Atiaʻe se Masaniga o le Tausi Taimi

1. O le ā le faaaʻoaʻoga lelei ua faataatia e Ieova e tusa ai o le tausi taimi?

¹ E tausi taimi Ieova. O se faataʻitaʻiga, e na te aumaia i ana auauna le ʻfesoasoani i le taimi tatau.’ (Epe. 4:16) E na te saunia mai foʻi meaʻai faaleagaga “i le taimi tatau.” (Mata. 24:45) E tatou te mautinoa foʻi e oo mai le aso o lona toʻasā ma “e lē faatuai mai.” (Sapa. 2:3) Maʻeu le tele o aogā e tatou te maua mai i le tausi taimi o Ieova. (Sala. 70:5) O le pisi i le tele o meafai ma lo tatou tulaga lē lelei atoatoa, e faigatā ai ona o tatou tausi taimi. O lea, aiseā e tāua ai le atiaʻe o se masaniga o le tausi taimi?

2. E faapefea ona viiaina Ieova pe a tatou tausi taimi?

² E lē o tausi taimi le toʻatele o tagata i nei aso e gata ai, ona ua avea i latou ma ē e alolofa iā i latou lava ma ua leai se amio pulea. (2 Timo. 3:1-3) O lea, e mafai ona viiaina Ieova e isi pe a latou mātauina se Kerisiano o tausi taimi i lana galuega, sauniga, ma pe a fai foʻi ni ana fuafuaga e feiloaʻi ma isi. (1 Pete. 2:12) Pe e masani ona e vave taunuu i lau galuega totogi, ae e tele ina e tuai i mea faaleagaga? O le vave ona taunuu i sauniga faa-Kerisiano a o leʻi faia le pese ma le tatalo amata, e faaalia ai e tatou te faanaunau e faaaʻoaʻo i lo tatou Tama i le lagi o lē e fai mea maopoopo.—1 Kori. 14:33, 40.

3. E faapefea i le tausi taimi ona faaalia ai lo tatou manatu mamafa i isi?

³ O le tausi taimi foʻi e faaalia ai lo tatou manatu mamafa i isi. (Fili. 2:3, 4) O se faataʻitaʻiga, pe afai e tatou te vave taunuu i sauniga ma faatasiga mo le talaʻiga, o le a tatou lē faalavelave ai i isi. Peitaʻi, pe a fai ma a tatou masani le tuai atu, e ono faaalia ai e sili atu ona tāua iā i tatou isi mea nai lo o o tatou uso ma tuafāfine. O le tausi taimi e faaalia ai le toʻaga, faamoemoeina ma le maufaatuatuaina, ma o ni uiga e talisapaia e isi mai iā i tatou.

4. Pe afai e tatou te tuai soo, e faapefea ona faaleleia lenā tulaga?

⁴ Pe afai e masani ona e tuai, ia iloilo po o le ā le māfuaaga. E tāua le fai mea maopoopo! Ia fai se faasologa o au mea e fai ma taumafai e faamāeʻa i le taimi tonu e tatau ona uma ai. (Fai. 3:1; Fili. 1:10) Ia talosaga atu iā Ieova mo le fesoasoani. (1 Ioa. 5:14) O le tausi taimi e faaalia ai lo tatou talisapaia o poloaʻiga silisili e lua o le Tulafono e faapea ia e alofa atu iā Ieova ma ou tuaoi.—Mata. 22:37-39.