E Mafai Ona Avea Oe ma Sē e Aʻoaʻo Atu!
1. O le ā le avanoa faapitoa ua i so o se tagata talaʻi o le Malo?
1 O se tasi o vala sili ona tauia o le faiva, o le aʻoaʻoina lea o se tasi i le upu moni. O le mātauina o lea tagata a o tali mai i le feʻau o le Malo ma fesoasoani i ai ina ia mafuta vavalalata atu i le pule silisili ese i le aoao o mea uma, o se mea e tatou te faapelepele i ai. (Iako. 4:8) E ao ona avea ma sini o so o se tagata talaʻi o le Malo le aʻoaʻoina o so o se tasi o galala i le upu moni ma faamautinoa ua amata ona fai e lenā tagata ni suiga mataʻina i ona uiga, o ona foliga vaaia, ma lana amio.—Mata. 28:19, 20.
2. Aiseā e faatalatū ai nisi e fai se suʻesuʻega faale-Tusi Paia, ma o le ā e fesoasoani iā i latou e foʻia lea faafitauli?
2 Faalagolago iā Ieova: I taimi ua teʻa, sa iai le lagona lē mautinoa pe sa manatu nisi o auauna faamaoni e latou te lē agavaa e faataunuu o latou tofiga mai iā Ieova. O le faalagolago iā Ieova na mafai ai e Mose, Ieremia, Amosa, ma isi tagata e pei lava o i tatou, ona foʻia ma faaleleia o latou manatu lē mautinoa ma faalogona lē agavaa ae faaauau le faia o se galuega mataʻina. (Eso. 4:10-12; Iere. 1:6, 7; Amo. 7:14, 15) Sa tatau foʻi i le aposetolo o Paulo ona ‘lototele.’ E faapefea? Na ia faailoa mai “ona o lo tatou Atua.” (1 Tesa. 2:2) Ioe, tatou te mafai uma lava ona faalagolago iā Ieova na te saunia mai le fesoasoani, le atamai, ma le malosi tatou te manaʻomia e fai ai ni suʻesuʻega faale-Tusi Paia e fua tele mai.—Isa. 41:10; 1 Kori. 1:26, 27; 1 Pete. 4:11.
3, 4. O le ā le toleniga lea o loo iai e fesoasoani iā i tatou i le aʻoaʻoina atu o le Afioga a le Atua?
3 Talia Toleniga: O loo saunia mai e lo tatou Aʻoaʻo Silisili o Ieova le Atua ia se toleniga faifai pea e ala mai i se polokalame tau aʻoaʻoga e faavae i le Tusi Paia, ina ia tatou agavaa atoatoa ai e avea o nisi e aʻoaʻo atu. (Isa. 54:13; 2 Timo. 3:16, 17) Ia tatou talia lenei toleniga e ala i le fai o le mea sili e te mafaia e faaaogā ai avanoa e faateleina ai lou malamalamaga o le Tusi Paia ma faaleleia ou tomai e aʻoaʻo atu upu moni o le Tusi Paia. E ui o le fuafuaga autū lea o le Aʻoga o le Faiva Faatiokarate ma le Sauniga o le Auaunaga, ae tatou te maua le toleniga mai i sauniga uma lava a le faapotopotoga ina ia tatou aʻoaʻo atu le Afioga a le Atua.
4 Taumafai malosi faataʻitaʻi auala faigofie e aʻoaʻo atu ai e oo lava i upu moni ʻānoa faaleagaga. O le faamatalaga lenei o loo maua i le tusi Aʻoga o le Faiva itulau e 227: “E tatau ona e malamalama manino i lau lava mataupu, pe afai o le a e faamalamalamaina i isi.” E fesoasoani le fai o so tatou sao i sauniga e ta mau ai manatu i o tatou mafaufau lea e mafai ona faaaogā i le lumanaʻi. E tatau lava la ona sauniuni lelei, ona faaleleia atili ai lea o lou mautinoa i lou tomai e aʻoaʻo atu.
5. O le ā le toleniga faaopoopo tatou te maua i le faapotopotoga e fesoasoani i lo tatou agaʻigaʻi i luma o nisi e aʻoaʻo atu?
5 Mai lava i le amataga, e mautinoa lava le fesoasoani aʻi o faifeʻau Kerisiano a o latou galulue faatasi i le latou galuega o le faia o soo. (Luka 10:1) Pe afai e mafai, ia ō faatasi ma tagata talaʻi ua iai le poto masani, e pei o paeonia, o toeaina, ma ovasia femalagaaʻi, i le faia o suʻesuʻega faale-Tusi Paia. Ia mātau le auala latou te faaaogāina ai talafaatusa faigofie ma isi auala e aʻoaʻo atu ai o loo maua i a tatou lomiga o faaaogā mo suʻesuʻega ina ia faamatala ai upu moni o le Tusi Paia. Fesili iā i latou na mo ni fautuaga i le auala e avea ai oe o sē e lelei lau aʻoaʻo atu. (Faata. 1:5; 27:17) Ia talisapaia nei toleniga uma ma manatu i ai—o toleniga o loo saunia mai e le Atua.—2 Kori. 3:5.
6. O le ā e sili ona manaʻomia ina ia avea ai o sē e aʻoaʻo atu le Afioga a le Atua?
6 Ia faalagolago iā Ieova, ma maua ai aogā i toleniga o loo ia saunia mai. Ia tatalo mo lou agaʻigaʻi i luma. (Sala. 25:4, 5) E te mafaia foʻi ona olioli, i le mafai ona e fesoasoani i se isi ia pei o oe, ia avea o sē e aʻoaʻo atu le Afioga a le Atua!