Ua Agaʻi i Luma le Polokalame o le Fausiaina o Maota o le Malo
1 I le 1983 i le Tauaofiaga Itumalo, “Autasi o le Malo” i le Iunaite Setete, na faasilasila mai ai o le a faia se faaputuga tupe faapitoa e fesoasoani i le fausiaina ma le faafouina o Maota o le Malo i le Iunaite Setete atoa ma Kanata. Sa aunoa ma so tatou iloa faamanuiaga o le a maua mai i sea amataga faatauvaa. Na amata ona tatou iloa lelei ai le saʻo o le faamatalaga o loo aumaia i le Salamo 92:4 e faapea: “Auā ua e faafiafia mai ia te aʻu i lau galuega, Ieova e; ou te alaga fiafia ona o mea ua faia e ou aao.”
2 Ua matuā faafiafiaina nei i tatou ona o mea ua mafai ona faataunuuina. I aso nei, ua matuā faateleina i le lalolagi atoa le polokalame o fausaga o Maota o le Malo. I nisi o auala, ua maua ai e i tatou uma le faaeaga o le faia o se sao i lenei galuega. Ua tatou faia faapea e ala i le foaʻiina atu o ni tupe, pe tele pe itiiti, e fesoasoani ai i le faatupeina o le fausiaina o le tele o nofoaga mo le tapuaʻiga i le lalolagi aoao. Ua tauofo mai foʻi e le toʻatele o uso a latou meafaigaluega faapea o latou taimi, tomai, ma agavaa, e faatinoina ai ia polokalame. Ona o le taʻitaʻiga, fesoasoani, ma le anoanoaʻi o faamanuiaga mai iā Ieova, ua taulau ai a tatou taumafaiga autasi.—Salamo 127:1.
3 E tele lālā ua mulimuli i le fuafuaga na uluaʻi faavaeina mo faapotopotoga i le Iunaite Setete. I Maota o le Malo i le tele o atunuu, e iai ni pusa e tuu i ai e tagata talaʻi a latou meaalofa mo le Faaputuga Tupe mo Maota o le Malo. Na faasilasila mai i La Tatou Faiva o le Malo o Mati 1997 mo le Iunaite Setete se suiga i lenei polokalame. Ua faapea mai: “Talu lava ona faavaeina le Faaputuga Tupe a le Sosaiete mo Maota o le Malo i le 1983, ua foaʻi ai ma le matamau e uso, i lea, ua mafai ai ona faia ni nogātupe mo le fausiaina o Maota o le Malo. E tusa ma le 2,700 faapotopotoga i lenei atunuu ua aogā i ai lenei fuafuaga. Ana lē seanoa lea fesoasoani e lē mafai ona fausiaina le tele o maota fou o le Malo pe toe faaleleia maota o loo manaʻomia ona faafouina. Ua manaʻomia vave ai nei ona faaaogā nisi o ia faaputuga tupe e faia ai ni nogātupe a faapotopotoga i atunuu e lē lelei le tamaoaiga. E matuā talisapaia ma le fiafia e le Sosaiete faapea faapotopotoga o loo aogā i ai a outou meaalofa tauofo, le faaauau pea o la outou lagolagosua i lenei fuafuaga.”
4 O lenā faasilasilaga sa avea o se valaaulia ina ia faia ai se sao i lenei polokalame ua faateleina o le fausiaina o Maota o le Malo. O le a faalauteleina atu lenei Faaputuga Tupe mo Maota o le Malo e aofia ai ma o tatou uso i isi atunuu, a o faia ai pea foʻi nogātupe mo le fausiaina o Maota o le Malo i Amerika. Ua taʻua i se isi mataupu i La Tatou Faiva o le Malo o Aokuso 1997 e faapea: “O loo manaʻomia pea ona fausiaina Maota o le Malo i le lalolagi aoao. I le faagasologa o le tausaga faaleauaunaga ua mavae, e 3,288 faapotopotoga fou na faavaeina ai. O le tele o nei faapotopotoga e i Aferika, Asia, Amerika Tutotonu, Amerika i Saute, ma Europa i Sasaʻe.”
5 O ā ni iʻuga ua iai talu mai lenā taimi? Ua faamatala mai i le Yearbook 2001 e faapea: “E tusa ai ma lenei fuafuaga, e oo mai i le taimi nei, e 30 atunuu ua māeʻa ona fausiaina Maota o le Malo e 453, ma le isi 727 o loo fausiaina pea. Ua tuu ai le faamuamua i le fausiaina o Maota o le Malo talafeagai e tusa ma le tulaga ma mea faufale o loo maua i le atunuu lava ia. I Kenya, e faaaogā ai maa mai vilimaʻa; i Togo e faaaogā ai piliki laiti; i Cameroon, o piliki lapopoʻa e faalamolemole mulimuli ane. O le auala lenei ua vave ai ona maua e uso i le atunuu ia tomai ina ia tauaveina tulaga manaʻomia i lenei polokalame o faugāfale i le atunuu.”
6 Ua vaaia faamanuiaga a Ieova i lenei polokalame i le konetineta tele o Aferika. Seʻi manatu i le telē o le aafiaga ua faia e na faugāfale i le galuega a Molimau a Ieova, a o e matamata i ata o nisi o Maota o le Malo ua uma ona fausiaina. E faamaonia lenei mea i vala patino e tolu—le autasi o o tatou uso i le lalolagi aoao, le aafiaga i le nuu, ma le faatelega i tagata auai i sauniga a le faapotopotoga. A o faamatilatila e lenei faaopoopoga le fausiaina o Maota o le Malo i Aferika, o le a faasilasila atu i isi lomiga o La Tatou Faiva o le Malo i le lumanaʻi le auala o loo agaʻi ai i luma le polokalame o faugāfale i isi vaega o le lalolagi.
[Ata i le itulau 3]
MALO O AFERIKA TUTOTONU
Bimbo, Bangui
Begoua, Bangui
[Ata i le itulau 4]
Ukonga, Tanzania
[Ata i le itulau 4]
Accra, Ghana
[Ata i le itulau 4]
Salala, Liberia
[Ata i le itulau 4, 5]
Allada, Benin—Maota o le Malo sa iai muamua
Allada, Benin—maota fou o le Malo
[Ata i le itulau 4]
Karoi, Zimbabwe
[Ata i le itulau 5]
Kpeme, Togo
[Ata i le itulau 5]
Sokodé, Togo
[Ata i le itulau 4, 5]
Fidjrosse, Benin
[Ata i le itulau 6]
Lyenga, Zambia—Maota o le Malo muamua
[Ata i le itulau 6]
Lyenga, Zambia—maota fou o le Malo
[Ata i le itulau 6]
Kinshasa, Congo
[Ata i le itulau 6]
Musambira, Rwanda