Polokalame Fou mo le Aso Faapitoa o Fonotaga
1 A o viiviia e le ʻaufaasalalau o tala fou ma faiaʻoga o aʻoaʻoga masani le tamaoaiga faaletino, ua uunaʻia malosi i tatou e le Afioga a le Atua ina “Ia Tamaoaiga i Galuega Lelei.” (1 Timo. 6:18) O le matua lenā o le aso faapitoa o fonotaga e amata iā Setema 2002. O ā ni faalaeiauga o le a tatou maua i lenei fonotaga?
2 O le a talanoaina e le ovasia o le matagaluega le uiga o le matua, “Ia Tamaoaiga Mai le Silafaga a le Atua,” ma o le a ia faatalanoaina nisi o ē o loo faamalosia i latou lava ina ia maua ʻoa faaleagaga. I lana uluaʻi lauga o le aso, o le a faailoa mai ai e le failauga asiasi le auala o loo faatinoina ai e tagata o le Atua ia “Galuega Lelei i Lenei Taimi o le Seleselega.” O le a faalaeiauina ai i tatou taʻitoʻatasi ina ia manatunatu i le auala e mafai ai ona tatou faia se sao atoatoa i le galuega o le seleselega ua tofia mai e le Atua, lea ua faataunuuina i aso nei.
3 Maʻeu lo tatou fiafia pe a tatou vaavaai atu i talavou Kerisiano o saʻilia ʻoa faaleagaga! O lenei mea e faamamaluina ai Ieova ma fesoasoani ai i talavou ina ia faataatia se faavae lelei mo ni faaeaga o le auaunaga mo le lumanaʻi. O le lauga, “E Faamālō i Talavou mo Galuega Lelei i le Viiaina o Ieova” o le a faamatilatila ai galuega lelei ua faia e talavou Kerisiano i le faapotopotoga.
4 O ā iʻuga o le saʻilia o galuega lelei? O le a talanoaina e le failauga asiasi lenei fesili i lana lauga faaiʻu, “Ia Faaauau i Galuega Lelei ma Seleseleina Faamanuiaga Mai iā Ieova.” O le a ia talanoaina ai vala e fā ia e mafai ona tatou seleseleina mai ai le tele o faamanuiaga: (1) o ni tagata taʻitoʻatasi, (2) o ni ʻauaiga, (3) o se faapotopotoga, ma (4) o se faalapotopotoga i le lalolagi aoao.
5 O i latou o ē ua faia se tuuina atu iā Ieova, o le a maua le avanoa e papatisoina ai. Pe afai ua e nofosauni e faia lenā laasaga, ia vave faailoa atu i le ovasia taʻimua.
6 Pe a faasilasila atu le aso e faia ai le fonotaga i lo outou vaipanoa, ia vave ona faia ni fuafuaga maʻoti ina ia auai. Ia taumafai e taunuu vave ina ia auai i le pese ma le tatalo amata. O le auai ma faalogologo lelei i le polokalame atoa o le aso faapitoa o fonotaga, o le a faamalosia ai i tatou ina ia faaauau pea ona uia se auala e matuā faatamaoaigaina ai, e tusa ma le silafaga a lo tatou Atua o Ieova.