Lipotiina o le Galuega o Toe Asiga ma Suʻesuʻega Faale-Tusi Paia
1 O se fiafiaga tele le faia o toe asiga ma suʻesuʻega faale-Tusi Paia, i le fesoasoani i ē naunau ina ia agaʻigaʻi i luma faaleagaga! Ae pe o tatou malamalama manino i le mea e ao ona lipotiina i le Lipoti o le Auaunaga i le Fanua e tusa ai ma toe asiga ma suʻesuʻega faale-Tusi Paia?
2 Toe Asiga: Ua faapea mai le tusi Our Ministry: “A lipotiina ‘Toe Asiga,’ faitau le aofaʻi o taimi na faia ai toe asiga mo le fuafuaga ina ia atiina aʻe atili le fiafia sa muaʻi faaalia e tagata e lē o ni Molimau tuuina atu ma papatisoina. . . . E lē tau avea le toe asiga o se asiasiga i le fale o se tagata, ae e mafai foʻi ona aofia ai le faia o se tusi, se telefoni, po o le tilivaina o lomiga, e pei o lomiga fou o mekasini. O taimi uma e faia ai se suʻesuʻega faale-Tusi Paia i aiga, e tatau ona faitau o se toe asiga. Ina ia tauina o se toe asiga, e manaʻomia ona faafesootaʻia le tagata tonu na muaʻi faaalia le fiafia.” E faaopoopo i ai, e mafai ona e faitauina toe asiga i tagata papatiso “o loo e faia ai se suʻesuʻega faale-Tusi Paia i aiga ma se uso po o se tuafafine ua lē o toe talaʻi e tusa ai ma le faatonuga mai se tasi o le Komiti o le Auaunaga a le Faapotopotoga. E mafai foʻi ona e lipotia toe asiga mo suʻesuʻega o loo faia ma se tagata fou faatoʻā papatiso o lē o loo manaʻomia mo se taimi puupuu se fesoasoani.”—itu. 102-103; tagaʻi foʻi i le w96 1/15, itu. 19-20, pala. 19; km 11/98 itu. 7; km 6/00 itu. 4.
3 Suʻesuʻega Faale-Tusi Paia: O loo aumaia e le tusi o le Our Ministry le taʻiala lenei e faatatau i suʻesuʻega faale-Tusi Paia: “I le faaiʻuga o masina taʻitasi, faamolemole faatumu se pepa Lipoti o Suʻesuʻega mo suʻesuʻega faale-Tusi Paia taʻitasi uma i aiga, na e faia a o faagasolo le masina, ma tagata e lē o ni Molimau tuuina atu ma papatisoina.” (E mafai foʻi ona e lipotia suʻesuʻega faale-Tusi Paia ma tagata papatiso e tusa ai ma tulaga e lua e pei ona taʻua i le palakalafa e 2.) “A māeʻa ona faatumu atoatoa ma saʻo pepa taʻitasi, tusi le aofaʻi o nei suʻesuʻega faale-Tusi Paia i le pusa i le pito i lalo i le itu taumatau o lau pepa Lipoti o le Auaunaga i le Fanua. O le a tutusa le aofaʻi o suʻesuʻega na e tusia i le pepa Lipoti o le Auaunaga i le Fanua ma le aofaʻi o pepa Lipoti o Suʻesuʻega o le a e tuuina atu.”—itu. 103.
4 E mafai ona e amata lipotiina se suʻesuʻega fou faale-Tusi Paia i aiga pe afai ua faalua ona faia talu mai le uluaʻi asiga lea na faataʻitaʻia ai le fuafuaga o le suʻesuʻega, ma o loo iai māfuaaga e talitonu ai o le a faaauau le suʻesuʻega. Afai e tulaʻi mai tulaga e manaʻomia ai ona alu se isi tagata talaʻi e ō ma lē o loo faia le suʻesuʻega, ma e faia uma so la sao uigā i le suʻesuʻega, e mafai la e i laʻua uma ona tauina le taimi, peitaʻi, e na o le faisuʻesuʻega e lipotia le toe asiga ma le suʻesuʻega faale-Tusi Paia.—Tagaʻi i le km 4/87, itu. 4.
5 E mafai e se matua ona lipotia se suʻesuʻega faale-Tusi Paia faaleaiga e faifai pea pe afai o loo aofia ai sui e leʻi papatisoina. E tasi le itula ma le toe asiga e tasi e mafai ona tauina i vaiaso taʻitasi e faia ai le suʻesuʻega. O le mea moni, atonu e sili atu le taimi e faaaluina e mātua e fesoasoani faaleagaga ai i a latou fanau e tusa ai ma o latou manaʻoga, peitaʻi e lē lipotiina lenei taimi faaopoopo o se taimi o le auaunaga i le fanua.—Tagaʻi i le km 6/83 itu. 4.
6 O le manatuaina o nei manatu o le a mafai ai e i tatou uma ona faia ni lipoti e saʻo ma atoatoa, ina ia maua se ata saʻo o mea o loo ausiaina i le faiva i le fanua i masina taʻitasi.