E Tatau Ona Faasūsū Fatu Ina ia Ola
1. O le ā e tatau ona faasūsū ina ia ola?
1 O fatu e totō i se togālaau, e tatau ona faasūsū ina ia ola. E faapena foʻi fatu o le upu moni o loo totō i loto o tagata i la tatou oganuu. (1 Kori. 3:6) E tatau ona toe foʻi e asi ma faasūsū nei fatu faafaatusa, e faaaogā ai le Afioga a le Atua ina ia mauaa, ola ma fua mai.
2. E faapefea ona faataatia se faavae o se isi asiasiga?
2 Faatū se Fesili: A o e sauniuni i lau taulimaga, aiseā e lē sauniuni ai se fesili faatupu manatu, lea e mafai ona taliina pe a e toe foʻi e asi? Faatū se fesili i le faaiʻuga o le uluaʻi asiasiga, ona fai lea o ni fuafuaga talafeagai e toe foʻi e asi. E toʻatele ua iloa le aogā o le filifili o se mataupu mai i le tusi Aʻoaʻoga Moni, e mafai ona faataʻitaʻi ai le amataina o se suʻesuʻega.
3. O ā faamatalaga e tatau ona faamaumau e faatatau i se tagata na faaalia le fiafia?
3 Fai se Faamaumauga: E māeʻa loa le uluaʻi asiasiga, ona faamaumau lea o mea uma na talanoa ai. Faamau i lalo le igoa o le tagata ma le tuatusi. E lelei foʻi le faamau o le aso ma le taimi na lua talanoa ai, o mea na lua talanoaina, ma le lomiga na tuu. Pe na ia taʻu atu iā te oe lana lotu? Pe e fai sona aiga? Pe na ia taʻu atu iā te oe mea e fiafia i ai ma ni ona faafitauli? O na faamatalaga uma o le a fesoasoani iā te oe pe a e toe foʻi e asi. Ia faamau foʻi i lalo le taimi e toe asia ai ma le fesili o le a e taliina.
4. Aiseā e tāua ai ona finafinau a o toe foʻi e asia se tagata na faaalia le fiafia?
4 Ia Finafinau: O le a taumafai malosi Satani e ʻfaoese le upu’ na totō i fatu o tagata. (Mare. 4:14, 15) O le mea lea, aua le fiu pe afai e faigatā ona maua ni tagata fiafia i o latou fale. Pe e mafai ona e auina atu i ai se tusi pe tuu se feʻau tusitusia i lalo o le faitotoʻa? Na amata e se paeonia se suʻesuʻega i le faitotoʻa ma se fafine, ae e na te leʻi toe maua atu le fafine i le fale, o lea na ia auina atu ai se tusi. Ina ua toe feiloaʻi mulimuli ane ma le fafine i le fale, sa taʻu atu e le fafine lona lototalisapaia, ona o le naunau atu o le paeonia e ala i le tusi. A o tatou faasūsū fatu o le upu moni, e tatou te lagona ai le olioli pe a vaai atu ua ʻfua mai e taʻitolu sefulu, taʻiono sefulu ma le taʻiselau.’—Mare. 4:20.