Pusa Fesili

◼ Pe ioeina e le “auauna faamaoni ma le mafaufau” ni vaega tumaʻoti a ni Molimau o ē o loo faatasitasi e faia ni suʻesuʻega loloto o le Tusi Paia po o ni felafolafoaʻiga?—Mata. 24:45, 47.

O le tali, e leai. Ae peitaʻi, i nisi vaipanoa o le lalolagi, e iai ni tagata toʻalaiti mai le faalapotopotoga ua latou faatū ni vaega ma fai a latou lava suʻesuʻega loloto i mataupu faale-Tusi Paia. O nisi ua fai ni a latou lava vaega e suʻesuʻeina vaega faa-Eperu ma le faa-Eleni o le Tusi Paia, ina ia iloilo ai le saʻo o le New World Translation. O nisi ua faia ni suʻesuʻega loloto i mataupu faasaienisi e fesootaʻi atu i le Tusi Paia. Ua latou faia ni fesootaʻiga i komepiuta (Web sites ma chat rooms) ina ia fetufaaʻi ma felafolafoaʻi ai o latou manatu. Ua faia foʻi ni a latou faatasitasiga ma saunia ni lomiga e faaalia ai mea ua latou iloa, e faaopoopo i mea ua maua mai i a tatou sauniga faa-Kerisiano ma a tatou lomiga.

I le lalolagi aoao, ua maua e tagata o Ieova le tele o taʻiala ma faalaeiauga mai sauniga a le faapotopotoga, o fonotaga, ma tauaofiaga, aemaise foʻi lomiga mai le faalapotopotoga a Ieova. I le taʻitaʻiga a lona agaga paia ma e faavae i lana Afioga le upu moni, ua saunia ai e Ieova mea manaʻomia ina ia mafai e tagata uma o le Atua ona “maopoopo lava i le loto e tasi ma le manatu e tasi,” ma ia faaauau pea ona “faatumauina i le faatuatua.” (1 Kori. 1:10; Kolo. 2:6, 7) Tatou te talisapaia sauniuniga faaleagaga a Ieova mo nei aso e gata ai. O lea la, e lē lagolagoina e le “auauna faamaoni ma le mafaufau” so o se lomiga, sauniga, po o fesootaʻiga i komepiuta e leʻi faia pe saunia i lalo o lana taʻitaʻiga.—Mata. 24:45-47.

E faamālō iā i latou e mananaʻo e faaaogā o latou tomai e lagolago ai le tala lelei. Peitaʻi, e lē tatau i so o se taumafaiga a se tagata lava ia ona faalēaogāina ai mea o loo faataunuu e Iesu Keriso, e ala i lana faapotopotoga i le lalolagi i aso nei. I le uluaʻi senituri, na lapataʻi mai le aposetolo o Paulo e faatatau i le aafia i mea e alu lē aogā ai le taimi, e pei o “tala i gafa e leai ni ona gataaga, o mea ia e tupu ai finauga, a e lē o le aʻoaʻoga mai le Atua o loo i le faatuatua.” (1 Timo. 1:3-7) E tatau i Kerisiano uma ona taumafai e “taumamao ma saʻiliga valea ma tala tupuga, ma le femisaʻiga, ma le fefinauaʻiga i la le tulafono; auā o upu lē aogā ia ma le faatauvaa.”—Tito 3:9.

Mo ē e fia fai ni suʻesuʻega loloto ma saʻiliili atili i mataupu faale-Tusi Paia, e fautuaina le suʻesuʻe i le Insight on the Scriptures, “All Scripture Is Inspired of God and Beneficial,” ma isi lomiga o loo talanoaina ai valoaga a le Tusi Paia e pei o le tusi o Tanielu, Isaia, ma le Faaaliga. Ua lava ma totoe nei mea mo suʻesuʻega faale-Tusi Paia ma ia mafaufau loloto i ai, lea e mafai ona “atoatoa ona [tatou] iloa lelei o lona [Atua] finagalo i le poto uma atoa ma le mafaufau faaleagaga; ia outou savavali e tusa ma le Alii, ina ia fiafia mai o ia iā te outou i mea uma, ma ia outou fua mai galuega lelei uma lava, ma ia tupu pea lo outou iloa lelei o le Atua.”—Kolo. 1:9, 10.