Pusa Fesili
◼ Afai e mananaʻo se uso ma se tuafafine e faaaogā le Maota mo Sauniga e fai ai le la faaipoipoga, o ā mea e manaʻomia ona latou talanoaina ma toeaina?
O faaipoipoga e faatulaga e tusa ai ma mataupu silisili o le Tusi Paia e faamamaluina ai Ieova. E faapitoa lava lenei tulaga i faaipoipoga e fai i le Maota mo Sauniga, auā e manatu tagata o lea vaipanoa i mea e fai ai i inā e fesootaʻi i la tatou faalapotopotoga. Ina ia faamautinoa la ua “faia mea uma i se tulaga talafeagai ma le maopoopo,” e talafeagai la i toeaina o le faapotopotoga ona talanoaina faatasi ma ē o le a faaipoipo ia nisi o mea e fesootaʻi i le la faaipoipoga.—1 Kori. 14:40.
E tatau iā i laʻua o faamoemoe e faaaogā le Maota mo Sauniga mo le la faaipoipoga ona faaoo atu se talosaga tusitusia i le komiti o le auaunaga a le faapotopotoga e faaaogāina lenā Maota mo a latou sauniga. E tatau ona vave tuuina atu le la tusi talosaga a o mamao le aso o le faaipoipoga, ma faaalia le aso ma le taimi e la te mananaʻo e faaaogā ai le maota. E ao ona la manatua e lē fetuunaʻia e toeaina se taimi o se sauniga ona o le la faaipoipoga. E lē gata i lea e ao i le tama faaipoipo ma le teine faaipoipo ona lelei o la tulaga, ia ola e tusa ma mataupu silisili o le Tusi Paia ma tapulaa amiotonu a Ieova.
Ina ia faamautinoa e faamamaluina ai i le faaipoipoga lo tatou Atua mamalu, e ao i le ʻau faaipoipo ona talanoaina faatasi ma le komiti o le auaunaga ia fuafuaga o le faaipoipoga a o leʻi faamautūina le mea tonu o le a fai. E ui e lē faapea e taumafai toeaina e taʻu atu i le ʻau faaipoipo le mea e latou te mananaʻo e fai, ae afai e iai se mea o la fuafua e fai ae iloa e toeaina e lē talafeagai, e tatau iā i laʻua ona lolo i se fetuunaʻiga e fai e toeaina. Ia tau o musika e fili mai i musika o le malo (Kingdom Melodies) pe mai la tatou tusi pese e faaaogā. O le auala e teu ai le Maota mo Sauniga, po o le toe fetuunaʻi o le auala e laina ai nofoa e ao lava ona maua muamua se faatagaga ona faatoʻā fai ai lea. Afai e puʻe ni ata po o ni ata vitiō, ia faamautinoa e lē faalavelavea ma aveesea ai le mamalu o le sauniga. E ono faataga e toeaina se faataʻitaʻiga e fai i le Maota mo Sauniga ae ia aua neʻi faalavelavea ai isi faatulagaga a le faapotopotoga. E lē tatau ona faapipiiina se tusi valaau i le laupapa o faamatalaga. Peitaʻi, e mafai e toeaina ona fai se faasilasilaga puupuu i le taimi o le Sauniga o le Auaunaga ina ia logo ai le faapotopotoga e faatatau i le faaipoipoga lea o le a faia i se taimi lata mai i le Maota mo Sauniga.
E ui lava e lē o se manaʻoga le tatau ona papatiso tagata e faaaogā i aumea mamae a le ulugalii faaipoipo, ae e lē talafeagai ona faaaofia ai nisi o loo ola i ni olaga e feteenaʻi ma mataupu silisili o le Tusi Paia, ia po o nisi foʻi o ē atonu e ono faalētonu ai manatu o tagata o le a iai i le faaipoipoga ona o a latou amioga. E ao lava ona faia e se toeaina le faaipoipoga, pe afai o avanoa. Ua agavaa toeaina e aʻoaʻo atu le Afioga a le Atua, e sili la ona latou agavaa e faamatilatila mai mataupu silisili o le Tusi Paia lea e faatatau i lenei faatasiga tāua.—1 Timo. 3:2.
Talu ai o le a aafia ai foʻi le toeaina lea e faia le faaipoipoga i taualumaga o le faaipoipoga, e ao foʻi la ona muaʻi logo le toeaina lea e faatatau i mea uma o le a faia i le aso o le faaipoipoga. E ao ona latou muaʻi feiloaʻi ma i laʻua o le a faaipoipo ina ia faamautinoa lo la tulaga mamā tau amio i le taimi o le faiga uō; e tatau i le ʻau faaipoipo ona faamaoni ma tautatala saʻo i le toeaina lea. Afai sa faaipoipo muamua se tasi o i laʻua, e ao i le tagata lea ona faamaonia mai ua uma ona tatala lana uluaʻi faaipoipoga e tusa ai o le tulafono ma e tusa ai foʻi ma le Tusi Paia ma ua saʻoloto e toe faaipoipo. (Mata. 19:9) E aofia ai i lenei gaoioiga le faaali i le toeaina o se kopi o le pepa faamaonia ua tatala le faaipoipoga.
Afai e saʻoloto le talanoa a ē o le a faaipoipo i toeaina ma felagolagomaʻi ma i latou, o le a fiafia tagata uma i le aso o le faaipoipoga.—Faata. 15:22; Epe. 13:17.