Faaaogā se Taulimaga e Taulau Manuia
1. O le ā e tatou te aʻoaʻoina mai i taulimaga eseese na faaaogā e uluaʻi Kerisiano?
1 Sa talaʻi atu e uluaʻi Kerisiano le tala lelei i tagata e eseese aganuu ma lotu. (Kolo. 1:23) E ui lava e tasi le feʻau na talaʻia, o le Malo o le Atua, ae sa eseese taulimaga e fua i tulaga o tagata na talaʻi i ai. O se faaaʻoaʻoga, ina ua talanoa atu Peteru i tagata Iutaia, o ē sa matuā faatāuaina Tusitusiga Paia, sa amata e ala i lona taʻua o le perofeta o Ioelu. (Galu. 2:14-17) Ae o loo taʻua i le Galuega 17:22-31 le auala na fetufaaʻi ai Paulo ma tagata Eleni. I aso nei, e faatāua e le toʻatele o tagata i nisi o oganuu le Tusi Paia, ma e faigofie ona tatou talanoa atu i ai i le Tusi Paia a o talaʻi mai lea fale i lea fale. Peitaʻi, e ao ona tatou faautauta pe a talanoa atu i ē e lē fiafia i le Tusi Paia po o lotu, po o ē e auai i se lotu e lē faa-Kerisiano.
2. E faapefea ona faaaogā le lomiga o le ofo e fesoasoani ai i ē e fiafia atoa ma ē e lē fiafia i le Tusi Paia?
2 Faaaogā Lelei le Lomiga o le Ofo: I lenei tausaga faaleauaunaga, o le a taʻilua masina ma sui mai lomiga o le ofo, ma o le a faamatilatila ai mekasini, sāvali ma polosiua. E tusa pe e lē fiafia tagata o le oganuu i le Tusi Paia, e mafai lava ona tatou faaaogā se mataupu mai i se lomiga e faatupu ai lo latou naunau. Atonu e tatou te lē faitauina atu i ai se mau pe taʻua foʻi le Tusi Paia i le uluaʻi asiasiga, ae afai e faaalia le fiafia, ia toe foʻi e asi ma le fuafuaga ia atiaʻe le faatuatua o le tagata o le aiga i Lē na foafoaina mea ma lana Afioga. Ae afai o loo tatou talaʻi i tagata e fiafia i le Tusi Paia, ia faaaogā le lomiga ma se taulimaga e faailoa atu ai e tāua iā te oe le Tusi Paia. E tusa lava po o le ā le ofo o le masina, ae e mafai ona tatou ofo i so o se taimi le tusi Aʻoaʻoga a le Tusi Paia, po o polosiua Ia Faalogo i le Atua po o le E te Ola e Faavavau pe a E Faalogo i le Atua. O le mea tāua ia faaaogā se taulimaga e taulau manuia.
3. I le ā le auala ua faatusaina ai loto o tagata i la tatou oganuu i le eleele?
3 Faamalū le Eleele: Ua faatusaina le loto o le tagata i le eleele. (Luka 8:15) O nisi eleele e manaʻomia ona matuā sauniunia a o leʻi mauaa ma ola ai fatu o upu moni o le Tusi Paia. Sa taulau manuia tagata talaʻi i le uluaʻi senituri i le totōina o fatu i ituaiga eleele eseese, ma na latou olioli tele ai. (Galuega 13:48, 52) E mafai foʻi ona tatou taulau manuia pe afai e uaʻi totoʻa atu i a tatou taulimaga.