Vala Mataʻina o le Tausaga ua Teʻa Mai i le Tusi Tausaga 2010

IA TAUMAFAI ATILI E OFO ATU SUʻESUʻEGA FAALE-TUSI PAIA

E amata mai iā Ianuari 2009, na faalaeiauina ai faapotopotoga e faatulaga se Aso Toonaʻi po o se Aso Sa i masina taʻitasi, e uaʻi atu ai i le ofoina o suʻesuʻega faale-Tusi Paia. O le ā le iʻuga? E toʻatele le ʻautalaʻi na faateʻia ma maua le fiafia. Na ala ona faateʻia i latou, ona o le faigofie ona ofo o se suʻesuʻega nai lo le mea na latou faatalitalia, ae na latou maua le fiafia ona o ituaiga eseese o tagata ua talia se suʻesuʻega i le tusi O ā Aʻoaʻoga Moni a le Tusi Paia? Ua lipotia mai e ovasia femalagaaʻi le matuā faafiafiaina o faapotopotoga i lenei faatulagaga fou, ma ua iai ni iʻuga lelei e ui lava e leʻi umi ona amata. O se faataʻitaʻiga, i uluaʻi masina e lima, e silia i le 8,000 suʻesuʻega faale-Tusi Paia fou na amataina i Italia.

O tagata talaʻi e leʻi faia muamua lava ni suʻesuʻega, ua faia ni toe asiga ma amata ni suʻesuʻega. Na taʻua e Karolina, mai i Peru: “A o leʻi faia le faatulagaga lenei ou te leʻi faia muamua lava se suʻesuʻega faale-Tusi Paia, ae ina ua aumai le fautuaga ia faapitoa se aso se tasi o le masina e ofo ai suʻesuʻega, na ou iloa ai le manaʻomia ona tauivi malosi e amata se suʻesuʻega faale-Tusi Paia. Ua mafai nei ona ou faailoaina i tagata o aiga, o se suʻesuʻega faale-Tusi Paia e faigofie ma e lē tele se taimi e alu ai. Ou te faafetai iā Ieova, e ala i le faatatauina o fautuaga ua saunia mai mo i matou, ma e lelei ni iʻuga ua oo i ai; e lua aʻu suʻesuʻega faale-Tusi Paia o loo faia i le taimi nei.”

O se tuafafine paeonia e suafa iā Satya i Peretania, sa faatalatū e ofo se suʻesuʻega faale-Tusi Paia i le uluaʻi asiasiga. Ae i le aso sa faatulaga mo le ofoina o suʻesuʻega faale-Tusi Paia, na ia maumauaʻi ai ia aua neʻi foʻi i le fale ae na te leʻi faataʻitaʻia le metotia fou lenei. Sa matuā fiafia o ia ina ua talia e se fafine le ofo e fai sana suʻesuʻega i le taimi lava na faataʻitaʻi ai. E matuā faigofie lava nai lo le mea na mafaufau i ai Satya.

O Luka, o se uso talavou mai Palermo, i Sisili i Italia, e masani ona ia tuua ni mekasini i se fafine ua oti lana tane o sē e fefe tele e alu atu se isi i totonu o lona fale. I le aoauli o se tasi Aso Toonaʻi, o le aso e faapitoa mo le ofoina o suʻesuʻega faale-Tusi Paia, na alu atu ai Luka i le fafine ua oti lana tane ma le tusi O ā Aʻoaʻoga Moni a le Tusi Paia? ma tatala ae faitau atu i ai se faamatalaga mai le tusi. Sa faaosofia le naunau o le fafine i le tusi ma talanoa iā Luka mo sina taimi. Na taʻu atu e Luka i le fafine o le tusi lea na te uuina o loo iai tali i ana fesili—e aofia ai ma le fesili pe mafai ona toe feiloaʻi i lana tane. Na tatala e Luka le tusi i le itulau e 72, lea o loo faamalamalama ai po o ai o le a toe faatutū mai. Na matuā pāʻia ai le fafine i le faamoemoe o loo i le Tusi Paia ma talia se suʻesuʻega faale-Tusi Paia. O loo faia i le taimi nei lana suʻesuʻega, ma ua valaaulia ai Molimau i totonu o lona fale e aunoa ma le toe fefe.

Na faamatala e se ovasia o le matagaluega i Peru, “mai lava i le amataga, ua fesoasoani tele lenei faatulagaga i le tele o faapotopotoga e faateleina ai le aofaʻi o a latou suʻesuʻega faale-Tusi Paia o loo faia. Na lipotia mai e se tasi faapotopotoga i Chiclayo le 25 suʻesuʻega fou i le masina e tasi. Ae i Chepén, e 24 suʻesuʻega fou na amata ai.”

O loo taulau manuia foʻi tagata talaʻi talavou i le ofoina o suʻesuʻega faale-Tusi Paia. Na faamatala e Giovanna e sefulu ma le tasi ona tausaga mai São Paulo, i Pasili e faapea: “Sa ma galulue ma loʻu tinā mai lea fale i lea fale i le aoauli o se Aso Toonaʻi e ofo atu suʻesuʻega faale-Tusi Paia e faia i le tusi O ā Aʻoaʻoga Moni a le Tusi Paia? I le fale muamua lava, na ou fesili i le tagata o le aiga, o se tamāloa faipisinisi lauiloa, pe e talitonu na faagaeeina e le Atua tagata na tusia le Tusi Paia? Na tali mai, ioe. Ona ou faailoa lea i ai o le 2 Timoteo 3:16. Fai mai le tamāloa, ua faagaeetia o ia i se teineitiiti laʻitiiti ae ua taʻu atu iā te ia nei mea mananaia, ma na ia talia le tusi.

“Ina ua ou toe foʻi e asi le tamāloa, na ma ō ma le tamā o loʻu tamā auā e masani ai i le tamāloa. Na faaulufale maʻua e le tamāloa i lona fale, ona ou fai lea i ai e tagaʻi i le lisi o mataupu i le tusi O ā Aʻoaʻoga Moni a le Tusi Paia? ma na ia filifilia le mataupu e sili ona naunau i ai. Na ia filifilia le mataupu e 11, ‘Aiseā ua Lē Taofia ai e le Atua Puapuaga?’ Ina ua uma ona faitau uluaʻi palakalafa e lua, na lāgā mai e le tamāloa ma lona toʻalua le tele o fesili. Na matuā faafiafiaina i laʻua i le maua i le Tusi Paia o tali iā la fesili uma, ma na la ioe mai e fai se suʻesuʻega faifai pea. Na ou matuā fiafia lava ina ua mafai ona amata se suʻesuʻega i le aiga muamua lava na ma afe i ai!”

E lē o tagata uma e talia se suʻesuʻega faale-Tusi Paia, ma e lē o tagata uma foʻi e amata suʻesuʻega e faapea o le a faaauau. Peitaʻi i le galulue ai faatasi ma le Atua, e faaauau pea ona tatou ofo atu suʻesuʻega faale-Tusi Paia i le toʻatele e mafai ona tatou oo atu i ai, i lo tatou iloa lea o loo tataʻi mai e Ieova i latou pei ni mamoe i lana faalapotopotoga, a o leʻi oo mai le faaumatiaga o le faiga o mea a Satani.—Ioa. 6:44; 1 Kori. 3:9.