Lomiga mo le Polokalame mo le Sauniga o le Faiva ma le Olaga Faa-Kerisiano
NOVEMA 2-8
ʻOA TAUTELE MAI I LE AFIOGA A LE ATUA | ESOTO 39-40
“Na Mulimulituʻi Mose i Faatonuga”
(Esoto 39:32) Ona māeʻa lea o le galuega mo le faleʻie paia o le feiloaʻiga, auā ua faia e le fanauga a Isaraelu o mea uma e pei ona poloaʻi mai ai Ieova iā Mose. Ua faapea lava ona latou faia.
Po o Silafia Oe e Ieova?
13 I se tulaga tuufaafeagai, o Mose, “o le tagata e sili ona agamalu i tagata uma ua i luga o le fogāeleele.” (Nu. 12:3) Sa faaalia lona agamalu ma le lotomaulalo, e ala i le maumauaʻi e mulimuli i le taʻitaʻiga a Ieova. (Eso. 7:6; 40:16) E leai se faamaumauga e faailoa mai ai na masani ona fesiligia e Mose le auala a Ieova e faia ai mea, pe ita foʻi i le mulimuli atu i taʻiala sa faataatitia e Ieova. O se faataʻitaʻiga, na tuu mai e Ieova faatonuga e tusa ai o le fausiaina o le fale-ʻie paia, e oo lava i nai mea iti e pei o le lanu o le filo ma le aofaʻi o faamaulave, e tatau ona faaaogā e fai ai ʻie o le faleʻie paia. (Eso. 26:1-6) Afai e avatu iā te oe e se ovasia i le faala-potopotoga a Ieova, ni faatonuga e foliga mai ua soona auʻiliʻili mai, atonu e iʻu ina e fiu ai i nisi taimi. Peitaʻi, o Ieova o se ovasia e lelei atoatoa, o sē e tuuina mai galuega i ana auauna, ma e na te maufaatuatuaina i latou. Pe a ia aumaia ni faamatalaga auʻiliʻili, e na te faia faapea mo lo tatou lelei. Ae ia mātau, e leʻi ita Mose iā Ieova ina ua ia tuuina mai le tele o faamatalaga, ma manatu e faapea ua manatu faatauvaa Ieova iā te ia, pe taumafai e taofiofia lona sogasogā e faia ai ni mea fou, po o lona saʻolotoga foʻi. Nai lo lea, sa faamautinoa e Mose, “ua faapea lava ona . . . faia” e le ʻaufaigaluega, e ala i le mulimuli i faatonuga a le Atua. (Eso. 39:32) Maʻeu se ala lotomaulalo! Sa iloa e Mose o Ieova e ona le galuega, ma ua na o ia o se meafaigaluega ua faaaogā e faataunuuina le galuega.
(Esoto 39:43) Ua vaai Mose i le galuega uma ua faia, faauta! ua latou faia lava e pei ona poloaʻi mai ai Ieova. O le auala lenā na latou faia ai. Ona faamanuia lea o Mose iā i latou.
(Esoto 40:1, 2) Ona fetalai mai lea o Ieova iā Mose e faapea: 2 “O le masina muamua, i le aso muamua o lea masina, e te faatū ai le faleʻie paia o le feiloaʻiga.
(Esoto 40:16) Ona faia lea e Mose e tusa ma mea uma lava na poloaʻi mai ai Ieova iā te ia. Ua faapea lava ona ia faia.
Po o E Faamaoni i Mea Uma?
3 Ua taʻua i le Eperu 3:5: “Na faamaoni lava Mose.” Aiseā na faamaoni ai Mose? I le fausia ma le faatūina o le fale fetafaʻi, na faia e Mose le galuega “e tusa ma mea uma lava na poloaʻi mai ai Ieova iā te ia, ua faapea lava ona faia e ia.” (Esoto 40:16) O le avea ma tagata tapuaʻi o Ieova, tatou te faamaoni e ala i le usiusitai iā te Ia. E aofia ai le faamaoni iā Ieova a o feagai ma tulaga faigatā po o tofotofoga ogaoga. Ae peitaʻi, o le taulau manuia i le feagai ai ma tofotofoga tetele e lē na o le pau lea o le auala e iloa ai lo tatou faamaoni. Na fetalai Iesu: “O lē faamaoni i le mea itiiti, e faamaoni foʻi o ia i mea e tele; o lē amiolētonu i le mea itiiti, e amiolētonu foʻi o ia i mea e tele.” (Luka 16:10) E ao ona tatou faamaoni e oo lava i mea e foliga mai e itiiti.
Saʻiliʻiliga Loloto mo ʻOa Faaleagaga
(Esoto 39:34) o ufiufi ua faia i paʻu mamoe poʻa ua vali mūmū atoa ma ufiufi o paʻu takesa, ma le ʻie puipui e vaelua ai,
it-2 884 ¶3
Paʻu takesa
Na Faapefea Ona Maua e Tagata Isaraelu? Afai o le upu taʹchash lea o loo faaaogā i le Tusi Paia e faasino atu i se ituaiga o takesa (seal), e ono fesiligia ai la pe na faapefea ona maua e tagata Isaraelu paʻu takesa. E masani ona ola le meaola o le takesa i vaipanoa o le Atika ma le Anetatika, ae e iai nisi takesa e ola i le tau māfanafana. I aso nei, o loo iai pea ni nai takesa e taʻua o le monk seal i vaega o le Sami Metitirani ma isi ogāsami māfanafana. A o faagasolo senituri, ua matuā faaitiitia takesa ona o mea e fai e tagata, ae sa matuā tele i le Sami Metitirani ma le Sami Ulaula i taimi o le Tusi Paia. I le pe ā o le 1832, na taʻua ai i le lomiga faa-Peretania a Calmet o le Dictionary of the Holy Bible (itu. 139) e faapea: “E maua takesa i le tele o motu o le Sami Ulaula, e lata i le penisula o Sinai.”—Tagaʻi foʻi i le The Tabernacle’s Typical Teaching, a A. J. Pollock, Lonetona, itu. 47.
(Esoto 40:34) Ua ufitia le faleʻie o le feiloaʻiga i le ao ma ua tumu le faleʻie paia i le pupula o Ieova.
Pe e Tāua pe a Iloa e Isi Au Galuega?
I le taimi na māeʻa ai ona fausia le faleʻie paia, sa “ufitia le faleʻie o le feiloaʻiga i le ao ma ua tumu le faleʻie paia i le pupula o Ieova.” (Eso. 40:34) Maʻeu se faailoaga o le finagalo malie o Ieova! O le ā sou manatu, o ā ni faalogona o Pesaleli ma Oliavu i lenā taimi? E ui e leʻi tusia o laʻua igoa i luga o a laʻua galuega, ae sa faamalieina i laʻua i le iloaina o loo faamanuia Ieova i a laʻua taumafaiga. (Faata. 10:22) I tausaga mulimuli ane, e mautinoa lo laʻua fiafia i le vaai atu o loo faaaogā pea a laʻua galuega i le auaunaga iā Ieova. Pe a toe faatutūina mai i laʻua i le lalolagi fou, e mautinoa o le a faafiafiaina i laʻua i le iloaina sa faaaogā le faleʻie paia i le tapuaʻiga moni mo le pe ā ma le 500 tausaga.
Faitau Tusi Paia
(Esoto 39:1-21) Ua latou faia ofu ua lelei ona lalagaina mo le auaunaga i le mea paia i filo lanu moana, i fulufulu mamoe ua vali lanu violē, ma mea ua vali mūmū sesega. Ua latou faia ofu paia mo Arona e pei ona poloaʻi mai ai Ieova iā Mose. 2 Ua ia faia le efota i auro, i filo lanu moana, i fulufulu mamoe ua vali lanu violē, i mea ua vali mūmū sesega ma ʻie lino ua lelei ona milo ona filo. 3 Ua latou sasa faamafolafola auro ia faamanifinifi, ona ia tipi lea o auro e pei o ni filo ina ia suʻi faatasi ma filo lanu moana, o fulufulu mamoe ua vali lanu violē, o mea ua vali mūmū sesega ma ʻie lino lelei, o galuega a se tagata e suʻi teuteu. 4 Ua latou faia fasi ʻie o le tauʻau ia e pipii i le efota. Ua faapipii i ona pito e lua i luga. 5 Ua iai le fusi i luga o le efota ina ia mau ai le efota, ua faia lava i le auala e tasi i mea lava e tasi, o le auro, o le filo lanu moana, o le filo fulufulu mamoe ua vali violē, o mea ua vali mūmū sesega ma le ʻie lino ua lelei ona milo ona filo, e pei ona poloaʻi mai ai Ieova iā Mose. 6 Ona latou faia lea o maa soama ua tuu i teuteu auro, ua vane ai igoa o atalii o Isaraelu e pei o le vaneina o se faamaufaailoga. 7 Ua ia tuu ia maa i luga o fasi ʻie o le tauʻau o le efota e fai ma maa e manatuaina ai le fanauga a Isaraelu, e pei ona poloaʻi mai ai Ieova iā Mose. 8 Ona ia faia lea o le ufifatafata i le galuega a le tagata suʻi teuteu, e pei foʻi o le faiga o le efota, i le auro, i le filo lanu moana, i filo fulufulu mamoe ua vali violē, i mea ua vali mūmū sesega ma le ʻie lino ua lelei ona milo ona filo. 9 E faatafafā le ufifatafata pe a faasautualua. Ua latou faia le ufifatafata ma pe a faasautualua, e aga lona umi, e aga foʻi lona lautele. 10 Ona latou faatumuina lea o laina e fā i maa. O le laina muamua ua iai maa o le salikea, o le topasi, ma le samaraki. 11 O le laina lona lua ua iai maa o le nofeka, o le safaira, ma le ialoma. 12 O le laina lona tolu ua iai maa o le lesema, o le sevo ma le aselama. 13 O le laina lona fā ua iai maa o le tasesa, o le soama, ma le iasepi. Ua faamau i totonu o teuteu auro i le mea e tuu ai maa. 14 E tutusa maa ma igoa o atalii o Isaraelu. E sefulu lua e tusa ma o latou igoa, ua vane e pei o le vaneina o se faamaufaailoga, e taʻitasi le maa ma lona igoa e tusa ma ituaiga e sefulu lua. 15 Ona latou faia lea i luga o le ufifatafata o filifili ua fili e pei o se maea i le auro māoʻi. 16 Ua latou faia o teuteu auro e lua ma mama auro e lua ona tuu lea o mama e lua i pito e lua o le ufifatafata. 17 Ua latou faamau o maea auro e lua i mama e lua i pito o le ufifatafata. 18 Ua latou faamau pito e lua o maea e lua i teuteu auro e lua. Ona latou faamau lea i fasi ʻie o le tauʻau o le efota, i ona luma. 19 Ona latou faia lea o mama auro e lua ma tuu i pito e lua o le ufifatafata, i le pito i lalo lea e faasaga i le efota. 20 Ua latou faia mama auro e lua ma tuu i le pito i lalo o fasi ʻie o le tauʻau o le efota, i ona luma e lata i le mea e sosoo ai, i luga o le fusi o le efota. 21 Mulimuli ane, ua latou nonoa manoa lanu moana i mama o le ufifatafata i mama o le efota, ina ia mau lelei ai i luga o le fusi o le efota, ma lē see ese ai le ufifatafata mai i lona tulaga i luga o le efota, e pei ona poloaʻi mai ai Ieova iā Mose.
NOVEMA 9-15
ʻOA TAUTELE MAI I LE AFIOGA A LE ATUA | LEVITIKO 1-3
“Le Māfuaaga na Faia ai Taulaga”
(Levitiko 1:3) “ʻAfai o lana taulaga o se taulaga mū, e ao ona aumai mai i le lafu se manu poʻa e lelei. E na te aumaia ma lona lotomalie i luma o Ieova o lana taulaga, i le faitotoʻa o le faleʻie o le feiloaʻiga.
(Levitiko 2:1) “ʻPe afai e aumai e se tasi se taulaga i meaʻai e ofo atu iā Ieova, e ao ona faia lana taulaga i le falaoamata lelei; e tatau foʻi ona ia liligiina i ai le suāuu ma tuu i ai le lipano.
(Levitiko 2:12) “ʻIa outou aumaia na taulaga iā Ieova o se taulaga o uluaʻi fua, e lē tatau ona faamū ia mea i le fata faitaulaga e fai ma mea manogi e faamalieina ai.
it-2 525
Taulaga
Taulaga mū. Na ofoina atu atoatoa taulaga mū i le Atua; e leai se vaega o le manu na faatotoe mo lē na ofoina atu le taulaga. (Faatusatusa i le Fam 11:30, 31, 39, 40.) Na avea nei taulaga o se talosaga iā Ieova ina ia talia, po o se faailoaga foʻi o le taliaina e Ieova, o le taulaga mo agasala lea e masani ona ofo faatasi atu ma taulaga mū. Na ofoina atu atoatoa foʻi e Iesu o ia lava, o se “taulaga mū.”
it-2 528 ¶4
Taulaga
Taulaga i meaʻai. Na fai faatasi taulaga i meaʻai ma taulaga faifaatasi, taulaga mū, ma taulaga o agasala; ae o nisi taimi, na ofoina atu ai na o taulaga i meaʻai. Na avea foʻi taulaga i meaʻai o ni uluaʻi fua. (Eso 29:40-42; Le 23:10-13, 15-18; Nu 15:8, 9, 22-24; 28:9, 10, 20, 26-28; mata. 29) O taulaga i meaʻai, na faailoa atu ai le talisapaia o le aaofoaʻi o le Atua i le aumaia o faamanuiaga ma le tamaoaiga. Na masani ona avatu faatasi ma le suāuu ma le lipano. Na mafai ona ofoina atu taulaga i meaʻai e faaaogā ai le falaoamata lelei, fatu ua tao, o falaoa lapotopoto po o falaoa manifinifi na tao, pe faia i luga o se uʻamea mafolafola po o se ulo ua iai le gaʻo. Na tuu se vaega o le taulaga i meaʻai i luga o le fata faitaulaga e fai ai taulaga mū, a o le isi vaega na aai ai ositaulaga, ma na mafai foʻi ona ʻai ai lē e ana le taulaga pe afai o se taulaga faifaatasi. (Le 6:14-23; 7:11-13; Nu 18:8-11) O so o se taulaga i meaʻai sa i luga o le fata faitaulaga, sa lē tatau ona tuu i ai se mea faafefete po o se “meli” (atonu e faasino atu i sua suamalie o mati po o fualaau ʻaina) lea e ono mafai ona faafefeteina.—Le 2:1-16.
(Levitiko 3:1) “ʻAfai o lana taulaga o le taulaga faifaatasi, afai e aumaia e ia lana taulaga mai i le lafu povi o se manu poʻa po o se manu fafine, e tatau ona ia avatua i luma o Ieova o se manu e matuā lelei lava.
Ia Aʻoaʻo Mai i ʻle Faavae o le Upu Moni’
11 O nisi taulaga sa taʻua i le Tulafono a Mose o ni taulaga faifaatasi. O nei taulaga sa faaalia ai le mauaina o le filemu ma Ieova. E ʻai e le tagata na faia lenā taulaga ma lona aiga le aano o le manu na fai ai le taulaga, pe atonu i se potu ʻai o le malumalu. Na maua e le ositaulaga na osia le taulaga se tufaaga o le aano o le manu, e pei foʻi o isi ositaulaga na auauna i le malumalu. (Levi. 3:1; 7:31-33) Na saʻo le māfuaaga na faia ai e le tagata tapuaʻi lana taulaga, ina ia maua se faiā lelei ma le Atua. Sa peiseaʻī na faiʻaiga faatasi le tagata tapuaʻi, lona aiga, ositaulaga ma Ieova i le fiafia ma le filemu.
Saʻiliʻiliga Loloto mo ʻOa Faaleagaga
(Levitiko 2:13) “ʻE ao ona e faamasima au taulaga uma ua faia i meaʻai; ia lē aunoa ona iai le masima, e faamanatu ai iā te oe le feagaiga a lou Atua i au taulaga i meaʻai. E te avatu au taulaga uma faatasi ma le masima.
(Esekielu 43:24) Ia e avatu ia manu i luma o Ieova ma e lūlūina i ai e ositaulaga le masima, ma ofo atu ia manu o le taulaga mū iā Ieova.
Manatu Tāua Mai le Tusi o Levitiko
2:13—Aiseā e faamasima ai “taulaga uma”? E leʻi faia lenei mea ina ia faalelei ai le tofo o taulaga. I le lalolagi atoa, ua faaaogā ai le masima e faasaoina ai meaʻai. E faapena foʻi ona avatu ai le masima faatasi ma le taulaga e atagia ai e lē o faaleagaina ma e lē o mafu.
(Levitiko 3:17) “ʻUa faia pea lenei mea ma tulafono mo outou ma o outou tupulaga o loo mulimuli mai, i mea uma tou te nonofo ai: Aua neʻi outou aai i le gaʻo po o le toto.’”
Manatu Tāua Mai le Tusi o Levitiko
3:17. Talu ai ua manatu i le gaʻo o se vaega aupito sili lea ona lelei pe e lololo, o le faasāina la ona ʻaina, e mautinoa lava na faamamafa atu ai i tagata Isaraelu e faapea, o le vaega aupito sili ona lelei, e avatu lea iā Ieova. (Kenese 45:18) Ua faamanatu mai e lenei mea iā i tatou, e tatau ona tatou avatu mea e aupito sili ona lelei iā Ieova.—Faataoto 3:9, 10; Kolose 3:23, 24.
Faitau Tusi Paia
(Levitiko 1:1-17) Ua valaau foʻi Ieova iā Mose ua fetalai mai iā te ia mai i le faleʻie o le feiloaʻiga e faapea: 2 “Ia fai atu i le fanauga a Isaraelu, ia e faapea atu iā i latou, ʻAi se tasi o outou e aumaia sana taulaga mo Ieova mai i manu lalata, e ao ona aumaia a outou taulaga mai i le lafumanu ma le lafu mamoe. 3 “ʻAfai o lana taulaga o se taulaga mū, e ao ona aumai mai i le lafu se manu poʻa e lelei. E na te aumaia ma lona lotomalie i luma o Ieova o lana taulaga, i le faitotoʻa o le faleʻie o le feiloaʻiga. 4 E tatau ona ia faaee lona lima i luga o le ulu o le manu e fai ai le taulaga mū, ma e taliaina mo ia ina ia faamagalo ai ana agasala. 5 “ʻOna fasi ai lea o le tamaʻi povi poʻa i luma o Ieova; ma avatu e ositaulaga, o atalii ia o Arona le toto, ma sausau ia soo ai le fata faitaulaga lea e i luma o le faitotoʻa o le faleʻie o le feiloaʻiga. 6 E tatau ona saeese le paʻu o le manu o le taulaga mū ma vaevae i vaega. 7 O ositaulaga, o atalii ia o Arona, e latou te aumaia le afi i luga o le fata faitaulaga ma faatulaga fafie e faamumū ai le afi. 8 E tatau foʻi i ositaulaga, o atalii ia o Arona, ona faatulaga vaega, e aofia ai le ulu ma le gaʻo i luga o fafie ua mumū ia ua i luga o le fata faitaulaga. 9 Ae ia fufulu ona gaʻau ma ona vae i le vai; ma e tatau i le ositaulaga ona faamū ia mea uma i luga o le fata faitaulaga o le taulaga mū, o le taulaga e fai i le afi o se mea manogi e faamalieina ai Ieova. 10 “ʻAe afai foʻi o lana taulaga mo le taulaga mū e mai i le lafu, o le a ia avatu se tamaʻi mamoe poʻa po o se ʻoti poʻa, e matuā lelei lava. 11 E tatau ona fasi le manu i luma o Ieova, i le pito o le fata faitaulaga lea o loo i le itu i mātū, ona sausau lea e ositaulaga, o atalii ia o Arona, le toto ina ia soo ai luga o le fata faitaulaga. 12 E tatau ona ia penaina le manu i vaega, o lona ulu ma le gaʻo, ma e ao foʻi i le ositaulaga ona faatulaga ia mea i luga o fafie ua mumū, ua i luga o le fata faitaulaga. 13 E na te fufuluina foʻi gaʻau ma vae i le vai; ma e ao i le ositaulaga ona avatu ia mea ma susunu i luga o le fata faitaulaga. O le taulaga mū, o le taulaga e fai i le afi o se mea manogi e faamalieina ai Ieova. 14 “ʻAe afai o lana taulaga o se taulaga mū iā Ieova e mai i manulele, e tatau ona ia avatu lana taulaga mai i manutagi po o tamaʻi lupe. 15 E tatau i le ositaulaga ona avatu le manulele i le fata faitaulaga ma sesele lona ua, ma susunu i luga o le fata faitaulaga, a o lona toto e ao ona faaalu ese i le itu o le fata faitaulaga. 16 E tatau ona ia aveesea lona tagāʻai ma ona fulufulu, ma lafo i autafa o le fata faitaulaga i le itu i sasaʻe, o le mea e tuu ai lefulefu ua gaʻoa. 17 E na te tipiina le manu i ona apaʻau. E na te lē vaeluaina ai. E ao i le ositaulaga ona susunu i luga o le fata faitaulaga i luga o fafie o loo mumū. O le taulaga mū, o le taulaga e fai i le afi o se mea manogi e faamalieina ai Ieova.
NOVEMA 16-22
ʻOA TAUTELE MAI I LE AFIOGA A LE ATUA | LEVITIKO 4-5
“Avatu iā Ieova le Mea Sili E te Mafaia”
(Levitiko 5:5, 6) “ʻA oo ina nofosala o ia i se tasi o nei mea, e ao ona ia taʻutino atu e tusa ma le mea ua ia agasala ai. 6 E na te aumaia lana taulaga o le nofosala iā Ieova mo lana agasala ua ia faia, o se manu fafine lea mai i le lafu, o se tamaʻi mamoe fafine, po o se tamaʻi ʻoti fafine mo le taulaga o le agasala; e ao i le ositaulaga ona faia le togisala mo ia ma lana agasala.
it-2 527 ¶9
Taulaga
Taulaga o le nofosala. Na ofoina atu foʻi taulaga o le nofosala mo agasala. I le Tulafono, e nofosala so o se tasi na faia se agasala. O taulaga o le nofosala na ofo atu mo ni agasala patino. Na iai sina eseesega mai i isi taulaga o agasala. E foliga mai o taulaga o le nofosala, e mo agasala na faia agaʻi i se isi, e pei o se agasala na faia faasaga iā Ieova po o se isi foʻi tagata. O le taulaga o le nofosala na faamalieina ai le finagalo o Ieova e tusa ai ma le mea e tonu, ma mafai ai e le tagata fai mea sesē ua salamō ona toe foʻi i lona olaga masani, ma ʻalofia ai le mafatia i āuga o lana agasala.—Faatusatusa i le Isa 53:10.
(Levitiko 5:7) “ʻAe afai e na te lē gafatia se mamoe, e ao ona ia aumaia iā Ieova o lana taulaga o le nofosala ona o lana agasala ua fai, o ni manutagi se lua po o ni tamaʻi lupe se lua, o le tasi mo le taulaga o agasala, ma le isi mo le taulaga mū.
E Magafagafa o Ia i Mea e Gata ai lo Tatou Mafai
Ua faaalia i le Tulafono le magafagafa o Ieova, ona ua taʻua ai e faapea: “A lē maua e ia se tamaʻi mamoe, ona au mai ai lea e ia iā Ieova ona o lona sesē ua ia agasala ai, o le uluga manutagi, po o tamaʻi lupe e lua fua.” (Fuaiupu e 7) O le fasi fuaiupu lea e faapea, “a lē maua e ia,” e ono faaupu foʻi faapenei, “pe a lē mafai ona ia gafatia.” Pe afai e lē gafatia e se tagata Isaraelu se mamoe ona o le mativa, sa fiafia le Atua e talia mea e mafai ona ia maua, e pei o manutagi e lua po o tamaʻi lupe e lua.
(Levitiko 5:11) “ʻAfai e na te lē gafatia ni manutagi se lua po o ni tamaʻi lupe se lua, ona ia aumaia lea o lana taulaga mo le agasala ua ia faia, o le tasi vaesefulu o le efa o le falaoamata lelei mo le taulaga o agasala. E lē tatau ona ia tuu i ai le suāuu ma e lē tatau foʻi ona ia tuu i ai le lipano, auā o le taulaga lea o agasala.
E Magafagafa o Ia i Mea e Gata ai lo Tatou Mafai
Ae ā pe afai e lē gafatia e se tagata se mea e oo lava i ni manulele se lua? Na taʻua i le Tulafono: “Ona au mai ai lea e lē ua agasala o lana taulaga, o lona vaega e sefulu o le efa [valu pe iva ipu] o falaoa lelei e fai ma taulaga mo le agasala.” (Fuaiupu e 11) Ae o se tagata e lē gafatia se mea, sa fetuutuunaʻi Ieova ma faataga o ia e ofo atu le taulaga o le agasala e aunoa ma le toto. I Isaraelu, e leʻi taofia e le mativa le mauaina o faamanuiaga o le togisala po o le avanoa e faia ai se leleiga ma le Atua.
Saʻiliʻiliga Loloto mo ʻOa Faaleagaga
(Levitiko 5:1) “ʻPe afai e faalogo se tasi i se faamalaia ua faia i luma o le lautele, ae na te lē faailoaina atu se agasala ua faia e se tasi e ui o ia o se molimau, pe na vaai i se mea, pe iloa foʻi se mea, e agasala o ia, ma e ao la ona ia tali atu ona o lona sesē.
O Lesona Mai i Auauna Faamaoni a Ieova
14 E mafai foʻi ona faamuamua lou faamaoni iā Ieova, ma faamaoni i isi e ala i le faaalia o le agalelei. O se faaaʻoaʻoga, ua e maua faamaoniga na faia e se uso se agasala matuiā. Atonu o le a e manaʻo e faamaoni iā te ia, pe afai o ia o sau uō po o sou tauaiga vavalalata. Peitaʻi, ua e iloaina e sili atu ona tāua lou faamaoni iā Ieova. O lea, ia faaaʻoaʻo iā Natano e ala i le faamaoni iā Ieova ae agalelei i lou uso. Ia faailoa atu iā te ia e manaʻomia ona ia vave talosaga i toeaina mo se fesoasoani. Ae pe a ia lē faia faapea, e tatau la ona e faailoaina atu i toeaina. O le faia faapea, e faailoa atu ai lou faamaoni iā Ieova. Ae i le taimi e tasi, ua e faaalia le agalelei i lou uso auā e mafai ona fesoasoani toeaina e toe faaleleia lana faiā ma Ieova. O le a latou faasaʻoina o ia i se auala agamalu ma toʻafilemu.—Faitau le Levitiko 5:1; Kalatia 6:1.
(Levitiko 5:15, 16) “Afai e lē faamaoni se tasi ma agasala ai e aunoa ma le mafaufauina e tusa ma mea paia a Ieova, e ao ona ia aumaia o lana taulaga o le nofosala iā Ieova, o se mamoe poʻa e matuā lelei lava mai i le lafu, e tusa ma le fua faatatau o le tau i sekeli siliva, e tusa ma le fua masani o le mea paia, e fai ma taulaga o le nofosala. 16 E na te taui atu i le agasala na ia faia e tusa ma le mea paia, e na te faaopoopo i ai le tasi vaelima i le tau o lea mea, e ao ona ia avatu ai i le ositaulaga, ina ia fai ai e le ositaulaga le togisala mo ia, faatasi ma le mamoe poʻa o le taulaga o le nofosala, ona faamagaloina ai lea o ia.
it-1 1130 ¶2
Paia
Manu ma Fua o Faaeleeleaga. Na avea povi poʻa ulumatua, o mamoe poʻa ulumatua ma ʻoti poʻa ulumatua, o ni mea e paia iā Ieova ma na lē tatau ona fesuiaʻia. Na tatau ona faia taulaga i nei manu ma na avatu se tufaaga i ositaulaga ua faapaiaina. (Nu 18:17-19) Na paia sefuluaʻi ma uluaʻi fua o faaeleeleaga, e pei o taulaga uma ma meaalofa uma na faapaiaina mo le auaunaga i le faleʻie paia. (Eso 28:38) Sa lē tatau ona manatu māmā i mea paia uma a Ieova, pe faaaogāina i se auala e lē faaaloalo. O se faataʻitaʻiga, o le tulafono e faatatau i le sefuluaʻi. Pe afai sa tuu ese e se tamāloa se vaega o fua o ana saito e fai ma sefuluaʻi, ae mulimuli ane ua ia faaaogāina pe faaaogā foʻi e se tasi o lona aiga e aunoa ma le iloa, e fai ai sa latou meaʻai, o lona uiga la ua solia e le tamāloa le tulafono a Ieova e tusa ai o mea paia. I le Tulafono, na tatau i lea tagata ona faia se taulaga o le nofosala, e ala i le totogiina atu o le tau atoa o le mea paia ma faaopoopo i ai ma le 20 pasene, faatasi ai ma se mamoe e matuā lelei mai i le lafu e fai ai se taulaga. O le faia faapea, na matuā faaaloalogia ai e tagata ia mea paia na tatau ona avatu iā Ieova.—Le 5:14-16.
Faitau Tusi Paia
(Levitiko 4:27–5:4) “ʻPe a agasala ma le lē iloa se tasi o tagata o le lautele, e ala i le solia o se tasi o mea na poloaʻi mai ai Ieova e aua le faia ma ua nofosala ai o ia, 28 po ua faailoa atu foʻi iā te ia lana agasala ua fai, ona ia aumaia lea o se tamaʻi ʻoti fafine e matuā lelei lava mo lana agasala ua fai. 29 E ao ona ia faaee foʻi lona lima i luga o le ulu o le manu lea e fai ai le taulaga o agasala, ma fasia le manu e fai ai le taulaga o agasala i le nofoaga lava e tasi e fai ai le taulaga mū. 30 E ave e le ositaulaga sina vaega o le toto i lona tamatamaʻilima, ma tuu i luga o seu o le fata faitaulaga lea e fai ai taulaga mū, a o le toto o loo totoe, e na te sasaa i lalo o le fata faitaulaga. 31 Ona ia aveese lea o le gaʻo uma e pei ona ia aveeseina o le gaʻo o le taulaga faifaatasi; e ao i le ositaulaga ona susunuina ai i luga o le fata faitaulaga e avea o se mea manogi e faamalieina ai Ieova; ma e faia e le ositaulaga le togisala mo ia, ona faamagaloina ai lea o ia. 32 “ʻAfai e na te aumaia mo lana taulaga se tamaʻi mamoe e fai ai le taulaga mo agasala, e ao ona ia aumaia se tamaʻi mamoe fafine e matuā lelei lava. 33 E tatau ona ia faaee foʻi lona lima i luga o le ulu o le manu e fai ai taulaga o agasala, ma fasia o se taulaga o agasala, i le mea e masani ona fasi ai manu e fai ai taulaga mū. 34 E ave e le ositaulaga sina vaega o le toto o le taulaga o agasala i lona tamatamaʻilima, ma tuu i luga o seu o le fata faitaulaga lea e fai ai taulaga mū, a o le toto o loo totoe e na te sasaa i lalo o le fata faitaulaga. 35 E na te aveesea ona gaʻo uma e pei o gaʻo ia e masani ona aveese mai i le tamaʻi mamoe poʻa o le taulaga faifaatasi, ma e ao i le ositaulaga ona susunuina ia mea i luga o le fata faitaulaga e pei o taulaga iā Ieova ua faia i le afi; ma e faia e le ositaulaga le togisala mo ia ma lana agasala ua fai, ona faamagaloina ai lea o ia.
5 “ʻPe afai e faalogo se tasi i se faamalaia ua faia i luma o le lautele, ae na te lē faailoaina atu se agasala ua faia e se tasi e ui o ia o se molimau, pe na vaai i se mea, pe iloa foʻi se mea, e agasala o ia, ma e ao la ona ia tali atu ona o lona sesē. 2 “ʻPe afai e paʻi se tasi i se mea e lē mamā, e tusa po o se tino mate o se manu e lē mamā o le vao, po o se tino mate o se manu lata e lē mamā, po o tino mamate o meaola ninii e lē mamā o loo feoaʻi faatasi, e ui ina ia faia ma le lē iloa, ae ua lē mamā ai o ia ma ua nofosala ai. 3 Pe afai e teʻi ua paʻi se tasi i se mea ua lē mamā ai se tagata, o so o se mea ua lē mamā ai lea tagata, o mea foʻi ia ua lē mamā ai o ia, e ui ua ia faia ma le lē iloa ae pe a ia iloa lea mea, ona nofosala ai lea o ia. 4 “ʻPe afai e tautō se tasi ma tautala ona laugutu e aunoa ma le mafaufau e fai le mea leaga, pe e fai le mea lelei, e tusa ma so o se mea e tautala ai se tasi e aunoa ma le mafaufau i le tautoga, e ui ua ia faia ma le lē iloa, ae pe a ia iloa lea mea, ona nofosala ai lea o ia e tusa ma se tasi o ia mea.
NOVEMA 23-29
ʻOA TAUTELE MAI I LE AFIOGA A LE ATUA | LEVITIKO 6-7
“Se Faailoaga o le Lotofaafetai”
(Levitiko 7:11, 12) “ʻO le tulafono lenei i le taulaga faifaatasi e aumaia e se tasi iā Ieova: 12 Afai e na te aumaia le taulaga e faaalia ai le faafetai, e ao la ona ia aumaia faatasi ma le taulaga o le faafetai, o falaoa lapotopoto lē faafefeteina ua iai sina suāuu, ma falaoa manifinifi lē faafefeteina ua nini i le suāuu, ma le falaoamata lelei ua liligi i ai le suāuu e fai ma falaoa lapotopoto.
O Lesona e Tatou te Aʻoaʻoina Mai i le Tusi o Levitiko
9 Lesona lona lua: E tatou te auauna iā Ieova ona o lo tatou lototalisapaia. Ina ia faamatilatila lenei uiga, seʻi o tatou iloiloina le taulaga faifaatasi, o se isi vala tāua o le tapuaʻiga moni i Isaraelu anamua. Ua tatou aʻoaʻoina mai i le tusi o Levitiko, e ofo atu e se tagata Isaraelu se taulaga faifaatasi, e faaalia atu ai lona lototalisapaia. (Levi. 7:11-13, 16-18) E na te faia lenei taulaga, ona o lona manaʻo e fai, ae e lē ona o se tiute e tatau ona fai. O lea, na faia e lenei tagata le taulaga tauofo ona o lona alofa mo Ieova lona Atua. O le aano o le manu na osi ai le taulaga, na aai ai le tagata na faia le taulaga, o lona aiga, ma ositaulaga. Ae e iai vaega o le manu e na o Ieova lava na ofo atu i ai. O ā na vaega?
(Levitiko 7:13-15) E na te aumaia foʻi o falaoa lapotopoto ua faafefeteina, e avatu faatasi ma lana taulaga atoa ma le taulaga faafetai o ana taulaga faifaatasi. 14 E ao ona ia aumaia mai i lana taulaga o mea taʻitasi e fai ma tufaaga paia iā Ieova; e fai ia mea mo le ositaulaga, o lē na te sausauina le toto o le taulaga faifaatasi. 15 E ʻai uma le aano o le manu o le taulaga faafetai o ana taulaga faifaatasi, i le aso lava e faia ai lana taulaga. Aua lava neʻi teua se mea seʻia oo i le taeao.
Taulaga na Finagalo Malie i ai le Atua
15 O le isi taulaga tauofo, o le taulaga faafetai, lea e faamatalaina i le Levitiko mataupu e 3. O le igoa o le taulaga e mafai foʻi ona faaliliuina i “le taulaga o le filemu.” I le gagana Eperu, o le upu “filemu” e tele atu nisi mea e faasino i ai na i lo le na ona saʻoloto mai taua po o faafitauli. “I le Tusi Paia, o loo faasino atu i le uiga lenei, ma o loo taʻua ai foʻi le tulaga po o le faiā filemu ma le Atua, le sologa lelei, le olioli, ma le fiafia,” o se faamatalaga lea a le tusi, Studies in the Mosaic Institutions. O lea, na ofoina ai taulaga o faafetai, e lē ina ia maua ai se filemu ma le Atua, e peiseai ina ia faamālū ai lona finagalo, ae ina ia faaali atu ai le agaga faafetai pe ina ia faamanatu le tulaga faamanuiaina o le filemu ma le Atua lea na mauaina e i latou o ē sa ia finagalo malie i ai. Pe a uma ona ofoina atu ia Ieova le toto ma le gaʻo o le taulaga, ona ʻaina lea e ositaulaga ma lē ana le taulaga le aano o le manu na osi ai le taulaga. (Levitiko 3:17; 7:16-21; 19:5-8) I se uiga matagofie ma faafaatusa, sa peiseai ai o loo talisua faatasi lē ana le taulaga, o ositaulaga, ma Ieova le Atua i se taumafataga, e faailoga ai le faiā filemu lea sa iai i lo latou va.
(Levitiko 7:20) “ʻO le tagata e ʻaina le aano o le taulaga faifaatasi lea e avatu iā Ieova a o lē mamā o ia, o le a fasiotia lava o ia.
Taulaga o Viiga e Finagalo Malie i ai Ieova
8 Ae faapefea le tagata lea e ofoina atu le taulaga? Na taʻua i le Tulafono faapea so o se tasi e oo atu i luma o Ieova sa tatau ona mamā o ia ma lē mataʻuleagaina. O se tasi na mataʻuleagaina i le po o le ā lava se māfuaaga, sa tatau ona ia ofoina atu muamua se taulaga mo agasala pe mo mea sesē ina ia toe faafoʻisia ai lona tulaga mamā i luma o Ieova ina ia mafai ai ona taliaina mai e Ia lana taulaga mu po o lana taulaga faafetai. (Levitiko 5:1-6, 15, 17) Pe tatou te talisapaia ai ea la le tāua o le tausisia pea o se tulaga mamā i luma o Ieova? Pe afai tatou te mananaʻo e talia e le Atua la tatou tapuaʻiga, e ao ona tatou faataalise e faasaʻoina so o se mea e solia ai tulafono a le Atua. E tatau ona tatou vave faaavanoa atu i tatou lava mo auala ia e faaoo mai ai e le Atua lana fesoasoani—o “toeaina o le ekalesia” ma le ʻtogiola mo a tatou agasala,’ o Iesu Keriso.—Iakopo 5:14; 1 Ioane 2:1, 2.
Saʻiliʻiliga Loloto mo ʻOa Faaleagaga
(Levitiko 6:13) E mumū pea le afi i luga o le fata faitaulaga. E lē tatau ona pē.
it-1 833 ¶1
Afi
Faaaogāina i le faleʻie paia ma le malumalu. Na faaaogāina le afi i le tapuaʻiga na faia i le fale-ʻie paia ma mulimuli ane i le malumalu. I taeao uma, ma i le va o afiafi e lua, e faamūina ai e le ositaulaga sili mea manogi i luga o le fata faitaulaga e faamū ai mea manogi. (Eso 30:7, 8) Na faatonuina i le tulafono a le Atua ina ia mumū pea le afi i luga o le fata faitaulaga e ofo ai taulaga mū. (Le 6:12, 13) E ui e talitonu le toʻatele i le manatu taatele o tagata Iutaia e faapea na faamumū faavavega e le Atua le afi i luga o le fata faitaulaga, ae e lē lagolagoina e le Tusi Paia lenā manatu. E tusa ai ma faatonuga na tuuina atu e Ieova iā Mose, na tatau i atalii o Arona ona “aumaia le afi i luga o le fata faitaulaga ma faatulaga fafie e faamumū ai le afi,” a o leʻi tuu atu le taulaga i luga o le fata faitaulaga. (Le 1:7, 8) I le taimi foʻi na faavaeina ai le faiva faaositaulaga a Arona ma ona atalii, na faatoʻā sau le afi mai iā Ieova, atonu e ala mai i le ao na i luga o le faleʻie paia, ma susunu ai le taulaga i luga o le fata faitaulaga, ina ua uma ona faavaeina le faiva faaositaulaga ma ua uma foʻi ona ofoina atu taulaga mo le faavaeina o le faiva faaositaulaga. O lea, o le afi na sau faavavega, e leʻi faamumūina ai fafie na i luga o le fata faitaulaga, ae na “susunu ai le taulaga mu ma gaʻo i luga o le fata faitaulaga.” O le afi la lea na faaauau ona mumū i luga o le fata faitaulaga, e foliga mai na maua mai i le afi mai iā Ieova ma le afi lea ua leva ona faamumū i luga o le fata faitaulaga. (Le 8:14–9:24) Na alu ifo foʻi se afi faavavega mai iā Ieova ma susunuina ai taulaga ina ua uma le tatalo a Solomona i le tuuina atu o le malumalu.—2No 7:1; tagaʻi foʻi i le Fam 6:21; 1Tu 18:21-39; 1No 21:26 mo isi faaaʻoaʻoga o le faaaogāina e Ieova o afi faavavega pe a ia taliaina taulaga a ana auauna.
(Levitiko 6:25) “Ia e fai atu iā Arona ma ona atalii e faapea, ʻO le tulafono lenei o taulaga o agasala: E ao ona fasia le manu mo le taulaga mo agasala i luma o Ieova i le nofoaga lava e tasi e fasia ai le manu mo taulaga mū. O se mea lea e sili ona paia.
si-E 27 ¶15
Tusi o le Tusi Paia Numera 3—Levitiko
15 (3) Na manaʻomia se taulaga o agasala mo agasala na faia ae e leʻi fuafuaina. Na fua le ituaiga manu e ofo atu i ē na faia le agasala—po o se ositaulaga, o le nuu atoa, o se taʻitaʻi, po o se tagata lautele. E ese mai i taulaga mū na ofoina atu faatauofo ma taulaga faifaatasi a tagata taʻitoʻatasi, o le taulaga o agasala, o se taulaga na tatau lava ona fai.—4:1-35; 6:24-30.
Faitau Tusi Paia
(Levitiko 6:1-18) Ua toe fetalai mai Ieova iā Mose e faapea: 2 “E agasala se tasi pe a lē faamaoni iā Ieova ma ʻolegia lana uō i se mea ua tuuina atu iā te ia e tausia, po o se feagaiga tau tupe, po o le talepe fale po ua ave faagaoi se mea mai i lana uō, 3 po ua ia maua se mea na leiloa ae faafiti ai, ma ia tautō pepelo e tusa ma so o se agasala e mafai ona faia e le tagata; 4 ona nofosala ai lea o ia auā ua agasala, e ao ona ia toe faafoʻi atu le mea na ia gaoia, po o le mea na maua i faiga taufaamataʻu, lea na ia maua ina ua ave faagaoi, o le mea na tuuina atu na te tausia lea na ia tausia, po o le mea na leiloa lea na ia mauaina, 5 po o so o se mea lava ua ia tautō pepelo ai, e tatau ona ia taui atu le tau atoa mo lea mea, ma e ao ona ia faaopoopo i ai le tasi vaelima i le tau o lea mea. E na te avatu i lē e ona lea mea i le aso e faamaonia ai lona nofosala. 6 E na te aumaia iā Ieova le taulaga o lona nofosala, o se mamoe poʻa e matuā lelei lava mai i le lafu, e tusa ma le fua faatatau o le tau, i le ositaulaga ina ia faia ai le taulaga o le nofosala. 7 E faia e le ositaulaga le togisala mo ia i luma o Ieova, ma o le a faamagaloina o ia e tusa ai ma so o se mea e ono faia e ia ua nofosala ai.” 8 Ua fetalai mai pea Ieova iā Mose e faapea: 9 “Ia e poloaʻi atu iā Arona ma ona atalii e faapea, ʻO le tulafono lenei o le taulaga mū: O le a iai le taulaga mū i le taʻinafi i luga o le fata faitaulaga i le pō atoa seʻia oo i le taeao, ma e mū ai pea le afi i le fata faitaulaga. 10 E ao i le ositaulaga ona ofu i ofu o le ositaulaga o le ʻie lino lea, e na te ofuina lona ofuvae lino e ufiufi ai lona tino. E na te aveesea foʻi lefulefu gaʻoa o le taulaga mū lea e masani ona susunu i le afi i luga o le fata faitaulaga, ma e na te tuuina foʻi ia mea i autafa o le fata faitaulaga. 11 E ao ona ia aveesea ona ofu ae toe ofu isi ofu, e na te avea lefulefu gaʻoa i se nofoaga mamā i tua o le togālauapi. 12 E mumū pea le afi i luga o le fata faitaulaga. E lē tatau ona pē. E ao i le ositaulaga ona faamumū ai fafie i lea taeao ma lea taeao, ma faatulaga ai le taulaga mū, e ao foʻi ona ia susunuina ai mea gaʻoa o le taulaga faifaatasi. 13 E mumū pea le afi i luga o le fata faitaulaga. E lē tatau ona pē. 14 “ʻO le tulafono lenei o taulaga i meaʻai: O outou o atalii o Arona, ia aumaia le taulaga i luma o Ieova i luma o le fata faitaulaga. 15 E luluu mai e se tasi o i latou se luuga o falaoamata lelei o le taulaga i meaʻai, ma se vaega o le suāuu ma le lipano uma lea o loo i le taulaga i meaʻai, ma e ao ona ia faamūina i luga o le fata faitaulaga o se mea manogi e faamalieina ai, ma o le faamanatuga lea mea iā Ieova. 16 A o mea o loo totoe e ʻai e Arona ma ona atalii. O le a ʻaina o ni falaoa e lē faafefeteina i le nofoaga paia. E latou te ʻaina i le lotoā o le faleʻie o le feiloaʻiga. 17 E lē tatau ona tao a o iai se mea fefete. Ua ou avatu ia mea e fai ma a latou mea mai i aʻu taulaga ua faia i le afi. O se mea e sili ona paia, e pei o le taulaga o agasala e pei foʻi o le taulaga o le nofosala. 18 E aai ai tane uma mai i atalii o Arona. O le fuafuaga lea i taimi uma iā te outou ma o outou tupulaga o loo mulimuli mai, i taulaga a Ieova ua faia i le afi. O so o se mea e paʻi ane i ia taulaga, e paia lava.’”
NOVEMA 30–TESEMA 6
ʻOA TAUTELE MAI I LE AFIOGA A LE ATUA | LEVITIKO 8-9
“Faamaoniga o le Faamanuia a Ieova”
(Levitiko 8:6-9) Ona aumaia lea e Mose o Arona ma ona atalii, ua ia faatonuina i latou e tāʻeele i le vai. 7 Ona ia faaofu lea o ia i le ofu talaloa ma fusi o ia i le fusi ʻie, ma faaofu o ia i le ofu talaloa lima pupuu, ma ua ia faaofu o ia i le efota ma fusimau iā te ia i le fusi o le efota. 8 Ona ia avane ai lea o le ufifatafata, ma tuu i le ufifatafata o le Urima ma le Tumema. 9 Ona ia nonoa lea i luga o lona ulu o le pulou ʻie, ma tuu le pale auro iila o le faailoga paia lea o le tuuina atu, i luga o le pulou ʻie, e pei ona fetalai mai ai Ieova iā Mose.
(Levitiko 8:12) Ona ia liligi lea o se vaega o le suāuu e faauu ai, i luga o le ulu o Arona, ma faauu ai o ia ina ia faapaiaina ai o ia.
it-1 1207
Faavaeina o le Faiva Faaositaulaga
Na faamamā e Mose Arona ma ona atalii o Natapu, Aviu, Eleasaro ma Itamaro (pe na ia faatonuina i latou e tāʻeele) i le faatanoa apamemea sa i le lotoā, ma ia faaofu Arona i ofu matagofie mo le ositaulaga sili. (Nu 3:2, 3) O le faia faapea, ua tuuina atu ai iā Arona ofu na faaata mai ai vala ma matafaioi o lona tulaga o se ositaulaga sili. Ona faauu lea e Mose o le faleʻie paia, o mea uma na faaaogā ai, o le fata faitaulaga e ofo ai taulaga mu, ma le faatanoa ma mea na faaaogā ai. O le faia faapea, na faapaiaina ai na mea ma tuuesea ai e faaaogā mo na o le auaunaga i le Atua. Mulimuli ane, ona faauuina lea e Mose o Arona e ala i lona liligiina o le suāuu i lona ulu.—Le 8:6-12; Eso 30:22-33; Sl 133:2.
(Levitiko 9:1-5) Ua oo i le aso lona valu, ona aami lea e Mose o Arona ma ona atalii, atoa ma toeaina o Isaraelu. 2 Ua ia faapea atu iā Arona: “Ia e ave se tamaʻi povi mo le taulaga o agasala mo oe, ma se mamoe poʻa mo le taulaga mū, o manu ia e matuā lelei lava, ia aumaia ai i luma o Ieova. 3 Ae ia e fai atu i atalii o Isaraelu e faapea, ʻIa ave se ʻoti poʻa mo le taulaga o agasala, atoa ma se tamaʻi povi ma se tamaʻi mamoe poʻa, e tasi le tausaga le matutua, e matuā lelei lava, e fai ai le taulaga mū, 4 o se povi poʻa ma se mamoe poʻa mo taulaga faifaatasi, ina ia fai ai taulaga i luma o Ieova, o le taulaga i meaʻai ua iai sina suāuu, auā o le asō e faaali mai ai Ieova iā te outou.’” 5 Ona latou aumaia lea o ia mea e pei ona poloaʻi atu ai Mose i luma o le faleʻie o le feiloaʻiga. Ona faalatalata ane lea o le faapotopotoga atoa ma tutū i luma o Ieova.
it-1 1208 ¶8
Faavaeina o le Faiva Faaositaulaga
I le aso lona valu, na faia ai e ositaulaga ua uma ona faaagavaaina ma tofiaina i o latou tofiga, o latou faiva faaositaulaga mo le taimi muamua, (e aunoa ma le fesoasoani a Mose) e ala i le faia o se togisala mo le nuu o Isaraelu ona na manaʻomia ona faamamāina a latou agasala, ma faamagalo lo latou lē usiusitaʻi lea na latou faia ai se tamaʻi povi auro, ma lē fiafia ai le finagalo o Ieova. (Le 9:1-7; Eso 32:1-10) I le faaiʻuga o le uluaʻi auaunaga a nei ositaulaga fou, na faailoa mai ai e Ieova lona faamaonia o o latou tofiga e ala i le aumaia o se afi faavavega, lea e lē taumatea na sau mai i le ao faaniutū na i luga o le faleʻie paia, ma faamū ai mea na totoe o le taulaga sa i luga o le fata faitaulaga.—Le 9:23, 24.
(Levitiko 9:23, 24) Mulimuli ane, ua ulufale atu Mose ma Arona i le faleʻie o le feiloaʻiga, ua toe ulufafo mai ma faamanuia i le nuu. Ona faaali atu lea e Ieova o lona mamalu i le nuu atoa, 24 ma sau ai le afi mai i luma o Ieova, ua susunu ai le taulaga mū ma gaʻo i luga o le fata faitaulaga. Ua vāai i ai tagata uma, ona latou alalaga ai lea, ma ua latou faapaʻuʻū faō.
Lesona e Tatou te Aʻoaʻoina Mai i le Tusi o Levitiko
13 Lesona lona fā: O loo faamanuia e Ieova le vaega faalelalolagi o lana faalapotopotoga. Seʻi manatu i le mea na tupu i le 1512 T.L.M., ina ua faatū le faleʻie paia i le auvae mauga o Sinai. (Eso. 40:17) Na taʻimua Mose i se sauniga na tofia ai Arona ma ona atalii o ni ositaulaga. Na faapotopoto faatasi le nuu e molimauina le ofoina atu e ositaulaga o taulaga o manu mo le taimi muamua. (Levi. 9:1-5) Na faapefea ona faaalia e Ieova lona finagalo malie i ositaulaga fou? A o faamanuia atu Arona ma Mose i le nuu, ona sau ai lea o le afi mai iā Ieova ma faamū ai mea na totoe o le taulaga i luga o le fata faitaulaga.—Faitau le Levitiko 9:23, 24.
Saʻiliʻiliga Loloto mo ʻOa Faaleagaga
(Levitiko 8:6) Ona aumaia lea e Mose o Arona ma ona atalii, ua ia faatonuina i latou e tāʻeele i le vai.
Aiseā e Ao ai Ona Tatou Paia?
6 E iai le uiga o le mamā faaletino o ositaulaga i Isaraelu, mo tagata o Ieova i aso nei. E masani ona mātauina e tagata o loo tatou suʻesuʻe, le mamā o o tatou maota mo le tapuaʻiga, faapea le mamā ma le onomea o o tatou laʻei. E lē gata i lea, o le mamā o ositaulaga, e tatou te iloa ai o so o se tasi e alu aʻe i le mauga o le tapuaʻiga a Ieova, e tatau ona ʻmamā lona loto.’ (Faitau le Salamo 24:3, 4; Isa. 2:2, 3.) E tatau ona ofo atu la tatou auaunaga paia i le Atua ma se mafaufau mamā, loto mamā, ma se tino mamā. O lea e manaʻomia ai ona iloilo pea i tatou lava, ma o nisi atonu e manaʻomia ona faia ni suiga tāua ina ia mafai ai ona paia. (2 Kori. 13:5) O se faataʻitaʻiga, e tatau i se tagata papatiso o loo matamata i ata matagā taufeusuaʻiga, ona fesili ifo iā te ia lava, ʻPo o faamaonia atu o aʻu o sē e paia?’ E tatau ona ia saʻili se fesoasoani ina ia taofia ai lenā masaniga leaga.—Iako. 5:14.
(Levitiko 8:14-17) Ona ia taʻitaʻi atu lea o le povi poʻa e fai ai le taulaga o agasala, ua faaee foʻi e Arona ma ona atalii o latou lima i luga o le ulu o le povi poʻa o le taulaga o agasala. 15 Ona fasi lea e Mose o le povi poʻa ma ave le toto, ua lolō i ai lona tamatamaʻilima ma nini ai seu o le fata faitaulaga ina ia soo ma faapaiaina ai le fata faitaulaga mai i le agasala, a o le toto ua totoe, ua ia sasaa i lalo o le fata faitaulaga, ina ia faapaiaina ai ma faia ai le togisala mo le fata faitaulaga. 16 Ona ia ave lea o gaʻo uma ua ufiufi ai gaʻau, o le gaʻo i luga o le ate, ma fatugaʻo e lua ma gaʻo o ia mea, ma ua susunuina ai e Mose i luga o le fata faitaulaga. 17 Ua susunu le povi poʻa, o lona paʻu, o lona aano ma ona otaota i tua o le togālauapi, e pei ona poloaʻi mai ai Ieova iā Mose.
it-2 437 ¶3
Mose
Na tofia e le Atua Mose e avea ma puluvaga o le feagaiga o le Tulafono ma Isaraelu, o se tulaga sili ona māfana ma le Atua e leʻi iai muamua i se tagata, seʻi vaganā Iesu Keriso, o le Puluvaga o le feagaiga fou. Na sausauina e Mose le tusi o le feagaiga i le toto o manu na osi ai taulaga, e faamaonia ai le feagaiga i le va o Ieova ma le nuu (e lē taumatea o toeaiina na fai ma sui o le nuu). Na ia faitau atu le tusi o le feagaiga i tagata, ona latou tali mai lea, “O mea uma ua fetalai mai ai Ieova, e matou te malilie e fai ma usiusitaʻi i ai.” (Eso 24:3-8; Epe 9:19) I le avea ai o Mose ma puluvaga, na ia maua ai le faaeaga o le vaaia o le fausiaina o le faleʻie paia ma mea na faaaogā ai, lea na tuuina atu e le Atua iā te ia le auala e fai ai. Na ia tofiaina foʻi ositaulaga, ma faauuina le faleʻie paia ma Arona le ositaulaga sili i se uu faapitoa. Na ia vaaia foʻi le faataunuuina muamua o matafaioi o ositaulaga fou.—Eso mata. 25-29; Le mata. 8, 9.
Faitau Tusi Paia
(Levitiko 8:31–9:7) Ona fai atu lea o Mose iā Arona ma ona atalii: “Ia saka le aano o le manu i luma o le faitotoʻa o le faleʻie o le feiloaʻiga, ma o i inā foʻi tou te aai ai i le aano o le manu, atoa ma le falaoa ua i totonu o le ato o le tofiga, e pei ona ou poloaʻi atu e faapea, ʻE ʻai e Arona ma ona atalii.’ 32 A o mea ua totoe o le aano o le manu ma falaoa, e tou te susunuina i le afi. 33 Aua neʻi outou ulufafo i le faitotoʻa o le faleʻie o le feiloaʻiga mo aso e fitu, seʻia oo i le aso e faataunuu ai lo outou tofiga, auā e manaʻomia aso e fitu e tuuina atu ai le pule iā te outou. 34 E pei ona faia i le asō, ua poloaʻi mai Ieova e fai ina ia faia ai le togisala mo outou. 35 Ia outou nonofo i le faitotoʻa o le faleʻie o le feiloaʻiga i le ao ma le pō i aso e fitu, ma e tatau ona outou faia le leoleoga ua tuuina mai e Ieova, neʻi outou oti; auā ua faapea lava ona poloaʻi mai ai iā te aʻu.” 36 Ua faia e Arona ma ona atalii o mea uma ua poloaʻi mai ai Ieova e ala iā Mose.
9 Ua oo i le aso lona valu, ona aami lea e Mose o Arona ma ona atalii, atoa ma toeaina o Isaraelu. 2 Ua ia faapea atu iā Arona: “Ia e ave se tamaʻi povi mo le taulaga o agasala mo oe, ma se mamoe poʻa mo le taulaga mū, o manu ia e matuā lelei lava, ia aumaia ai i luma o Ieova. 3 Ae ia e fai atu i atalii o Isaraelu e faapea, ʻIa ave se ʻoti poʻa mo le taulaga o agasala, atoa ma se tamaʻi povi ma se tamaʻi mamoe poʻa, e tasi le tausaga le matutua, e matuā lelei lava, e fai ai le taulaga mū, 4 o se povi poʻa ma se mamoe poʻa mo taulaga faifaatasi, ina ia fai ai taulaga i luma o Ieova, o le taulaga i meaʻai ua iai sina suāuu, auā o le asō e faaali mai ai Ieova iā te outou.’” 5 Ona latou aumaia lea o ia mea e pei ona poloaʻi atu ai Mose i luma o le faleʻie o le feiloaʻiga. Ona faalatalata ane lea o le faapotopotoga atoa ma tutū i luma o Ieova. 6 Ua toe faapea atu Mose: “O le mea lenei na poloaʻi mai ai Ieova e tou te faia, ina ia faaali mai e Ieova lona mamalu iā te outou.” 7 Ona fai atu lea o Mose iā Arona: “Ia e faalatalata atu i le fata faitaulaga ma faia lau taulaga o agasala, ma lau taulaga mū, ma faia le togisala mo oe ma lou aiga atoa; ia e faia foʻi le taulaga mo le nuu ma faia le togisala mo i latou e pei ona poloaʻi mai ai Ieova.”