2 | ʻFaamāfanafanaga Mai i le Tusi Paia’

LE MANATU O LE TUSI PAIA: “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.”—ROMA 15:4.

O le ā Lona Uiga?

E maua i le Tusi Paia faamāfanafanaga, ia e tatou te maua ai le malosi manaʻomia e tumau ai pe a feagai ma ni mafaufauga lē lelei. Ua faailoa mai foʻi e le Tusi Paia iā i tatou le faamoemoe, ua lē o toe umi ona lē toe iai lea o ni faalogona mafatia.

O Auala e Fesoasoani Mai Ai

O i tatou uma e iai lava taimi e feagai ai ma faalogona lē fiafia, ae o i latou e aafia i le lotomafatia ma le matuā popole, atonu e latou te tauivi ma faalogona tigā i taimi uma. E faapefea ona fesoasoani mai le Tusi Paia?

O loo maua i le Tusi Paia ni mea lelei e mafaufau i ai, ia e mafai ona suia ai ni mafaufauga lē lelei o loo iā i tatou. (Filipi 4:8) E mafai moni ona faatumulia ai o tatou mafaufau i ni manatu faalaeiau ma e faatoʻafilemu ai i tatou, ia e fesoasoani e pulea ai o tatou faalogona.—Salamo 94:18, 19.
E mafai ona fesoasoani le Tusi Paia e tatou te ʻalofia ai le manatu e faapea, e leai so tatou tāua.—Luka 12:6, 7.
E tele mau i le Tusi Paia o loo faamautinoa mai ai, e lē tuua na o i tatou, ma e malamalama atoatoa lo tatou Atua o Lē na foafoaina i tatou i o tatou faalogona.—Salamo 34:18; 1 Ioane 3:19, 20.
Ua folafola mai i le Tusi Paia, o le a aveesea e le Atua faalogona tigā mai o tatou loto. (Isaia 65:17; Faaaliga 21:4) O lenei folafolaga, e mafai ona tatou maua ai le malosi e tumau ai pe a tauivi ma mafaufauga ma faalogona lē lelei.

Auala o Loo Fesoasoani ai le Tusi Paia iā Jessica

Aafiaga o le Lotomafatia iā te Aʻu

“Ina ua 25 oʻu tausaga, na suia ai le tulaga o mea ma na ou aafia ai i le matuā lotomafatia. Na ou tauivi ma faalogona tigā, ona o le lē mafai ona pulea o mea ou te mafaufau i ai, ma le faafuaseʻi ona toe manatua o ni mea lē lelei na tutupu iā te aʻu. Na fesoasoani mai fomaʻi ina ia ou malamalama, e māfua ona ou lotomafatia ona o le auala ou te mafaufau ai i ni mea lē lelei na tutupu. E lē gata i togafitiga talafeagai na ou maua, ae na ou manaʻomia foʻi se fomaʻi e fesoasoani mai ina ia ou iloa ma faasaʻo le auala ou te mafaufau ai.”

Auala o Loo Fesoasoani Mai ai le Tusi Paia

“I taimi na ou matuā lotomafatia ai, na ou aafia ai i le matuā popole ma le faigatā ona ou moe. O le tele o pō e lofitūina ai aʻu i le tele o mafaufauga e lē mafai ona ou puleaina. E pei ona taʻua i le Salamo 94:19, e mafai e le Atua ona faamāfanafana ma faatoʻafilemu aʻu pe a lofitūina i popolega. O lea, ou te tuuina laʻu Tusi Paia ma laʻu api o loo tusia ai ni mau faalaeiau i oʻu tafatafa pe a ou moe. Pe a lē mafai ona ou moe, ou te faitauina ni mau mai i le Tusi Paia, ma faataga manatu o le Atua e faamāfanafanaina ai aʻu.

“Ua faalaeiauina i tatou e le Tusi Paia ina ia ʻalofia manatu e feteenaʻi ma mea ua tatou iloa e faatatau i le Atua. I le taimi muamua, na ou manatu o aʻu o se tagata e lē tāua, e lē alofagia ma e leai se aogā. Ae na ou aʻoaʻoina, o lenā manatu e feteenaʻi ma le manatu o le Tusi Paia, lea e faamatala ai le Atua o se Tamā e alofa ma alofa mutimutivale, ma e manatu mamafa mai iā i tatou taʻitoʻatasi. Na faasolosolo loa ona ou pulea le auala ou te mafaufau ai, nai lo le pulea o aʻu e oʻu mafaufauga. Ua ou iloa nei le auala ou te vaai ai iā te aʻu, e pei ona silasila mai ai le Atua. O se laasaga tāua tele lenei, ua mafai ai ona ou ʻalofia manatu sesē e faatatau iā te aʻu lava.

“Ou te tulimataʻia le taimi o le a lē toe manatua ai mea lē lelei uma na tutupu, ma mou atu ai mafaufauga lē lelei. Ua ou iloa, o le a lē toe iai ni faafitauli o le mafaufau i le lumanaʻi. E fesoasoani lenā manatu ou te tumau ai i le taimi lenei, ma taulaʻi atu i le lumanaʻi lea o le a lē toe iai se lotomafatia.”