Lomiga mo le Polokalame mo le Sauniga o le Faiva ma le Olaga Faa-Kerisiano
NOVEMA 5-11
ʻOA TAUTELE MAI I LE AFIOGA A LE ATUA | IOANE 20-21
“Pe e Sili Lou Alofa iā te Aʻu Nai lo o Nei Mea?”
(Ioane 21:1-3) Ua mavae nei mea, ona toe faaali atu lea o Iesu i le ʻausoo i le vai o Tiperia, ae o le auala lenei ua faaali atu ai o ia. 2 Ua faapotopoto faatasi Simona Peteru ma Toma, lē ua taʻua o le Masaga, o Natanielu mai i Kana i Kalilaia, ma atalii o Sepetaio, ma isi ona soo e toʻalua. 3 Ua fai atu Simona Peteru iā i latou: “Ou te alu ou te fagota.” Ua latou fai mai iā te ia: “Matou te ō foʻi ma oe.” Ona latou ō atu lea ma feosofi i le vaa, ae latou te leʻi maua ni iʻa i lenā pō.
(Ioane 21:4-14) Ae ina ua oo i le taeao, ua tū mai Iesu i le auvai, a ua lē iloa e soo, o Iesu lea. 5 Ona fetalai atu lea o Iesu iā i latou: “Si aʻu fanau e, po o iai ni a outou meaʻai?” Ua latou tali mai iā te ia, “E leai!” 6 Ua ia fetalai atu iā i latou: “Ia lafo le upega i le itu taumatau o le vaa, ona outou maua ai lea o iʻa.” Ona latou lafo lea o le upega, a ua lē mafai ona latou toso mai i luga, auā ua matuā tele lava iʻa. 7 Ona fai atu lea o le soo o lē e alofa i ai Iesu iā Peteru: “O le Alii!” Ina ua faalogo Simona Peteru e faapea o le Alii lea, ona tago lea o ia ma ofu lona ofutino, auā sa faasausau o ia, ma oso i le vai. 8 A ua ō mai isi soo i le tamaʻi vaa, ma toso mai le upega o loo tumu i iʻa, auā e lē o toe mamao mai i le matafaga, pe e toe tolu selau futu. 9 Ae ina ua latou ō ese mai i le vaa, ona latou iloa ai lea o se afi ua mālala, ma iʻa o loo taatitia ai i luga, ma falaoa. 10 Ua fai atu Iesu iā i latou: “Ia aumai ni iʻa na outou maua.” 11 Ona alu lea o Simona Peteru i le vaa, ua toso mai i uta le upega ua tumu i iʻa, e selau lima sefulu ma le tolu. Ae e ui lava i le tele o iʻa ua iai, ae e leʻi masae le upega. 12 Ua faapea atu Iesu iā i latou: “Ō mai loa e aai.” Ae e leai se tasi o le ʻausoo na mafai ona fesili mai iā te ia: “O ai oe?” auā ua latou iloa, o le Alii lea. 13 Ua maliu mai Iesu ua tago i le falaoa, ma avatu iā i latou, faapea foʻi ma iʻa. 14 O le faatolu ai lea ona faaali atu Iesu i le ʻausoo, ina ua mavae lona toetū mai i le oti.
(Ioane 21:15-19) Ua uma ona latou aai, ona fesili atu lea o Iesu iā Simona Peteru: “Simona e, le atalii o Ioane, pe e sili ea lou alofa iā te aʻu nai lo o lou naunau i nei mea?” Ua fai mai o ia: “Ioe le Alii e, ua e silafia ou te alofa faapelepele iā te oe.” Ua tali atu o ia: “Ia e fafaga i aʻu tamaʻi mamoe.” 16 Ua ia toe fetalai faalua atu iā te ia: “Simona e, le atalii o Ioane, pe e te alofa iā te aʻu?” Ua ia tali mai iā te ia: “Ioe le Alii e, ua e silafia ou te alofa faapelepele iā te oe.” Ua ia fetalai atu iā te ia: “Ia e leoleo i aʻu tamaʻi mamoe.” 17 Ua ia fetalai faatolu atu iā te ia: “Simona e, le atalii o Ioane, pe e te alofa faapelepele iā te aʻu?” Ua oo ina tigā Peteru ona ua faatolu ona ia fesili atu iā te ia: “Pe e te alofa faapelepele iā te aʻu?” Ona fai mai lea o ia: “Le Alii e, ua e silafia mea uma; ua e silafia foʻi ou te alofa faapelepele iā te oe.” Ona faapea atu lea o Iesu iā te ia: “Ia fafaga i aʻu tamaʻi mamoe. 18 E moni, e moni, ou te fai atu iā te oe, A o e tauleʻaleʻa e masani ona e faia ou lava ofu, ma e alu i le mea e te loto i ai. A ua oo ina e toeaina, ua faaloaloa atu ou lima, ma e faaofu oe e se isi tagata, ma ave oe i le mea e te lē o loto i ai.” 19 Ua ia fai atu nei mea e faailoa ai le auala e oti ai o ia, lea e faamamaluina ai le Atua. Ua ia fai atu nei mea, ona faapea atu lea o ia: “Ia e mulimuli mai pea iā te aʻu.”
nwtsty faamatalaga mo suʻesuʻega o le Ioa 21:15, 17
ona fesili atu lea o Iesu iā Simona Peteru: O le talanoaga lenei a Iesu ma Peteru, ae e leʻi leva ona mavae le faafitia faatolu e Peteru o Iesu. E faatolu ona fai atu e Iesu ni fesili faatupu manatu e iloa ai faalogona o Peteru e faatatau iā te ia, lea na ʻoo ina tigā ai Peteru.’ (Ioa 21:17) O le faamatalaga a Ioane o loo i le Ioa 21:15-17 o loo faaaogā ai ni veape Eleni se lua: o le a·ga·paʹo lea ua faaliliuina i le alofa, ma le phi·leʹo lea ua faaliliuina i le alofa faapelepele. Na fesili faalua Iesu iā Peteru: “Pe e te alofa iā te aʻu?” Na matuā faamautinoa mai e Peteru i na taimi e lua lona “alofa faapelepele” iā Iesu. Mulimuli ane na toe fesili Iesu: “Pe e te alofa faapelepele iā te aʻu?” Na toe taʻutino foʻi e Peteru lona alofa faapelepele iā Iesu. I na taimi taʻitasi na taʻutino ai e Peteru lona alofa iā Iesu, na faamamafa atu ai e Iesu e tatau i lenei alofa ma le alofa faapelepele ona uunaʻia ai Peteru e fafaga ma “leoleo” soo faaleagaga o Iesu, lea na ia taʻua o ana mamoe po o “tamaʻi mamoe.” (Ioa 21:16, 17; 1Pe 5:1-3) E faatolu ona tuu atu e Iesu le avanoa iā Peteru e faamautinoa mai ai lona alofa, ona ia tuuina atu loa lea iā te ia le tiute tauave o le tausia o ana mamoe. O le faia faapea na faamaonia manino atu ai e Iesu, ua ia faamagaloina Peteru mai lona faafitia faatolu o ia.
pe e sili ea lou alofa iā te aʻu nai lo o lou naunau i nei mea?: E tusa ai ma le kalama, e tele auala e faauiga ai le faaupuga ʻnai lo o nei mea.’ O nisi tagata atamamai e fiafia i le uiga, “pe e sili atu lou alofa iā te aʻu nai lo o lou alofa i isi soo?” po o le “pe e sili atu lou alofa iā te aʻu nai lo o le alofa o isi soo iā te aʻu?” Peitaʻi, e foliga mai o le uiga saʻo o le faaupuga e faapea, “pe e sili ea lou alofa iā te aʻu nai lo o lou naunau i nei mea?” lea e faasino atu i iʻa na latou maua po o mea e fesootaʻi atu i le pisinisi faifaiva. O lea, e foliga mai o le uiga atoa o le manatu e faapea: ʻPe e sili ea lou alofa iā te aʻu nai lo o lou naunau i meafaitino? Pe afai o lea, ia fafaga aʻu mamoe.’ E talafeagai lenei fesili pe a fua i gaoioiga a Peteru i le taimi ua teʻa. E ui o ia o se tasi o uluaʻi soo o Iesu (Ioa 1:35-42), ae e leʻi mulimuli atu pea iā Iesu i le taimi muamua. Nai lo o lea, na toe foʻi i lana galuega o le faifaiva. I ni nai masina mulimuli ane, na valaaulia ai e Iesu Peteru e tuua lana pisinisi telē ina ia avea ma “faifaiva i tagata.” (Mat 4:18-20; Lu 5:1-11) E lē gata i lea, e leʻi leva talu ona maliu Iesu, ae toe alu Peteru e fagota ma na faatasi atu isi soo iā te ia. (Ioa 21:2, 3) E foliga mai la na faamamafa atu i inei e Iesu iā Peteru, ua tatau ona fai sana filifiliga maumauaʻi: Po o le a ia faamuamua i lona olaga lana pisinisi faifaiva lea na faaāta mai i iʻa na i o latou luma, po o le faamuamua o le fafagaina faaleagaga o mamoe a Iesu po o ona soo?—Ioa 21:4-8.
faatolu: Na faafitia faatolu e Peteru lona Alii, ma na faatolu ona tuu atu e Iesu le avanoa iā Peteru e faamautinoa mai ai ona faalogona e faatatau iā te ia. A o faia faapea e Peteru, na poloaʻia o ia e Iesu ina ia faaalia le alofa ma le alofa faapelepele, e ala i le faamuamua o le auaunaga paia nai lo o se isi mea. Na tatau iā Peteru ma isi uso taʻumatuaina ona fafaga, faamalosia ma leoleo le lafu o soo faamaoni o Keriso. E ui o i latou o ni soo faauuina ae na manaʻomia pea ona fafagaina faaleagaga. —Lu 22:32.
Saʻiliʻiliga Loloto mo ʻOa Faaleagaga
(Ioane 20:17) Ona fetalai atu lea o Iesu iā te ia: “Aua e te pipii mai iā te aʻu. Auā ou te leʻi alu aʻe i le Tamā. A ia e alu i oʻu uso ma fai atu iā i latou, ʻOu te alu aʻe i loʻu Tamā, ma lo outou Tamā, i loʻu Atua ma lo outou Atua.”’
nwtsty faamatalaga mo suʻesuʻega o le Ioa 20:17
Aua e te pipii mai iā te aʻu: O le veape Eleni haʹpto·mai e mafai ona uiga atu i le “tago” po o le “pipii atu.” O nisi o faaliliuga ua faaliliu ai upu a Iesu i le “aua e te tago mai iā te aʻu.” Peitaʻi, e leʻi taofia e Iesu ia Maria le Makatala mai i le tau ina tago atu iā te ia, auā e na te leʻi taofia foʻi nisi o fafine na “fetagofi atu i ona vae” ina ua mavae lona toetū mai. (Mat 28:9) E foliga mai na popole Maria le Makatala e faapea o lea o le a afio aʻe lona Alii i le lagi. O lona naunau tele ina ia faatasi pea ma lona Alii, na ia pipii mau atu ai iā Iesu ina neʻi alu ese atu. Ina ia faamautinoa atu iā Maria e leʻi oo i le taimi e afio aʻe ai, na faatonuina e Iesu o ia ina ia aua neʻi pipii atu, ae ia alu e faailoa atu i ona soo ua toetū mai o Ia.
(Ioane 20:28) Ua tali mai Toma iā te ia: “Loʻu Alii e, ma loʻu Atua!”
nwtsty faamatalaga mo suʻesuʻega o le Ioa 20:28
Loʻu Alii e, ma loʻu Atua!: Pe e faaliliuina i le upu i le upu, “Le Alii o aʻu ma le Atua [ho the·osʹ] o aʻu!” E manatu nisi tagata atamamai atonu sa fai atu e Toma na faaupuga e faailoa atu ai ona faalogona ofo a o talanoa ma Iesu, ae na faasino atu ana faaupuga i le Atua le Tamā o Iesu. Ae ua faapea mai nisi o nei upu e faasino saʻo atu iā Iesu, pe a fua i le uluaʻi gagana Eleni. E tusa po o le tulaga lenā, ae e mafai ona malamalama lelei le uiga o le faaupuga “Loʻu Alii e, ma loʻu Atua!” pe a fua i le siʻomaga atoa o Tusitusiga Paia faagaeeina. Talu ai o lea faatoʻā uma ona faailoa atu e Iesu i ona soo “ou te alu aʻe i loʻu Tamā, ma lo outou Tamā, i loʻu Atua ma lo outou Atua,” e leai la se māfuaaga e faapea atu ai na manatu Toma o Iesu o le Atua e ona le malosi uma lava. (Tagaʻi i le faamatalaga mo suʻesuʻega o le Ioa 20:17.) Na faalogo foʻi Toma o tatalo Iesu i lona “Tamā” ma taʻua o ia o “le Atua moni e toʻatasi.” (Ioa 17:1-3) Atonu na taʻua e Toma Iesu o “loʻu Atua” ona o māfuaaga nei: Na ia manatu iā Iesu “o se atua” ae e lē o le Atua e ona le malosi uma lava. (Tagaʻi i le faamatalaga mo suʻesuʻega o le Ioa 1:1.) Pe atonu na taʻua e Toma Iesu, e pei o le auala na taʻua ai e auauna a le Atua ana agelu avefeʻau lea o loo faamauina i Tusitusiga Paia Eperu. E foliga mai na masani lelei Toma i tala e faatatau i ni tagata po o nisi na tusia le Tusi Paia, o loo talanoa atu i se agelu avefeʻau ae e pei o loo talanoa iā Ieova, pe faamatala foʻi se agelu avefeʻau e pei o ia o Ieova. (Faatusatusa i le Ke 16:7-11, 13; 18:1-5, 22-33; 32:24-30; Fam 6:11-15; 13:20-22.) O lea, atonu na taʻua e Toma Iesu o “loʻu Atua” e faaalia ai lona amanaʻia o le tulaga o Iesu, o se sui ma o le fofoga fetalai a le Atua moni.
Ua finau mai nisi, o le muānauna mautinoa Eleni lea e i luma o upu “alii” ma le “atua,” e faailoa mai ai o loo faasino atu nei faaupuga i le Atua e ona le malosi uma lava. Peitaʻi, e foliga mai e pau le māfuaaga e faaaogā ai le muānauna mautinoa i inei, ona o le kalama faa-Eleni. I le gagana Eleni, e iai taimi e taʻua faatasi ai se nauna ma se muānauna mautinoa, e faasino atu i se taʻu po o se faalupega. O se faataʻitaʻiga o faaliliuga o le upu i le upu o mau e pei o le Lu 12:32 (faaliliuga o le upu i le upu, “le lafu mamoe itiiti”) ma le Ko 3:18–4:1 (faaliliuga o le upu i le upu, “le avā”; “le tane”; “le fanau”; “le tamā”; “le pologa”; “le matai”). I se tulaga talitutusa, o le faaliliuga o le upu i le upu o le 1Pe 3:7 e faapea: “Le tane.” O lea, o le faaaogāina o le muānauna i inei e foliga mai e leai sona tāua i le iloaina po o le ā na manatu i ai Toma ina ua ia faia lenei faaupuga.
nwtsty faamatalaga mo suʻesuʻega o le Ioa 1:1
o se atua foʻi le Upu: Po o le “sa tauatua le Upu [po o “sē e pei o le atua”].” O le faamatalaga lenei a Ioane o loo faamatala ai se uiga po o se vala e faatatau i “le Upu” (i le gagana Eleni, ho loʹgos; tagaʻi i le faamatalaga mo suʻesuʻega o le Upu i lenei fuaiupu), o Iesu Keriso. O le tulaga silisili o le Upu, o ia o le Alo ulumatua o le Atua ma e ala iā te ia na foafoaina ai e le Atua isi mea uma, o se faavae lea e taʻua ai o ia “o se atua; o sē e pei o le atua.” O le toʻatele o le ʻaufaaliliu e fiafia i le faaliliuga “o le atua foʻi le Upu” lea e faatutusa ai Iesu ma le Atua e Ona le Malosi Uma Lava. Peitaʻi, e iai māfuaaga talafeagai e faapea atu ai e leʻi uiga Ioane e tutusa “le Upu” ma le Atua e Ona le Malosi Uma Lava. Muamua, i le Ioane 1:1, 2 pe a vaai i le fuaitau e muamua atu ma mulimuli mai i le vaega “o se atua foʻi le Upu,” o loo taʻua manino mai ai “sa faatasi le Upu ma le Atua.” E lē gata i lea, e faatolu ona faaaogā le upu Eleni the·osʹ i le fuaiupu muamua ma le lua. I le taimi muamua ma le taimi lona tolu, o loo faaaogā ai i luma o le upu the·osʹ se muānauna mautinoa, ae i le taimi lona lua e leai se muānauna mautinoa o loo faaaogā ai. E manatu le toʻatele o tagata atamamai o le leai o se muānauna mautinoa i luma o le upu the·osʹ i le faaaogāina i le taimi lona lua, e iai sona tāua. Pe a faaaogā le muānauna i nei fuaiupu, e faasino atu le the·osʹ i le Atua e Ona le Malosi Uma Lava. Ae pe afai e leai se muānauna mautinoa i luma o le upu the·osʹ, e faasino atu la i se uiga po o se vala e faatatau i “le Upu.” O lea, o nisi o faaliliuga o le Tusi Paia i le faa-Peretania, Falani, ma Siamani e faaliliuina ai lenei mau i se auala e taitutusa ma le Faaliliuga a le Lalolagi Fou, e faailoa mai ai le manatu o “le Upu” “o se atua; o sē e pei o le atua.” E lagolagoina foʻi lenei manatu e ni faaliliuga anamua o le Evagelia a Ioane, lea na faaliliuina i le faa-Sahidic ma le Bohairic, atonu o ni vaega o le gagana Coptic. O lenei faaliliuga atonu na faia i le senituri lona tolu ma le fā T.A., ma o loo faaeseese ai le auala e faaliliu ai le the·osʹ i le taimi muamua ma le taimi lona lua o loo faaaogā ai i le Ioa 1:1. O nei faaliliuga o loo faamatilatila ai se uiga o “le Upu,” o ona uiga e pei o le Atua ae e lē o faatutusa ai o ia ma lona Tamā o le Atua e Ona le Malosi Uma Lava. E ōgatusa lenei fuaiupu ma le auala o loo faamatala ai Keriso i le Kol 2:9 e faapea o loo mau i totonu iā te ia “le tumu uma o le uiga o le Atua.” E tusa ai ma le 2Pe 1:4, e oo lava i ē o le a pule faatasi ma Keriso e ʻavea i latou o agaga e pei o le Atua.’ E lē gata i lea, i le faaliliuga o le Septuagint, o le upu Eleni the·osʹ e tele ina tutusa ma upu Eperu o le ʼel ma le ʼelo·himʹ, lea e faaliliuina i le “Atua,” ma o lona uiga o “Sē e malosi.” O nei upu Eperu e faaaogā pe a faasino atu i le Atua e Ona le Malosi Uma Lava, isi atua ma tagata. O le taʻua o le Upu “o se atua,” po o “sē e malosi,” e ōgatusa ma le valoaga i le Isa 9:6, lea na valoia ai o le a taʻua le Mesia o le “Atua Malosi,” (ae e lē o le Atua e Ona le Malosi Uma Lava) ma o le a avea o ia ma “Tamā o le faavavau” o ē uma e maua le faaeaga e ola ai o ni ona tagatānuu. E faataunuuina lenei mea ona o le maelega o lona Tamā, o “Ieova o ʻau.”—Isa 9:7.
Faitau Tusi Paia
(Ioane 20:1-18) I le uluaʻi aso o le vaiaso, ua usu ai Maria le Makatala i le tuugamau a o pogisa lava, ma ua ia iloa ai ua uma ona aveese le maa mai le tuugamau. 2 Ona ia tamoʻe atu lea iā Simona Peteru ma le isi soo, o lē ua alofa faapelepele i ai Iesu, ma faapea atu iā i laʻua: “Ua latou aveese le Alii mai i le tuugamau, ma ua matou lē iloa le mea ua latou tuuina ai o ia.” 3 Ona ō lea i fafo o Peteru ma le isi soo, ma agaʻi atu i le tuugamau. 4 Ioe, ua amata ona taufetuli i laʻua, ae ona ua saoasaoa tele le isi soo iā Peteru, ua taunuu muamua ai o ia i le tuugamau. 5 Ua punou o ia ma autilo atu i totonu ona iloa atu ai lea o ʻie o loo taatitia mai, ae e leʻi ulu atu o ia i totonu o le tuugamau. 6 Ona mulimuli atu lea o Simona Peteru iā te ia ma ulu atu i le tuugamau. Ua ia vaaia ai ʻie o taatitia mai, 7 o le ʻie foʻi na ufiufi ai lona ao, ua taʻaiʻai ma tuu i le isi itu. 8 O le taimi lenā ua ulu atu ai foʻi le isi soo, o lē na taunuu muamua i le tuugamau, ua ia vaai ma talitonu ai. 9 Auā latou te leʻi matuā malamalama i tusitusiga paia e faapea, e tatau ona toetū mai o ia mai le oti. 10 Ona toe foʻi lea o le ʻausoo i o latou aiga. 11 A ua tū ai pea Maria i fafo i tafatafa o le tuugamau, o loo tagi. A o tagi o ia, ua punou ma autilo atu i totonu o le tuugamau, 12 ua ia iloa atu ai agelu e toʻalua i ofu papaʻe, ua nonofo i le mea na tuu ai le tino o Iesu; o le tasi e i ulu, a o le tasi e i vae. 13 Ona la fai atu lea iā te ia: “Le mafine e, aiseā ua e tagi ai?” Ua fai mai o ia iā i laʻua: “Ua latou aveesea loʻu Alii, ma ou te lē iloa le mea ua latou tuuina ai o ia.” 14 Ua uma ona ia fai atu i nei mea, ona ia faliu lea i tua, ma vaaia ai Iesu o loo tū mai, ae e na te leʻi iloa o Iesu lea. 15 Ua fetalai atu Iesu iā te ia: “Le mafine e, aiseā ua e tagi ai? O ai o loo e saʻilia?” Ua fai mai o ia ma le manatu o le tagata faitogālaau lea, e faapea: “Lau susuga e, afai ua e aveesea o ia, ia taʻu mai iā te aʻu le mea ua e tuuina ai o ia, ina ia ou alu atu e ave o ia.” 16 Ua fetalai atu Iesu iā te ia: “Maria e!” ua ia faliu ma faapea mai iā te ia i le gagana Eperu: “Raponi e!” (o lona uiga “le Aʻoaʻo e!”) 17 Ona fetalai atu lea o Iesu iā te ia: “Aua e te pipii mai iā te aʻu. Auā ou te leʻi alu aʻe i le Tamā. A ia e alu i oʻu uso ma fai atu iā i latou, ʻOu te alu aʻe i loʻu Tamā, ma lo outou Tamā, i loʻu Atua ma lo outou Atua.”’ 18 Ona alu atu lea o Maria le Makatala ma taʻu atu le tala i le ʻausoo e faapea: “Ua ou vaai i le Alii!” ma na ia fetalai atu nei mea iā te ia.
NOVEMA 12-18
ʻOA TAUTELE MAI I LE AFIOGA A LE ATUA | GALUEGA 1-3
“Ua Liligi Ifo le Agaga Paia i le Faapotopotoga Kerisiano”
(Galuega 2:1-8) A o faagasolo le aso o le tausamiga o le Penetekoso, ua faatasitasi i latou uma i le nofoaga e tasi. 2 Ona faafuaseʻi mai lea ona taalili mai i le lagi e pei o le agi o se matagi malosi, ma ua tumu ai le fale atoa lea o loo latou nonofo ai. 3 Ona latou iloa ai lea o ni laulaufaiva e pei o le afi, ua salalau atu ma nofo i luga o i latou taʻitoʻatasi, 4 ona faatutumuina ai lea o i latou uma i le agaga paia, ma amata ai ona tautatala i gagana eseese, e pei ona foaʻiina mai e le agaga o le gagana iā i latou. 5 Sa iai i Ierusalema tagata Iutaia o ē e matataʻu i le Atua mai i atunuu uma i lalo o le lagi. 6 Ina ua faalogoina lenei taalili tele, ona ō mai ai lea o le motu o tagata e toʻatele ma ua matuā taufaiofo, auā ua taʻitasi ma faalogo atu iā i latou o tautala i lana lava gagana. 7 O le mea moni, ua taufaiofo i latou, ua taumānatu ma faapea ane: “Seʻi vaai, pe e lē o tagata Kalilaia ea i latou uma o loo talanoa mai? 8 Ae faapefea ona taʻitasi i tatou ma faalogo atu i lana lava gagana na fanau mai ai?
(Galuega 2:14) Ua tū i luga Peteru faatasi ma le toʻasefulu tasi ma fai atu iā i latou ma le leotele: “Tagata Iutaia e, ma outou uma o ē o nonofo i Ierusalema, ia outou iloa lenei mea, ma ia faafofoga mai i aʻu upu.
(Galuega 2:37, 38) Ina ua latou faalogo i lenei mea, ona tuia lea o o latou loto, ma fai mai iā Peteru ma isi aposetolo: “Le ʻauuso e, o le ā se mea e ao ona matou faia?” 38 Ua fai atu Peteru iā i latou: “Inā salamō ia ma ia taʻitasi ma papatisoina outou i le suafa o Iesu Keriso mo le faamagaloina o a outou agasala, ona outou maua lea o le meaalofa foaʻifua o le agaga paia.
(Galuega 2:41) O lea, ua papatisoina ai i latou uma na talia ma le lotoatoa lana upu, ma i lenā aso, pe tusa ma le tolu afe o tagata ua faaopoopo atu
(Galuega 2:42-47) Ua faaauau ona latou uaʻi atu i aʻoaʻoga a le ʻauaposetolo ma fetufaaʻi a latou mea, ua aai faatasi ma tatalo.43 O le mea moni, ua amata ona matataʻu tagata uma, ma ua tutupu foʻi le tele o mea ofoofogia ma faailoga e ala mai i aposetolo. 44 Ona tuufaatasi lea o mea uma a i latou ua talitonu, 45 ma ua faatau atu a latou meatotino, ma fanua, ma tufatufa atu le tau o nei mea i tagata uma, e tusa ai ma manaʻoga o tagata taʻitoʻatasi. 46 Ua iai pea i latou ma le lotogatasi i le malumalu i lea aso ma lea aso, ua latou aai i fale o aiga ma le olioli tele ma le lotomamā, 47 ua vivii i le Atua ma ua alofagia i latou e tagata uma. O le taimi lava lenā, ua faaopoopo atu ai e Ieova iā i latou i aso taʻitasi o ē ua faaolaina.
w86 12/1 29 ¶4-5, 7
Foaʻi Tauofo e Faafiafiaina ai le Loto
I le uluaʻi aso talu ona faavaeina le faapotopotoga Kerisiano i le 33 T.A., na ʻfetufaaʻi ai mea, aai faatasi ma tatalo’ le toʻa 3,000 o ē liulotu na faatoʻā papatiso. Aiseā na lelei ai lo latou faia faapea? Ina ia mafai ai ona faamalosia lo latou faatuatuaga fou e ala i le ʻfaaauau ona uaʻi atu i aʻoaʻoga a le ʻauaposetolo.’—Galuega 2:41, 42.
O tagata Iutaia ma ē liulotu na ō mai i Ierusalema, na fuafua e nonofo mo na o le taimi o le Tausamiga o le Penetekoso. Peitaʻi, o ē na avea ma Kerisiano na mananaʻo e nonofo mo se taimi umi ma aʻoaʻo le tele o mea ina ia faamalosia ai lo latou faatuatuaga fou. O lenā mea na tulaʻi mai ai se manaʻoga mo meaʻai ma mea e nonofo ai. O nisi na asiasi mai e leʻi lava a latou tupe, a o isi na tele a latou mea na iai. O lea, na fefaasoaaʻi ai ma tufatufaina atu meafaitino i se taimi lē tumau iā i latou na manaʻomia le fesoasoani.—Galuega 2:43-47.
Na faatauofo le faatauina ese atu o fanua ma le fefaasoaaʻi o mea meafaitino. E leʻi faamalosia se tasi e faatau ese pe foaʻi atu ni ana mea. E leʻi faia foʻi ma se fuafuaga e uma ane ua mativa ai se isi. E lē o le fuafuaga o lenei faatulagaga ina ia faatau ese e ē mauʻoa a latou mea uma ma iʻu ai ina matitiva. Nai lo o lea, o le alolofa mutimutivale mo uso talitonu na aafia i nei tulaga i lea taimi, na faatau ese ai a latou mea ma ofo atu tupe uma ina ia saunia ai mea manaʻomia e faaauiluma ai manaʻoga o le Malo.—Faatusatusa i le 2 Korinito 8:12-15.
Saʻiliʻiliga Loloto mo ʻOa Faaleagaga
(Galuega 3:15) ae na outou fasiotia le Sui Sili o le ola. O lea ua toe faatūina o ia e le Atua mai i le oti, ua avea i maʻua ma molimau i lenei mea.
it-2 61 ¶1
Iesu Keriso
“Sui Sili o le ola.” O le ofoina atu e Iesu o lona ola lelei atoatoa e fai ma taulaga, o se faailoaga lea o le agalelei faifua o lona Tamā. Ua mafai ai e soo filifilia o Keriso ona pule faatasi ma ia i le lagi, ma saunia ai foʻi le avanoa mo tagatānuu o lona Malo e ola ai i le lalolagi i lana pulega. (Mat 6:10; Ioa 3:16; Efe 1:7; Epe 2:5) O lea ua avea ai o ia ma “Sui Sili [“Perenise,” KJ; JB] o le ola” mo tagata uma. (Ga 3:15) O le upu Eleni o loo faaaogāina i inei, o lona uiga faigofie o “lē na te taʻitaʻiina,” o se upu e taitutusa ma le upu na faasino atu iā Mose (Ga 7:27, 35) o le “taʻitaʻi” i Isaraelu.
(Galuega 3:19) “O le mea lea, inā salamō ia ma liliu, ina ia soloiesea a outou agasala, ma ia oo mai ai le taimi e toe faafouina ai mai iā Ieova lava ia
Se Atua e “Faamagalo Sala”
14 O loo faamatala atili mai le faamagaloga a Ieova i le Galuega 3:19: “O lenei, inā salamō ia ma liliu, ina ia soloiesea a outou agasala.” O le upu soloiesea e faaliliuina mai ai le veape Eleni o lona uiga, “ia tapē ese, . . . faalēaogā pe faatamaʻia.” E manatu nisi tagata atamamai, o le manatu lea e faamatalaina, o le tapē ese o se tusilima. Na mafai faapefea ona faia lenei mea? O le vaitusi sa taatele lona faaaogāina i taimi anamua, sa faia mai i se paluga na palu faatasi ai se lama uliuli (carbon), le sua e pei o se apulupulu (gum), ma le vai. Pe a uma ona tusitusi se tagata i le faaaogāina o lenā vaitusi, ona ia aumai lea o se omomi susū ma tapē ese ai lenā tusitusiga. O inā o loo iai se ata matagofie o le alofa mutimutivale o Ieova. Pe a ia faamagaloina a tatou agasala, e tai pei o loo ia aumaia se omomi ma tapē ese ai na agasala.
it-1 129 ¶2-3
O ai na suitulaga iā Iuta le Sekara e avea ma aposetolo lona sefulu lua?
Ina ua fulitua Iuta le Sekara lea na oti o se tagata lē faamaoni, na totoe ai na o aposetolo e 11. E leʻi filifilia e Iesu se isi e suitulaga iā Iuta i totonu o le 40 aso talu lona toetū mai, seʻia oo i le taimi na toe afio ai i le lagi. I se taimi i totonu o le 10 aso talu lona toe afio i le lagi seʻia oo i le aso o le Penetekoso, na tatau ona filifili se tasi e suitulaga iā Iuta. E lē o le māfuaaga ona ua oti Iuta, ae ona o lona fulitua e pei ona faailoa mai i Tusitusiga Paia na sii mai e Peteru. (Ga 1:15-22; Sl 69:25; 109:8; faatusatusa le Fal 3:11.) O lea, i se faaeseesega, ina ua fasiotia le aposetolo faamaoni o Iakopo, e leai ni faamaumauga na iloa ai na tofia se isi e suia lona tulaga o se aposetolo.—Ga 12:2.
E manino mai i le faamatalaga a Peteru, o so o se tasi e suitulaga o se aposetolo o Iesu Keriso e tatau ona ausia agavaa nei: na faifaimea faatasi ma talanoa tuusa‘o iā Iesu, na vaaitino i galuega a Iesu, o ana vavega, aemaise lona toetū mai. Pe a fua i nei tulaga, e foliga mai e leai se isi o le a toe agavaa e avea ma aposetolo i se taimi mulimuli ane, seʻi vaganā ai ua tofia e le Atua. A o lumanaʻi le aso o le Penetekoso, sa iai tane na latou ausia na agavaa, ma e to‘alua na faatutū atu e filifili ai sē e suitulaga iā Iuta na lē faamaoni. E lē taumatea, a o latou manatunatu i le Faataoto 16:33, na latou faia ai se vili ma na filifilia ai loa Matatia, ma na “taʻua ai o ia o se aposetolo faatasi ma le to‘asefulu tasi.” (Ga 1:23-26) O lea, na aofia ai o ia i le “to‘asefulu lua” lea na foʻiaina le faafitauli e faatatau i soo e tautatala i le gagana Eleni. (Ga 6:1, 2) E manino mai foʻi na aofia Matatia i le “to‘asefulu lua” lea na faasino i ai Paulo i le 1 Korinito 15:4-8, ina ua talanoa e faatatau i le faaali mai o Iesu ina ua toetū mai. O lea, e oo ane i le aso o le Penetekoso ua iai aposetolo e 12 e avea ma faavae mautū o le Isaraelu faaleagaga lea ua faavaeina.
Faitau Tusi Paia
(Galuega 2:1-21) A o faagasolo le aso o le tausamiga o le Penetekoso, ua faatasitasi i latou uma i le nofoaga e tasi. 2 Ona faafuaseʻi mai lea ona taalili mai i le lagi e pei o le agi o se matagi malosi, ma ua tumu ai le fale atoa lea o loo latou nonofo ai. 3 Ona latou iloa ai lea o ni laulaufaiva e pei o le afi, ua salalau atu ma nofo i luga o i latou taʻitoʻatasi, 4 ona faatutumuina ai lea o i latou uma i le agaga paia, ma amata ai ona tautatala i gagana eseese, e pei ona foaʻiina mai e le agaga o le gagana iā i latou. 5 Sa iai i Ierusalema tagata Iutaia o ē e matataʻu i le Atua mai i atunuu uma i lalo o le lagi. 6 Ina ua faalogoina lenei taalili tele, ona ō mai ai lea o le motu o tagata e toʻatele ma ua matuā taufaiofo, auā ua taʻitasi ma faalogo atu iā i latou o tautala i lana lava gagana. 7 O le mea moni, ua taufaiofo i latou, ua taumānatu ma faapea ane: “Seʻi vaai, pe e lē o tagata Kalilaia ea i latou uma o loo talanoa mai? 8 Ae faapefea ona taʻitasi i tatou ma faalogo atu i lana lava gagana na fanau mai ai? 9 O Patia ma Metai, o Elama ma tagata o loo nonofo i Mesopotamia, o Iutaia ma Kapatokia, o Pono ma le itumalo o Asia, 10 o Ferukia ma Pafulia, o Aikupito ma vaega o Lipua lea e agaʻi atu i Kurene, ma tagata malaga mai i Roma, o tagata Iutaia ma tagata liulotu, 11 o Kereta ma Arapi, ua tatou faalogo atu iā i latou o tautatala mai i a tatou lava gagana, e uiga i mea matagofie a le Atua.” 12 Ioe, ua matuā ofo i latou uma, ma ua fenuminumiaʻi ma faapea ane le tasi i le isi: “O le ā le uiga o lenei mea?” 13 Ae peitaʻi, ua tauemu nisi iā i latou ma faapea ane: “Ua onanā i latou i le uaina suamalie.” 14 Ua tū i luga Peteru faatasi ma le toʻasefulu tasi ma fai atu iā i latou ma le leotele: “Tagata Iutaia e, ma outou uma o ē o nonofo i Ierusalema, ia outou iloa lenei mea, ma ia faafofoga mai i aʻu upu. 15 O le mea moni, e lē o onanā nei tagata e pei ona outou manatu ai, auā o le itula e tolu lenei o le aso. 16 Ae o le mea lenei na fai mai ai e ala i le perofeta o Ioelu. 17 ʻUa fetalai mai le Atua: “O aso e gata ai, ou te liligi ifo ai loʻu agaga i luga o ituaiga uma o tagata, ona fai ai lea e o outou atalii ma o outou afafine o valoaga, e iloa faaaliga e o outou tauleleʻa, e fai foʻi miti e o outou toeaina. 18 E oo foʻi ina ou liligi ifo loʻu agaga i na aso i aʻu tane pologa ma aʻu fafine pologa, ona latou faia lea o valoaga. 19 Ou te faia mea ofoofogia i le lagi i lugā, ma faailoga i le lalolagi nei, o le toto ma le afi, ma le asu faaniutū. 20 O le a liua le lā i le pōuliuli, e liua foʻi le masina i le toto a o leʻi oo mai le aso tele ma le mataʻina o Ieova. 21 E faaolaina foʻi i latou uma o ē e valaau i le suafa o Ieova.”’
NOVEMA 19-25
ʻOA TAUTELE MAI I LE AFIOGA A LE ATUA | GALUEGA 4-5
“Ua Latou Taʻutaʻu Atu Pea Afioga a le Atua ma le Lototetele”
(Galuega 4:5-13) I le aso na sosoo ai, ua faapotopoto faatasi ai i Ierusalema o latou taʻitaʻi, o toeaina, ma le ʻautusiupu, 6 (atoa foʻi ma Ana le faitaulaga sili, o Kaiafa ma Ioane, o Alesana ma le toʻatele o le ʻauaiga o le faitaulaga sili), 7 ua latou faatutū iā i laʻua i o latou luma ma fesili atu: “O le ā le mana, ma o le igoa o ai ua oulua faia ai lenei mea?” 8 Ona faapea atu lea o Peteru o lē ua tumu i le agaga paia iā i latou: “Taʻitaʻi e, o le nuu ma toeaina, 9 afai ua suʻesuʻeina i maʻua i le asō ona o le mea lelei ua faia i le tagata maʻi, ma e faatatau i lē ua mafai ai ona malosi lenei tagata, 10 ia iloa e outou faapea foʻi ma tagata uma o Isaraelu, o le suafa o Iesu Keriso le Nasareta, o lē na outou tutuʻia i luga o le laau a ua toe faatūina e le Atua mai i le oti, o ia lea ua malosi ai lenei tagata ua tū atu i o outou luma. 11 O le ʻmaa lenei na faalēaogā e outou tufuga, a ua avea ma maa tulimanu sili.’ 12 E leai foʻi se isi e mafai ona maua ai le faaolataga, auā e leai se isi igoa i lalo o le lagi ua tuuina mai e le Atua i tagata, e tatau ona faaolaina ai i tatou.” 13 O lea, ina ua vāai i latou i le lototetele o Peteru ma Ioane e tautatala atu, ma ua iloa ai o i laʻua o ni tagata e leʻi lava ni aʻoaʻoga ma e faatauvaa, ona latou taufaiofo ai lea. Ua latou iloa foʻi sa masani ona faatasi i laʻua ma Iesu,
w08 9/1 15, pusa
Mai i Fetalaiga Tuusaʻo Seʻia Avea ma Tusitusiga Paia—Tusitusiga ma Uluaʻi Kerisiano
Pe Moni sa Lē Iloa e Aposetolo Faitau ma Tusitusi?
Ina ua vāai atu taʻitaʻi ma toeaina o Ierusalema i le “lototetele o Peteru ma Ioane e tautatala atu, ma ua iloa ai o i laʻua o ni tagata faatauvaa ma e leʻi lava so la aʻoaʻoina, ona latou taufaiofo ai lea.” (Galuega 4:13) Pe moni sa leʻi aʻoaʻoina, pe sa lē iloa e le ʻauaposetolo faitau ma tusitusi? E tusa ai ma lenei manatu, ua taʻua e le The New Interpreter’s Bible: “O nei faaupuga e lē faapea ai sa leʻi aʻoʻoga pe lē iloa e Peteru [ma Ioane] faitau ma tusitusi. Ae o loo faailoa mai ai le eseesega o tulaga o i latou o loo i le tulaga tau faamasino, ma le tulaga o le ʻauaposetolo.”
Manatu Tāua Mai le Tusi o Galuega
4:13—Po o Peteru ma Ioane o ni tagata e lē iloa faitau ma leʻi aʻoaʻoina? E leai. Sa taʻua i laʻua o ni tagata “faatauvaa ma e leʻi aʻoaʻoina,” ona e leʻi aʻoaʻoga i laʻua i aʻoga a le ʻau Rapi mo aʻoaʻoga faalotu.
(Galuega 4:18-20) Mulimuli ane, ona latou aami lea o i laʻua ma fai atu i ai, ua matuā sā lava ona toe taʻua pe aʻoaʻo atu i le igoa o Iesu. 19 A ua tali atu Peteru ma Ioane iā i latou: “Pe e tonu i le silafaga a le Atua ona ma faalogo iā te outou nai lo o le Atua, ia pule outou. 20 A o i maʻua, e lē mafai ona ma lē taʻu atu mea ua ma vāai ma faalogo i ai.”
(Galuega 4:23-31) Ina ua uma ona tatala i laʻua, ona la ō atu lea i le ʻauuso, ma faamatala atu mea na fai atu ai le ʻaufaitaulaga sili ma toeaina iā i laʻua. 24 Ua faalogo i latou i lenei mea, ona tatalo atu lea i le Atua ma le lotogatasi ma faapea atu:“Le Alii Pule Silisili Ese e, o Oe na e faia le lagi ma le lalolagi, o le sami ma mea uma o iai, 25 ma o lē na fetalai mai e ala i le agaga paia i le fofoga o lo matou augātamā o Tavita lau auauna, ʻAiseā ua vevesi ai atunuu ma mafaufau ai tagata i mea e lē aogā? 26 Ua tutū faatasi tupu o le lalolagi ma ua taupulepule faatasi taʻitaʻi e faasagatau iā Ieova ma lē na ia faauuina.’ 27 O lea foʻi, na faapotopoto faatasi ai Herota ma Ponotio Pilato ma tagata o atunuu, faapea tagata Isaraelu i lenei aai, e faasagatau i lau auauna paia o Iesu o lē ua e faauuina, 28 ina ia faia mea na muaʻi tofia e lou mana ma lou finagalo ia oo mai. 29 O lenei, Ieova e, ia e silasila mai i la latou faamataʻu, ma ia tuuina mai i au pologa le malosi e tautatala atu ai pea i lau afioga ma le lototetele, 30 a o e faaloaloa mai lou aao e faamālōlō ai ma a o tutupu faailoga ma mea ofoofogia, e ala i le suafa o lau auauna paia o Iesu.” 31 Ina ua uma la latou tatalo, ona lūlūina lea o le mea o loo latou faapotopoto faatasi ai; ua faatutumuina foʻi i latou uma i le agaga paia, ma ua taʻutaʻu atu le afioga paia a le Atua ma le lototetele.
it-1 128 ¶3
Aposetolo
Galuega i le Faapotopotoga Kerisiano. O le liligiina ifo o le agaga paia o le Atua i le ʻauaposetolo i le Penetekoso, na matuā faamalosia ai i latou. O mataupu muamua e lima o le tusi o Galuega a le ʻAuaposetolo, o loo faamaonia ai le matuā lē fefefe ma le lototetele o le ʻauaposetolo e faalauiloa atu le tala lelei faapea le toetū o Iesu, e ui ina faafalepuipui, sasaina, ma faamataʻuina i latou i le oti e taʻitaʻi lotu. A o faasolo uluaʻi taimi talu ona mavae atu le Penetekoso, o le taʻitaʻiga malosi a le ʻauaposetolo e ala i le fesoasoani a le agaga paia, na iʻu atu ai i se faatelega mataʻina o le faapotopotoga Kerisiano. (Ga 2:41; 4:4) Na taulaʻi muamua atu la latou faiva i Ierusalema, ona faalautele atu lea i Samaria, ma mulimuli ane oo atu i tuluʻiga uma o le lalolagi.—Ga 5:42; 6:7; 8:5-17, 25; 1:8.
Saʻiliʻiliga Loloto mo ʻOa Faaleagaga
(Galuega 4:11) O le ʻmaa lenei na faalēaogā e outou tufuga, a ua avea ma maa tulimanu sili.’
it-1 514 ¶4
Maa Tulimanu
O loo taʻua i le Salamo 118:22, o le maa na tuulafoaʻiina e tufuga o le a avea ma “maa tulimanu sili” (faa-Eperu, roʼsh pin·nahʹ). Na sii mai e Iesu lenei valoaga ma faatatau atu iā te ia lava o le “maa tulimanu sili” (faa-Eleni, ke·pha·leʹ go·niʹas, maa aupitoaluga). (Mat 21:42; Mar 12:10, 11; Lu 20:17) E pei lava ona tū matilatila mai le maa aupitoaluga o se fale, e faapena foʻi Iesu Keriso le maa tulimanu sili o le faapotopotoga o Kerisiano faauuina, lea ua faatusaina i se malumalu faaleagaga. Na faatatau atu foʻi e Peteru le Salamo 118:22 iā Keriso, e faaalia ai o ia “le maa” lea na tuulafoaʻiina e tagata, ae ua filifilia e le Atua e avea ma “maa tulimanu sili.”—Ga 4:8-12; tagaʻi foʻi i le 1Pe 2:4-7.
(Galuega 5:1) Ae peitaʻi, o se tasi tagata e igoa iā Anania ma lana avā o Safaira, na faatau atu so la fanua,
Na Pepelo Peteru ma Anania—O le ā se Lesona e Aʻoaʻoina Mai Ai?
Na faatau atu e Anania ma lona toʻalua so la fanua ina ia maua ai se tupe e tausia ai i latou nei. Ae ina ua alu atu Anania i le ʻauaposetolo, sa pepelo atu o ia e faapea o le tupe atoa lea o le tau o le fanua. Sa faailoa atu e le Atua iā Peteru lenei mea, ona faapea atu lea o Peteru iā Anania: “Ua e lē pepelo . . . i tagata, a o le Atua.” O le taimi lava lenā na oti ai Anania, ma na mulimuli ane oti foʻi lona toʻalua ona sa pepelo foʻi o ia.
Faitau Tusi Paia
(Galuega 5:27-42) Ona latou aumaia lea o i latou ma faatutū i le potu o le Faamasinoga Sili. Ua fesiligia i latou e le ositaulaga sili 28 ma faapea mai: “Na matou matuā fai atu iā te outou, e matuā sā lava ona toe aʻoaʻo atu i lenā igoa, ae faauta! ua outou faatumu Ierusalema i a outou aʻoaʻoga, ma ua outou maumauaʻi e tuuina mai i o matou luga le toto o lenā tagata.” 29 Ua tali mai Peteru ma isi aposetolo: “E tatau ona matou usiusitaʻi i le Atua o le pule, nai lo o tagata. 30 Ua faatūina e le Atua o o tatou augātamā Iesu, o lē na outou fasiotia i le faatautauina o ia i le laau. 31 Ua faaeaina o ia e le Atua i lona itu taumatau o le Sui Sili ma o le Faaola, ina ia mafai ai ona salamō Isaraelu, ma maua ai le faamagaloga o agasala. 32 O i matou o molimau i nei mea, faapea foʻi le agaga paia, lea ua tuuina mai e le Atua iā i latou e usiusitaʻi iā te ia, o le pule.” 33 Ina ua latou faalogo i lenei mea, ona matuā tigā ai lea ma mananaʻo e fasioti iā i latou. 34 A ua tulaʻi mai se tagata o le Faamasinoga Sili, o se Faresaio e igoa iā Kamalielu, o le faiaʻoga o le Tulafono e faaaloalogia e tagata uma, ma faatonu atu ina ia tuu atu i fafo nei tamāloloa mo sina taimi. 35 Ona ia faapea atu lea iā i latou: “Tagata o Isaraelu e, ia outou faaeteete i le mea ua outou mananaʻo e fai i nei tamāloloa. 36 Auā i aso ua mavae, na tulaʻi mai ai Tiuta ma faapea mai, o ia o se tagata tāua, ma e toʻatele tane pe e tusa ma le toʻafā selau na auai i lana vaega. Ae na fasiotia o ia ma faataapeapeina i latou uma na usiusitaʻi iā te ia, ma lē taulau ai na taumafaiga. 37 Ua mavae atu o ia ae tulaʻi mai Iuta le Kalilaia i aso o le tusigāigoa, ma na ia taaʻina atu tagata e mulimuli atu iā te ia. Ae na oti foʻi lenā tagata, ma na faataapeapeina foʻi i latou uma na usiusitaʻi iā te ia. 38 O le mea lea ou te fai atu ai iā te outou, Aua tou te aiā i nei tagata, ae tuu ai pea i latou, (auā afai e mai i tagata lenei fuafuaga ma lenei galuega, e soloia, 39 ae afai e mai i le Atua, e lē mafai ona outou soloia;) ina neʻi mea ane ua outou fai taua i le Atua.” 40 Ona latou faalogo lea iā te ia, ma aumai le ʻauaposetolo, ua sasa i latou ma faatonu atu, e aua neʻi toe tautatala i le suafa o Iesu, ma tuu atu loa i latou e ō. 41 Ona ō ese ai lea o i latou mai i luma o le Faamasinoga Sili, ua olioli ina ua taʻuaogāina i latou ia faaleagaina ona o lona suafa. 42 Ua lē aunoa ona latou aʻoaʻo atu i aso uma lava, ma folafola atu le tala lelei e uiga iā Iesu le Keriso, i le malumalu ma mai i lea fale i lea fale.
NOVEMA 26–TESEMA 2
ʻOA TAUTELE MAI I LE AFIOGA A LE ATUA | GALUEGA 6-8
“Ua Tofotofoina le Faapotopotoga Kerisiano Fou”
(Galuega 6:1) I na aso ina ua faatoʻateleina le ʻausoo, ua muimui ai tagata Iutaia e tautatala i le gagana Eleni, i tagata Iutaia e tautatala i le gagana Eperu, ona ua lē faaaofia o latou fafine ua oti a latou tane, i le tufatufaina o mea i aso fai soo.
“E Tatau Ona Matou Usiusitaʻi i le Atua o le Pule”
17 Ua fesagaʻi nei lenei faapotopotoga fou, ma se lamatiaga iloagatā e faamataʻuina ai. O le ā lenā lamatiaga? O le toʻatele o soo ua uma ona papatisoina, na asiasi atu i Ierusalema ma mananaʻo e aʻoaʻo atili nisi mea, a o leʻi foʻi atu i o latou aiga. O soo na nonofo i Ierusalema, na foaʻi atu ma le lotomalilie tupe e faatau ai meaʻai ma isi mea na manaʻomia. (Galu. 2:44-46; 4:34-37) I le taimi lea, ua tulaʻi mai ai se faafitauli. E leʻi ʻaofia fafine ua oti a latou tane’ e tautatala i le gagana Eleni, “i le tufatufaina o [meaʻai] i aso fai soo.” (Galu. 6:1) Ae peitaʻi, na aofia ai na o fafine ua oti a latou tane, e tautatala i le gagana Eperu. O le faafitauli la, e foliga mai o le faailoga tagata. E iai isi mataupu e ono tulaʻi mai ai ni fevaevaeaʻiga nai lo o lenei.
(Galuega 6:2-7) Ona aami lea e le toʻasefulu lua o le toʻatele o soo ma faapea atu: “E lē lelei ona matou tuua le afioga a le Atua ae tufatufa atu meaʻai. 3 O lea, le ʻauuso e, ia outou saʻili mai ni tagata agavaa se toʻafitu e tutumu i le agaga ma le atamai, ina ia matou tofia i latou e faia lenei galuega tatau; 4 ae peitaʻi, o le a matou faasaga i le tatalo ma le faiva e tusa ai ma le afioga a le Atua.” 5 Ua fiafia foʻi tagata uma i le upu ua fai mai, ona latou filifilia lea o Setefano, o le tagata ua tumu i le faatuatua ma le agaga paia, o Filipo ma Pokoro, o Nikanora ma Timona, o Pamena ma Nikolao, o se tagata liulotu mai i Anetioka, 6 ua aumaia i latou i luma o le ʻauaposetolo, ma ina ua uma le tatalo, ona faaee atu lea o o latou lima iā i latou. 7 Ua tupu pea le afioga a le Atua, ma ua matuā faatoʻateleina soo i Ierusalema; e toʻatele foʻi faitaulaga ua usiusitaʻi i le faatuatua.
“E Tatau Ona Matou Usiusitaʻi i le Atua o le Pule”
18 O aposetolo, ua avea o le vaega pule a le faapotopotoga ua faatoʻateleina, na latou iloa e lē tatau ona “tuua le afioga a le Atua ae tufatufa atu meaʻai.” (Galu. 6:2) Ina ia foʻia lenei faafitauli, na latou faatonuina ai soo ia saʻili ni tane agavaa se toʻafitu, ua “tutumu i le agaga ma le atamai,” ina ia tofia e aposetolo e faia lenei “galuega tatau.” (Galu. 6:3) Sa manaʻomia ni tane agavaa, ona e foliga mai, o lenei galuega e lē gata e aofia ai le tufatufaina atu o meaʻai, a o le faasoaina foʻi o tupe, le faatauina o mea e manaʻomia, ma le tausia lelei o faamaumauga. O tane uma na filifilia, e iai o latou igoa Eleni, atonu ina ia taliagofie ai i latou e fafine ua feita. Ina ua uma ona iloiloina ma le faaeteete ma le tatalo le filifiliga na faia, na tofia ai loa e aposetolo nei tane e toʻafitu e vaaia lenei “galuega tatau.”
(Galuega 7:58–8:1) Ua latou lafo o ia i tua o le aai, ona fetogi lea iā te ia i maa. Ua tuu e ē na molimau o latou ofu tele i vae o se tauleʻaleʻa e igoa iā Saulo. 59 Ua latou fetogi atu pea maa iā Setefano a o ōle atu o ia ma faapea atu: “Le Alii e, Iesu, ia e talia mai loʻu agaga.” 60 Ona ia tootuli lea ma alaga i se leo malosi: “Ieova e, aua e te tuuaʻia i latou i lenei agasala.” Ina ua mavae ona fai atu o nei upu, ona oti ai lea o ia.
8 Ua ioe foʻi Saulo i le fasiotiga o ia. I lea aso, ua oo ai sauāga e tele i le faapotopotoga i Ierusalema; ua faataapeapeina ai foʻi i latou uma i vaipanoa o Iutaia ma Samaria seʻi vaganā ai le ʻauaposetolo.
Saʻiliʻiliga Loloto mo ʻOa Faaleagaga
(Galuega 6:15) Ua pulatoʻa atu iā te ia i latou uma o loo nonofo i le Faamasinoga Sili, ma ua latou iloa ai ua pei ona fofoga o fofoga o se agelu.
O Setefano—“Ua Tumu i le Agalelei ma le Mana”
2 E iai se mea mataʻina o loo vaaia i foliga o Setefano i lenā taimi. Ua pulatoʻa atu faamasino iā te ia, ma ua iloa ai ua pei ona fofoga “o fofoga o se agelu.” (Galu. 6:15) O agelu e aumaia feʻau mai iā Ieova le Atua, o le mea lea e lē fefefe ai, ae e toʻafilemu. O le faalogona lenā sa iā Setefano—ma sa mafai ona iloa atu lenā mea e faamasino o loo tumu i le ʻinoʻino. Na faapefea ona toʻafilemu pea o ia?
(Galuega 8:26-30) Ae peitaʻi, ua taʻu atu e se agelu a Ieova iā Filipo e faapea: “Inā tulaʻi ia ma alu atu i saute i le auala e ui mai Ierusalema e oo atu i Kasa.” (O se auala i le toafa.) 27 Ona tulaʻi lea o ia ma alu, seʻi faauta! ua iai le eunuka Aitiope, o se tagata maualuga i le pulega a Kanake, le tupu tamaʻitaʻi o Aitiope, ma e vaaia e ia ana oloa uma. Sa alu atu o ia i Ierusalema e tapuaʻi, 28 a ua toe foʻi o ia ma o loo nofo i lana kariota ma faitau leotele le tusi a le perofeta o Isaia. 29 O lea, ua fai atu ai le agaga iā Filipo: “Ia e faalatalata atu i lenā kariota.” 30 Ua tamoʻe atu Filipo i tafatafa o le kariota, ma faalogo atu o loo ia faitauina le tusi a le perofeta o Isaia, ona ia faapea atu lea: “Po ua e malamalama i mea ua e faitauina?”
Folafola Atu “le Tala Lelei E Uiga Iā Iesu”
16 Ua faaeaina Kerisiano i aso nei e auai i le galuega sa faia e Filipo. E masani ona latou maua avanoa e molimau lē fuafuaina atu ai, le feʻau o le Malo pe a faimalaga. I le tele o taimi, e latou te feiloaʻi ai ma nisi e faaalia le lotofiafia. E tatau ona faatalitalia lenei mea, talu ai ua taʻua manino i le Tusi Paia, o loo taʻitaʻia le galuega talaʻi e agelu ina ia oo atu lenei feʻau i “nuu uma, ma ituaiga uma, ma gagana uma, ma tagata uma.” (Faaa. 14:6) O le taʻitaʻiga a agelu i le galuega talaʻi, o le mea moni lenā na valoia e Iesu. I lana faataoto e uiga i saito ma vao leaga, na fetalai Iesu, o le taimi o le seleselega—le taufaaiʻuiʻuga o faiga o mea a le lalolagi—“o ē selesele, o agelu ia.” Na fetalai atili o ia, o nei meafaiola agaga, e “latou te ao ese mai i lona malo, o mea uma e māfua ai ona tausuai, ma i latou uma o ē solitulafono.” (Mata. 13:37-41) I le taimi e tasi, e aoaoina mai e agelu ia suli o le Malo o le lagi—ma mulimuli ane “o se motu o tagata e toʻatele” o “isi mamoe”—o ē e finagalo Ieova e aumai i lana faalapotopotoga.—Faaa. 7:9; Ioa. 6:44, 65; 10:16.
Faitau Tusi Paia
(Galuega 6:1-15) I na aso ina ua faatoʻateleina le ʻausoo, ua muimui ai tagata Iutaia e tautatala i le gagana Eleni, i tagata Iutaia e tautatala i le gagana Eperu, ona ua lē faaaofia o latou fafine ua oti a latou tane, i le tufatufaina o mea i aso fai soo. 2 Ona aami lea e le toʻasefulu lua o le toʻatele o soo ma faapea atu: “E lē lelei ona matou tuua le afioga a le Atua ae tufatufa atu meaʻai. 3 O lea, le ʻauuso e, ia outou saʻili mai ni tagata agavaa se toʻafitu e tutumu i le agaga ma le atamai, ina ia matou tofia i latou e faia lenei galuega tatau; 4 ae peitaʻi, o le a matou faasaga i le tatalo ma le faiva e tusa ai ma le afioga a le Atua.” 5 Ua fiafia foʻi tagata uma i le upu ua fai mai, ona latou filifilia lea o Setefano, o le tagata ua tumu i le faatuatua ma le agaga paia, o Filipo ma Pokoro, o Nikanora ma Timona, o Pamena ma Nikolao, o se tagata liulotu mai i Anetioka, 6 ua aumaia i latou i luma o le ʻauaposetolo, ma ina ua uma le tatalo, ona faaee atu lea o o latou lima iā i latou. 7 Ua tupu pea le afioga a le Atua, ma ua matuā faatoʻateleina soo i Ierusalema; e toʻatele foʻi faitaulaga ua usiusitaʻi i le faatuatua. 8 Ua faia e Setefano, o lē ua tumu i le agalelei ma le mana, mea ofoofogia ma faailoga i tagata. 9 A ua tutū mai nisi tagata mai i le sunako, lea ua taʻua o le Sunako o le ʻAusaʻoloto, ma nisi o le ʻau Kurene ma le ʻau Alesania, ma i latou mai i Kilikia ma Asia, e finau mai iā Setefano, 10 ma ua lē mafai ona tetee atu i latou i le atamai ma le agaga ua ia tautala atu ai. 11 Ona latou faatauanau faalilolilo lea i tagata ia fai atu e faapea: “Na matou faalogo ua fai upuleaga o ia iā Mose ma le Atua.” 12 Ua latou faavevesi tagata ma toeaina, ma le ʻautusiupu, ma ua ō mai faafuaseʻi i latou iā te ia, ua puʻe ma ave faamalosi o ia i le Faamasinoga Sili. 13 Ua latou aumai foʻi ni molimau pepelo, o ē ua faapea atu: “E lē o taofia lava le tautala o lenei tagata faasaga i lenei nofoaga paia ma le Tulafono. 14 Auā na matou faalogo ua fai mai o ia, o le a lafotuina e Iesu le Nasareta lenei mea paia, ma suia tū na tuu mai e Mose iā i tatou.” 15 Ua pulatoʻa atu iā te ia i latou uma o loo nonofo i le Faamasinoga Sili, ma ua latou iloa ai ua pei ona fofoga o fofoga o se agelu.