lagolagosua i Fuafuaga Muaʻi Faia mo le Faamamāina o le Maota a o Leʻi Oo i le Tauaofiaga: E masani lava ona faia e le matagaluega o loo faamaopoopoina le tauaofiaga, ni fuafuaga mo faapotopotoga ina ia latou fesoasoani i le faamamāina ma le faatulagaina o le maota, a o leʻi amataina le tauaofiaga. Pe afai e maua so tatou avanoa, e faaalia lo tatou lagolagosua e ala i le loto malie e galulue faatasi ma la tatou faapotopotoga.
9 Talu ai o i tatou o auauna a Ieova le Atua, ua iā i tatou la le avanoa e faaatagia atu ai ona uiga totino i mea uma tatou te faia. E aofia ai i lenei itu le faia o fuafuaga mo le auai atu, faapea foʻi ma le auai ai, i tauaofiaga o loo aofia ai le suafa o le Atua. Ia manatua, “e le o le Atua ia o le faasoesa [“lē maopoopo,” NW], a o le filemu.” (1 Kori. 14:33) O lea, seʻi o tatou maumauaʻi ina ia iloa mai e tagata uma o loo mātau mai, lenei uiga e faatatau iā Ieova, e ala i mea o loo latou vaaia mai iā i tatou—a tatou amioga ma uiga, a o tatou fuafua ma auai atu ai, i le Tauaofiaga Itumalo o “Faiaʻoga o le Afioga a le Atua.” Talosia ia iloa e tagata lotofaamaoni o loo maimoa mai e faapea, o faapotopotoga o tagata o Ieova ua faamaopoopoina i latou “i le matagofie ma le sauni lelei.”—Sala. 68:26.