Faatonuga mo Ē e Faia Vaega i le Sauniga o le Auaunaga

E amata i le lomiga lenei o La Tatou Faiva o le Malo, ona faafaigofie faaupuga o le faasologa o le Sauniga o le Auaunaga. O faatonuga o loo i lalo, ua toe teuteu ai ma faamanino le mataupu na avatu i La Tatou Faiva o le Malo o Me 2009, “Le Auala e Sauniuni ai mo le Sauniga o le Auaunaga.”

◼ Lauga: O lenei lauga, e faavae i le mataupu ua tofia atu. E tatau ona taulaʻi le failauga i manatu e aogā i le faapotopotoga.

◼ Fesili ma Tali: E pei o le suʻesuʻega o Le Olomatamata le vaega lenei, e pupuu upu tomua ma upu faaiʻu, ma e iai fesili mo palakalafa. Ia ʻalofia e le faiaʻoga le tele o tala e fai atu. Ia faitau mau autū pe a lava le taimi. Aua le faitauina palakalafa seʻi iloga ua faatonu atu.

◼ Talanoaga: O le lauga lenei e fai ai se vaega a le aofia. E lē na o se lauga, pe na o fesili ma tali.

◼ Faataʻitaʻiga ma Faatalanoaga: A faatonu atu e fai se faataʻitaʻiga, e tatau i le uso e faia le vaega lea ona faatulaga se faataʻitaʻiga, ae e lē seʻiloga o ia e faia. O ē e na te filifilia, e tatau ona agavaa ma o ni faaaʻoaʻoga lelei, ma ia fuafua mamao le faiga o le faataʻitaʻiga. E lelei pe a aua le faaaogāina tagata talaʻi fou po o ē e lē agavaa, ona o lou manaʻo e maua so latou avanoa e ō ai i luga o le pulelaa, ae e mafai ona avea ma lē e ona le fale. Ia faasaga lelei mai i le aofia ē e faia faataʻitaʻiga. O i latou e faatalanoa, e tatau ona tali mai i luga o le pulelaa, ae lē o le nofo i lalo. E tatau ona faataʻitaʻi muamua faataʻitaʻiga ma faatalanoaga. Afai ua ovataimi le sauniga, e tatau i le uso ona faapupuu ana upu, ae fai pea le faataʻitaʻiga ma le faatalanoaga. E tatau i auauna o le faiva ona siaki le sooupu o toeaina, po o se isi toeaina a o leʻi filifilia tagata e faaaogā.

Afai e avatu faatonuga o se vaega faapitoa, e tatau ona mulimuli lelei i ai. O le taulima o vaega e pei ona taʻua i luga, o le a ‘talafeagai ma maopoopo’ ai le Sauniga o le Auaunaga.—1 Kori. 14:40.