Le Faaaogāina o le Initineti—Ia Mataalia i Ona Lamatiaga!

¹ E olioli tagata o Ieova i aufaatasiga lelei o le tasi ma le isi. E latou te olioli e fetufaaʻi mea tutupu mai le faiva i le fanua ma talisapaia le faalogo atu i mea tutupu e fesootaʻi atu i Molimau a Ieova ma le galuega o le Malo i le lalolagi aoao. E latou te mananaʻo e logoina i latou e faatatau i so o se mea matilatila e ono tupu i o tatou uso, e pei o se faalavelave mataʻutia po o se mala faalenatura, ma latou te mananaʻo e fia iloa pe iai se mea e mafai ona latou faia e fesoasoani ai. O lena naunau e faaalia ai le autasi faaleauuso, ma faamaonia ai tatou te fealofani moni lava.—Ioa. 13:34, 35.

² I aso nei, ua vave tele ona tatou faalogo i mea e tutupu i le lalolagi. O faasalalauga i leitiō ma televise, ua aumai tuusaʻo ai i le ʻau faalogologo faamatalaga auiliili o mea o loo tutupu, i le lalolagi aoao. Ua mafai foʻi i telefoni ona fesootaʻi vave atu ai i tagata i le lalolagi aoao. O se mea mataʻina i le taimi nei i mea tau fesootaʻiga lea ua matuā maoaʻe lona faaaogāina, o le Initineti (Internet).—Tagaʻi i le Awake!, Iulai 22, 1997.

³ O le fausiaina o le telefoni na tatala ai le ala i fesootaʻiga totino televavave i le lalolagi atoa. E ui ina aogā tele le telefoni, ae manaʻomia le faaeteete i le auala o loo faaaogā ai, ona e mafai ona avea ma auala e faia ai fesootaʻiga po o gaoioiga lē saʻo, ma o le soona faaaogā o le telefoni e taugatā tele. E aogā televise ma leitiō i tulaga tau aʻoaʻoga. Ae faanoanoa lava, ona o le tele o ona polokalame ua faaleagaina ai amioga mamā, ma o le uaʻi atu i ai ua maʻimau ai le taimi. Ua faatonuina i tatou e le atamai ina ia matuā filifili totoʻa i le faaaogāina o televise ma leitiō.

⁴ O le Initineti e mafai ai e se tasi ona faia ni fesootaʻiga taugofie ma le faitau miliona o isi tagata i le lalolagi atoa, ma ua tatalaina ai le avanoa mo le mauaina o le anoanoaʻi o faamatalaga. (Awake!, Ianuari 8, 1998) Peitaʻi, o le faaaogāina saʻoloto o le Initineti, e mafai ona tuuina ai se tagata i ni lamatiaga tetele faaleagaga ma tau amio. E mafai faapefea lenei mea?

⁵ Ua popole le toʻatele e faatatau i faamatalaga ua mafai ona maua o loo faaalia ai le auala e fausia ai meatau, e aofia ai pomu. Ua faaseā i latou o i pulega o falegaosimea e faatatau i le tele o le taimi ua faamaʻimau e tagata faigaluega i le faaaogāina o le Initineti. E anoanoaʻi mea ua taʻuina mai i a tatou lomiga e faatatau i lamatiaga manino faaleagaga ua iloaina i le Initineti. O le tele o fesootaʻiga faakomepiuta (Web) o loo faaalia ai faiga sauā ma faiga lē mamā faaleituaiga ia e matuā lē fetaui lava mo Kerisiano. (Sala. 119:37) E faaopoopo atu i nei lamatiaga, o loo iai se isi lamatiaga faalilolilo lea e manaʻomia patino lava e Molimau a Ieova ona leoleomalu i ai. O le ā lenei lamatiaga?

⁶ Pe e te valaaulia ea se tagata ese i lou aiga e aunoa ma le iloaina muamua po o ai o ia? Ae faapefea pe afai e leai se auala e iloa ai? Pe o le a e faatagaina ea lena tagata ese e tuua na o ia ma lau fanau? O se tulaga lenei e lē mafesiligia lona tupu mai o loo maua i le Initineti.

⁷ O meli e lafo i komepiuta e mafai ona lafo atu ma maua mai i tagata e te lē iloa. E faapena foʻi pe a tou talanoa e ala i komepiuta i se nusipepa po o fesootaʻiga i komepiuta e taʻua o le potu o fetalanoaaʻiga (chat room), lea e faaaogā ai igoa faaopoopo e feaveaʻi ai feʻau mai le tasi tagata i le isi. O i latou e faia nei fetalanoaaʻiga e ono faapea mai i nisi taimi o i latou o ni Molimau a Ieova, ae masani lava e leai. E faapea mai se tasi o ia o se talavou ae lē moni. Po o le taʻu faasesē mai foʻi e se tasi o ia o le isi ituaiga.

⁸ O faamatalaga e tuuina mai ia te oe e ono faaoo mai i ni faamatalaga o mea na tutupu po o faamatalaga e faatatau i o tatou talitonuga. O nei faamatalaga ua tuuina atu foʻi i isi tagata, ma faaauau ai lava ona tuu atu i isi. O faamatalaga e masani lava ona lē faamaonia ma atonu e lē saʻo. O faamatalaga faapea atonu o se ufiufi mo le faasalalauina o manatu faaaposetate.—2 Tesa. 2:1-3.

⁹ O le manatuaina o lenei lamatiaga, e tatau ai, pe afai e te faaaogāina le Initineti, ia e fesili ifo ia te oe lava: ‘O le ā le mea ou te faaaogāina i ai le Initineti? Po o iai ea se avanoa e ono faaleagaina ai aʻu faaleagaga i le auala o loo oʻu faaaogāina ai? Po o le a fai ai ea saʻu vaega i le faaleagaina faaleagaga o isi?’

¹⁰ Le Vaega o le Initineti mo “Molimau a Ieova”: Mo se faaaʻoaʻoga, seʻi mafaufau i nisi o vaega o le Initineti ua fai e ni tagata o loo faapea mai o ni Molimau a Ieova. Latou te valaaulia oe e fesootaʻi atu i a latou komepiuta e faitau i mea tutupu na lafo atu i ai e nisi o loo faapea mai o ni Molimau. Latou te faalaeiʻauina oe e tufa atu ou manatu ma taofi e faatatau i lomiga a le Sosaiete. O nisi latou te fautuaina mai ni taulimaga e mafai ona faaaogā i le faiva i le fanua. O nei vaega o le Initineti ua tatala atu ai i tagata taʻitoʻatasi avanoa tau fesootaʻiga faakomepiuta (chat room) e fesootaʻi ai, e mafai ai ona fesootaʻi ma isi i lena lava taimi, e talitutusa ma le talanoa atu i le telefoni. E masani ona latou taʻu atu ia te oe isi vaega o le Initineti lea e mafai ona e fesootaʻi atu ai ma Molimau a Ieova i laina o fesootaʻiga i le lalolagi aoao. Ae pe mafai moni ea ona e iloa o nei fesootaʻiga e lē o faia faalilolilo e aposetate?

¹¹ O fesootaʻiga e ala i le Initineti atonu e lē talafeagai ma le fautuaga o loo maua i le Efeso 5:15-17. Na tusi le aposetolo o Paulo e faapea: “Ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga. O lenei, aua neʻi faavalea outou, a ia outou iloa le finagalo o le Alii.”

¹² O le faapotopotoga Kerisiano o le auala faatiokarate lea o loo fafagaina ai i tatou faaleagaga e “le auauna faamaoni ma le mafaufau.” (Mata. 24:45-47) I totonu o le faalapotopotoga a le Atua, ua tatou mauaina ai taʻiala ma le puipuiga ina ia tatou vavae ese mai ai pea i le lalolagi faatasi ai ma le uunaʻiga ia tumau i le pisi i le galuega a le Alii. (1 Kori. 15:58) Na faaalia e le faisalamo faapea na ia maua le fiafia ma se faalogona o le saogalemu i le iai faatasi ma tagata ua faapotopotoina o le Atua. (Sala. 27:4, 5; 55:14; 122:1) Ua saunia foʻi e le faapotopotoga le lagolagosua faaleagaga ma le fesoasoani mo i latou o loo aufaatasi atu i ai. Iinā, e mafai ona e mauaina ai se vaega o uō e alolofa, e manatu mamafa, ma tausia lelei oe—o tagata e te iloa totino o ē nofo sauni ma naunau e fesoasoani ma faamāfanafana i isi i taimi o puapuagā. (2 Kori. 7:5-7) Ua puipuia tagata o le faapotopotoga e ala i sauniuniga faale-Tusi Paia o le faateʻaina o i latou ua agasala ma le lē salamō po o le uunaʻia atili o mafaufauga faaaposetate. (1 Kori. 5:9-13; Tito 3:10, 11) Pe mafai ea ona tatou faatalitalia le mauaina o nei lava faatulagaga alofa pe a auaufaatasi ma isi e ala i le Initineti?

¹³ Ua mautinoa le tuufaafeagai o lea tulaga. O nisi o vaega o Fesootaʻiga i le Initineti ua manino lelei le avea ma auala e faaalia ai manatu faaaposetate. Atonu e faafitia e na vaega o Fesootaʻiga i le Initineti lea tulaga, ma o na aposetate o loo totogia fesootaʻiga latou te ono aumaia se faamatalaga auiliili e faamautinoa mai ai o i latou moni lava o Molimau a Ieova. Latou te ono talosagaina foʻi ni faamatalaga mai ia te oe ina ia e faamautinoa atu ai foʻi pe o oe o se Molimau a Ieova.

¹⁴ E finagalo Ieova ia e gaoioi ma le faautauta. Aiseā? Auā ua ia silafia o le a puipuia ai oe mai lamatiaga eseese. Ua amata le Faataoto 2:10-19 i le faapea mai: “A oo le poto i lou loto, ma ua mālie ia te oe le atamai; e faafeao le mafaufau ia te oe; e leoleo ia te oe le faautauta.” Leoleo oe mai le ā? Mai mea e pei o “le ala leaga,” i latou ua tuua ala tonu, ma tagata o ē faia amioga lē mamā ma faapiopio i o latou ala masani.

¹⁵ Pe a tatou ō atu i le Maota o le Malo, e lē fesiligia lo tatou iai faatasi ma o tatou uso. Tatou te iloa i latou. E lē tau manaʻomia se faamautinoaga o lenei mea auā ua manino mai le faaalia o le alofa faaleuso. E lē o manaʻomia totino i tatou e tuuina atu ni faamaoniga e faamaonia ai o i tatou moni lava o ni Molimau a Ieova. O iinei lea tatou te maua i ai fetufaaʻiga moni o faalaeiʻauga na tautala i ai Paulo i le Eperu 10:24, 25. O vaega o Fesootaʻiga i le Initineti lea e uunaʻia ai le faia o auaufaatasiga e ala i komepiuta e lē mafai ona faalagolago atu i ai mo le aumaia o lenei faalaeiʻauga. O le manatuaina o upu o le Salamo 26:4, 5 e mafai ai ona tatou mataalia i lamatiaga ia e faigofie ona tatou fetaiaʻi pe a faaaogāina vaega o Fesootaʻiga i le Initineti.

¹⁶ E leai ni tapulaa po o ni faasāsāga i ituaiga o faamatalaga o loo iai ma mauaina e i latou o loo faaaogāina le Initineti. E masani lava, o tamaiti laiti ma le ʻau talavou ua faigofie ona avea ma taulaʻiga o soligātulafono ma faiga lē tonu i lenei vaipanoa. O tamaiti e talitonugofie, e fiailoa, ma naunau e suʻesuʻe atili i le lalolagi fou o cyberspace. O lea la e manaʻomia ai i mātua ona vaavaaia lelei a latou fanau ma tuuina ia i latou taʻitaʻiga lelei faale-Tusi Paia e faatatau i le faaaogāina o le Initineti, e pei lava ona latou tuuina atu taʻiala i a latou fanau i le filifilia o musika po o āta tifaga.—1 Kori. 15:33.

¹⁷ E faanoanoa lava, ona o nisi sa avea muamua ma uso ma tuafāfine sa tatau ona faateʻaina ona o aufaatasiga na amata i le feiloaʻi atu i tagata o le lalolagi i ala o fesootaʻiga i le Initineti ma oo atu ai lava i amioga lē mamā faaleituaiga. I le matuā faateʻia i le lē talitonu, na tusi toeaina e faapea, o nisi ua oo ina tuua moni a latou tane po o avā ina ia tulituliloa se faiā ua fai ma se isi tagata, lea na amataina i le Initineti. (2 Timo. 3:6) O isi ua latou lafoaʻia le upu moni ona ua talitonu i faamatalaga na aumaia e aposetate. (1 Timo. 4:1, 2) Pe a fua atu i nei lamatiaga ogaoga, pe lē foliga talafeagai ea la le faaeteete i le oo ina aafia ai i fetalanoaaʻiga i ala o fesootaʻiga i le Initineti? O le mea moni, o le faaalia o le atamai, le poto, le tomai faalemafaufau, ma le faautauta o loo taʻua i le Faataoto 2:10-19 e ao ona puipuimaluina ai i tatou mai lenei mea.

¹⁸ Ua mātauina, o loo iai ni tagata ua latou fafauina aʻe vaega o Fesootaʻiga i le Initineti e faafoliga e talaʻia ai le tala lelei. O le tele o nei fesootaʻiga o loo lagolagoina e uso lē faautauta. O isi fesootaʻiga e ono lagolagoina e aposetate o ē mananaʻo e maileia i latou o nonofo faatalanoa. (2 Ioa. 9-11) I se faamatalaga pe faamata e iai se manaʻoga mo o tatou uso e faia ai na Fesootaʻiga faakomepiuta, na taʻua i La Tatou Faiva o le Malo, Novema 1997, itulau 3, e faapea: “E lē manaomia mo so o se tasi ona saunia e ia lava ni faamatalaga e tuuina atu i totonu o lenei polokalame (Initineti) e faatatau i Molimau a Ieova, i a tatou gaoioiga o meafai, pe i o tatou talitonuga. O lo tatou tuatusi o fesootaiga ua faamaonia o le [www.watchtower.org] ua tuuina ai faamatalaga ua saʻo aʻiaʻi mo so o se tasi na te manaomia.”

¹⁹ O ā Fesoasoani mo Suʻesuʻega ua Faaauala Mai i le Initineti? Ua lagona e nisi faapea ua latou tuuina atu se auaunaga i uso e ala i le lafoina atu o faamatalaga ua uma ona sailia lelei e fesootaʻi atu i gaoioiga eseese faatiokarate. Mo se faaaʻoaʻoga, e ono faia e se tasi ni sailiiliga e faavae i se auivi o le lauga i le lautele ma lafoina lenei faamatalaga, i le manatu faapea o ia faamatalaga o le a aogā ia i latou o ē mananaʻo e sauniunia le auivi lava lea e tasi. O isi o le a latou lafoina atu mau uma mo se Suʻesuʻega o Le Olomatamata o loo sosoo mai po o le saunia mai o lomiga o loo faavae mai ai mataupu mo le Aʻoga o le Faiva Faatiokarate po o le Suʻesuʻega Tautusi a le Faapotopotoga. E ono ofoina mai e nisi ni fautuaga mo ni taulimaga i le faiva i le fanua. Pe aogā moni ea na sailiiliga?

²⁰ O lomiga ua saunia mai e le faalapotopotoga a Ieova e faagaee ai i o tatou mafaufau ni manatu e ati aʻe ma toleniina ai i tatou “e iloa ai le lelei ma le leaga.” (Epe. 5:14) Pe mafai ea ona tatou faapea atu ua tatou faataulauina lenei mea pe afai e faia e isi sailiiliga mo i tatou?

²¹ Sa taʻua tagata Perea e “sili ona amio lelei o i latou nei i tagata Tesalonia.” Aiseā? Auā “ua latou talia le upu ma le fiafia tele, ua saili i Tusi i lea aso ma lea aso, pe moni ia mea.” (Galu. 17:11) E ui lava sa talaʻi atu Paulo ma Sila ia i latou, ae sa ono lē mafai lava ona avea le upu moni ma a latou mea totino pe a lē aafia totino ai.

²² O le faaaogāina o sailiiliga a le isi tagata mo se lauga po o isi foʻi sauniuniga mo sauniga e faalēaogāina moni ai le fuafuaga o le suʻesuʻega totino! Pe lē o lou faanaunauga ea le atiina aʻe o lou lava faatuatua i le Afioga a le Atua? E faavae i lenei faatalitonuina totino, e mafai ona e faia se faalauiloaga faalauaʻitele o lou faatuatua—i au lauga, o au tali i sauniga, ma i le faiva i le fanua. (Roma 10:10) O le faaaogāina o sailiiliga a le isi tagata e lē fetaui ma le faamatalaga i le Faataoto 2:4, 5 ina ia ‘faaauau ona sailiili ma suʻesuʻe i le poto e uiga i le Atua e pei ona suʻe i le oloa lilo.’

²³ Mo se faaaʻoaʻoga, pe a sailia mau i lau lava kopi o le Tusi Paia, e mafai ona e autaluina puupuu faamatalaga o loo siʻomia ai mau taʻitasi. E mafai ona e ‘matuā suʻe lelei i mea uma lava,’ e pei ona faia e Luka ina ua ia tusia lana Evagelia. (Luka 1:3) O le a fesoasoani foʻi ia te oe ni taumafaiga faaopoopo ina ia e tomai ai i le suʻeina o mau i le faiva ma le faia o lauga. E toʻatele ua faapea mai ua latou matuā maofa i Molimau a Ieova ona latou te iloa faaaogā a latou Tusi Paia. E na o le pau lava le auala e mafai ai ona faatatauina lenei fautuaga ia i tatou, pe a fai ma a tatou masani le tilofaʻia o mau i a tatou lava Tusi Paia.

²⁴ Le Faaaogāina Tatau o lo Tatou Taimi: O le isi mea e manatunatu i ai i lenei tulaga, o le aofaʻiga lea o se taimi o loo faaaluina i le fafauina aʻe o faamatalaga, le faitauina, ma le taliina o faamatalaga o loo faamatilatila mai i le Initineti. Ua faalaeiʻauina i tatou i le Salamo 90:12 ina ia tatalo: “Ia faapea ona e aʻoaʻo mai ia i matou e faitauina o matou aso, ina ia maua ai le poto i o matou loto.” Na taʻua e Paulo faapea: “Ua itiiti ona aso ua totoe.” (1 Kori. 7:29) E lē gata i lea: “O lenei, ia tatou agalelei, ia faatatau i mea e tutupu i lea aso ma lea aso, i tagata uma lava, aemaise i le aiga o le faatuatua.”—Kala. 6:10, LF.

²⁵ O lena fautuaga ua faamatilatila ai le manaʻoga mo i tatou ina ia tatou atamamai i le faaaogāina o lo tatou taimi. Maʻeu le sili atu ona aogā o le faaaluina o le taimi i le faitauina o le Afioga a le Atua! (Sala. 1:1, 2) O le aumea sili lena e mafai ona tatou maua! (2 Timo. 3:16, 17) Mātua e, po o tou aʻoaʻoina ea a outou fanau i le tāua o le faaaogā tatau o lo latou taimi i gaoioiga o le Malo? (Fai. 12:1) O taimi o loo faaaluina i suʻesuʻega totino ma suʻesuʻega faale-Tusi Paia a le aiga, le auai i sauniga, ma le faiva i le fanua e sili mamao atu na i lo taimi o loo faaaluina e autilo ai i le Initineti, ma faatalitalia ni aogā e maua mai ai.

²⁶ I lenei tulaga, o se ala atamai le taulaʻi atu o o tatou mafaufau i mea faaleagaga ma mea na o loo fesootaʻi atu ma tāua i o tatou olaga o ni Kerisiano. Ua manaʻomia ai i lenei mea le faia o ni filifiliga ua mafaufauina lelei e tusa ai ma faamatalaga ia e faaalu ai lo tatou taimi ma manatunatuga. I le avea o ni Kerisiano, o mea na o loo fesootaʻi atu i o tatou olaga na taaofaʻi e Keriso, o lē na faapea mai: “A ia outou muai saili lona malo ma lana [le Atua] amiotonu; ona faaopoopoina atu lea o ia mea uma ia te outou.” (Mata. 6:33) Pe e lē o sili ea ona e fiafia pe a faatumulia lou olaga i gaoioiga o le Malo na i lo se isi lava gaoioiga?

²⁷ Le Imeli (E-Mail) a le Initineti: E ui o le fetufaaʻi o mea tutupu totino po o mafaufauga i le vā o tagata o le aiga po o uō o loo nonofo vāvāmamao o se mea talafeagai, ae pe o se alofa moni ea le tufa atu o nei faamatalaga i isi o ē atonu latou te lē iloa lou aiga po o au uō? Pe tatau ea ona faailoa atu nei faamatalaga i Fesootaʻiga faakomepiuta mo so o se tasi e faitau ai? Pe tatau ea ona faia ni kopi o nei feʻau totino ma soona auina atu i tagata e te iloa pe lē iloa foʻi? I se tulaga tutusa, pe a e mauaina ni feʻau mai isi ma e manino mai o nei feʻau sa leʻi fuafuaina mo oe, po o se alofa ea lou toe saga auina atu pea o na feʻau i isi foʻi tagata?

²⁸ Ae faapefea pe afai o se faamatalaga i se mea na tupu o loo e faasolo atu e lē saʻo? Pe lē o le auai ea lea i le faaauauina o se mea lē moni? (Faata. 12:19; 21:28; 30:8; Kolo. 3:9) E mautinoa, o le tausia o le “faaeteete . . . ina ia [tatou] savavali ma le faautauta, aua neʻi faapei o e valelea, a ia faapei o e popoto” o le a uunaʻia ai i tatou e mafaufau i lenei mea. (Efe. 5:15) Maʻeu lo tatou fiafia ona o loo faatumulia le Yearbook, Le Olomatamata, ma le Ala Mai! i faamatalaga o mea e faamaonia na tutupu ia e faalaeiʻau ma uunaʻia ai i tatou e savavali pea i “le ala”!—Isa. 30:20, 21.

²⁹ O loo iai foʻi se isi lamatiaga. Na taʻua e le aposetolo o Paulo nisi o na lamatiaga e faapea: “E masani foi i latou ma le paie, e feoai i lea fale ma lea fale; e le gata foi ina latou paie, a e soona tautala, ma matamata fua i galuega a nisi, ma tautalatala i mea le tatau.” (1 Timo. 5:13) O loo talanoaina iinei le faaaluina o le taimi ma taumafaiga e auina atu ai faamatalaga e faalētāua i o tatou uso.

³⁰ Seʻi mafaufau foʻi i le tele o le taimi lea e alu e taliina ai le aofaʻiga tele o imeli! E mālie le faamatalaga a le tusi, Data Smog e faapea: “A o faaalu e se tasi le tele o le taimi i luga o fesootaʻiga, e vave lava ona suia le imeli mai se mea fou e fiafia i ai e avea o se avega mamafa e alu ai le taimi, faatasi ai ma le tele o tusi e faitau ma taliina i aso uma mai aumea, o uō, o aiga, . . . ma faasilasilaga e lē manaʻomia o mea e faatau atu.” Na taʻua atili mai: “E toʻatele le ʻau matapeʻapeʻa i faamatalaga o loo maua mai i komepiuta ua iai le uiga leaga lea o le tufa atu o faamatalaga uma latou te maua—o tala mālie, tala lē moni, o tusi e auina atu i ni nai tagata ma talosagaina e toe lafo atu ni kopi o tusi i se aofaʻiga tutusa o ni tagata, (chain letter) ma isi lava mea—i tagata uma i o latou tuatusi i le komepiuta.”

³¹ Ua manino mai lenei mea i Imeli o loo faataamilo solo i le tele o uso—o faamatalaga e pei o tala mālie po o tala tausua e faatatau i le faiva; o solo ua faapea mai e faavae i o tatou talitonuga; o talafaatusa mai lauga eseese na faalogo i ai i fonotaga, o tauaofiaga, pe i le Maota o le Malo; o mea na tutupu i le faiva i le fanua; ma isi lava mea faapena—o mea e foliga mai e lē āfaina. O le toʻatele e masani ona auina atu na Imeli e aunoa ma le suʻeina o lē na aumai ai, ma faafaigatā ai ona iloa po o ai moni na uluaʻi aumaia, lea e tatau ai ona fesiligia e se tasi po o saʻo moni nei faamatalaga.—Faata. 22:20, 21.

³² O na feʻau e masani ona faalētāua, e lē o upu na e ola ai ia sa manatu i ai Paulo ina ua ia tusi atu ia Timoteo, e faapea: “O matua o upu e ola ai, na e faalogologo mai ai ia te au, ia e taofia i le faatuatua ma le alofa ia Keriso Iesu.” (2 Timo. 1:13) O le “gagana lelei” o upu moni faale-Tusi Paia o loo iai le “matua o upu e ola ai” ua faavae aʻe faapitoa i le matua o le Tusi Paia o le faasilisilia o le pule silisili ese a Ieova e ala i le Malo. (Sefa. 3:9) E tatau ona tatou fai taumafaiga uma e tuutōina atu ai lo tatou taimi uma ma le malosi e lagolagoina ai le faasilisilia o le pule silisili ese a Ieova.

³³ Talu ai ua tatou i le faatausiʻusiʻuga o le taimi o le iʻuga o lenei faiga o mea, ua matuā tatau lava la ona tatou mataala. Ua lapataʻia i tatou e le Tusi Paia: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia.” (1 Pete. 5:8) Ua taʻua atili: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.”—Efe. 6:11.

³⁴ Pe afai e faaaogāsesēina, e mafai ona avea le Initineti ma auala e maua ai e Satani i latou o ē ua maileia e lona mana. E ui atonu e iai sina aogā faatapulaa, ae o loo iai se lamatiaga pe a lē vaai i ai ma le faaeteete. E manaʻomia faapitoa i mātua ona uaʻi atu i le auala o loo faaaogā ai e a latou fanau le Initineti.

³⁵ O le tausia o se vaaiga paleni i le Initineti e avea o se puipuiga. Tatou te talisapaia faamanatu fetaui lelei a Paulo e faapea: “O e fetagofi i mea a le lalolagi nei, ia peiseai ua le fetagofi i ai; auā o le a mavae atu le tu o le lalolagi nei.” (1 Kori. 7:29-31) O le iloaina o nei mea o le a fesoasoani e taofia ai i tatou ma o tatou aiga mai le oo ina tosina ese ona o mea uma ua ofoina mai e le lalolagi, e aofia ai mea o loo maua i le Initineti.

³⁶ E matuā manaʻomia ona tatou vāvālalata atu i o tatou uso i le faapotopotoga ma faaaogā tatau lo tatou taimi o loo totoe, o iinā tatou te faaavanoa atili atu ai i tatou mo le faaauilumaina o manaʻoga o le Malo. A o lalata atu lenei faiga o mea i lona iʻuga, seʻi ‘aua lava tatou te toe savavali faapei o nuu faapaupau, o ē savavali i le valea o o latou loto,’ ae ia tatou ‘⁠iloa le finagalo o Ieova.’—Efe. 4:17; 5:17.