Tufatufaina o se Sāvali Faapitoa Mai iā Oketopa 20–Novema 16!
1 E amata i le Aso Gafua, Oketopa 20, ma faaauau ai lava mo le fā vaiaso, o le a tatou auai i le tufatufaina o se sāvali fou e faaulutalaina faapea: Pe E te Fia Iloa le Upu Moni? O le faanaunauga ia avea lenei taumafaiga faapitoa i le lalolagi atoa ma avanoa e faagaee ai le fiafia o le toʻatele i le puna e tasi o le upu moni.—Ioa. 17:17.
2 O loo otooto mai i le sāvali ia tali a le Tusi Paia i ni fesili tāua e ono: “Po o manatu moni mai ea le Atua iā i tatou?” “Po o le a faaiʻuina ea taua ma puapuaga?” “O le ā e tupu iā i tatou pe a tatou feoti?” “Pe iai se faamoemoe mo ē ua maliliu?” “O le ā le auala ou te tatalo ai ina ia faafofoga mai le Atua?” ma le “E faapefea ona ou maua le fiafia i le olaga?” E augapiu ma ni tali e faamalieina ai ua saunia mai e lotu vavaeese mai le upu moni. E oo foʻi i le toʻatele o ē faapea mai e lē o i latou o ni Kerisiano, o loo taumānatu foʻi i nei mataupu, ae atonu latou te lē o iloa e maua tali manino i le Tusi Paia. O le māfuaaga lea tatou te faatalitalia ai o le a toʻatele nisi e naunau i lenei feʻau.
3 Ia Galueaina Atoa la Outou Oganuu: Ia taumafai malosi ia faasopolia le tele o le oganuu e masani ona outou galulue ai mai i lea fale i lea fale. Afai e telē la outou oganuu, e ono faalaeiauina outou e toeaina ina ia tuu se sāvali i fale e lē maua atu i ai se tasi i le uluaʻi asiasiga. Aua neʻi galo ona tuu se sāvali i ou tuaoi, o ou tauaiga, o ē tou te faigaluega faatasi pe aʻoʻoga faatasi, ma i latou e masani ona e talanoa i ai. Atonu foʻi e mafai ona faatulaga au fuafuaga ina ia e paeonia lagolago iā Oketopa po o Novema. Po o iai sou alo po o se tasi o e faia se suʻesuʻega faale-Tusi Paia ua agaʻigaʻi i luma i le upu moni ma ua agavaa e auai ma i tatou i lenei tauiviga, e avea o se tagata talaʻi e leʻi papatiso? Afai o iai, faafesootaʻi toeaina.
4 O Faamatalaga e Fai Atu: Ina ia toʻatele nisi tatou te talanoa i ai e faatatau i le feʻau, e sili ona lelei le faapuupuu o lau taulimaga. Tau lava o le fai i le tagata o le aiga o se fesili se tasi o fesili e ono o loo i le pito i luma o le sāvali, ona faasino loa lea o le tagata i le tali o loo i le sāvali. O le faia faapea e faigofie ai i le ʻautalaʻi ona fetuunaʻi a latou taulimaga i manaʻoga e tulaʻi mai i le oganuu. Afai e faaalia e se tasi le fiafia, ia tusia le suafa ma le tuatusi ma toe foʻi e asi. I faaiʻuga o vaiaso, e mafai ona ofo faatasi le mekasini o loo ofo ma le sāvali. Pe a māeʻa le tauiviga iā Novema 16, o le a tatou ofoina le tusi Aʻoaʻoga a le Tusi Paia. Afai e totoe ni sāvali, ia faaaogā e pei lava ona faaaogā ai isi sāvali o loo iai.
5 Amata se Suʻesuʻega Faale-Tusi Paia: Ua faapitoa lava ona faatulaga le sāvali lenei e fesoasoani iā i tatou e amata ni suʻesuʻega faale-Tusi Paia. Pe a toe foʻi e asi se tasi sa faaalia le fiafia, e te ono fesili i ai, o le ā se faamatalaga moni a le Tusi Paia na e fiafia ma faamāfanafanaina ai oe? Faaali i ai le itulau mulimuli lea o loo taʻua ai la tatou faatulagaga mo se suʻesuʻega faale-Tusi Paia, ona tuu lea i ai o se tusi Aʻoaʻoga a le Tusi Paia. Afai e mafai, ia talanoaina puupuu se palakalafa se tasi pe lua o loo tele ai ni faamatalaga o se mataupu na ia filifilia.
6 O loo naunau mai Ieova iā i latou e tapuaʻi atu iā te ia “i le agaga ma le upu moni.” (Ioa. 4:23) Talosia ia tatou auai uma i lenei tauiviga faapitoa e fesoasoani i isi ia latou iloa le upu moni!