3 | Lesona e Aʻoaʻoina Mai i Faaaʻoaʻoga i le Tusi Paia

O LOO FAAMATALA I LE TUSI PAIA . . . Tane ma fafine faamaoni na feagai ma “faalogona e pei o i tatou.”—IAKOPO 5:17.

O le ā Lona Uiga?

O loo taʻua i le Tusi Paia le tele o tala o soifuaga o tane ma fafine na feagai ma faalogona eseese. Pe a tatou faitau i tala o mea na tutupu iā i latou, e tatou te ono tau ai i ni tagata o le Tusi Paia e tutusa o tatou tulaga.

O Auala e Fesoasoani Mai Ai

E tatou te mananaʻo ia malamalama isi i o tatou faalogona, aemaise lava pe afai o loo tatou tauivi ma faafitauli o le mafaufau. Pe a faitau la i faaaʻoaʻoga o loo i le Tusi Paia, o le a tatou aʻoaʻoina ai e faatatau i nisi e tutusa lelei o tatou faalogona, ma le auala e mafaufau ai. O le iʻuga, o le a tatou iloa ai e lē na o i tatou e iai faalogona mafatia, ma tuuitiitia ai lagona tuua toʻatasi pe a feagai ma le popole ma faalogona lē lelei.

O loo faamauina i le Tusi Paia le tele o faamatalaga a i latou na aafia i le lotovaivai ma lagona o le leai o se faamoemoe. Pe na iai se taimi na e manatu ai, ʻE leai se aogā ou te ola ai’? E faapena lagona na oo iā Mose, Elia ma Tavita.—Numera 11:14; 1 Tupu 19:4; Salamo 55:4.
O loo taʻua i le Tusi Paia se fafine e igoa iā Hana, o lē na ʻmatuā tigā lona loto’ ona o le lē mafai ona fanau, ma na matuā faifai atu iā te ia le isi avā a lana tane.—1 Samuelu 1:6, 10.
O loo taʻua foʻi i le Tusi Paia se tane e igoa iā Iopu, lea atonu e tutusa o tatou tulaga. E ui o ia o se tane e malosi lona faatuatua iā Ieova, ae na oo iā te ia faalogona o le lotovaivai ma faapea mai: “Ua ou ʻinoʻino i loʻu ola; ou te lē fia ola pea.”—Iopu 7:16.

O lo tatou iloaina o le auala na manumalo ai nei tagata o le Tusi Paia mai i faalogona lē lelei, o le a fesoasoani e maua ai le malosi manaʻomia e feagai ai ma le lotovaivai.

Auala o Loo Fesoasoani ai le Tusi Paia iā Kevin

Aafiaga o le Bipolar iā te Aʻu

“Na ou aafia i le maʻi o le bipolar ina ua lata ina 50 oʻu tausaga. E iai taimi ou te lagona ai e mafai ona ou taulimaina so o se mea e tulaʻi mai i le olaga. Ae o nisi taimi, ou te manatu e leai se aogā ou te ola ai.”

Auala o Loo Fesoasoani Mai ai le Tusi Paia

“O se tasi i le Tusi Paia e taitutusa o ma tulaga, o le aposetolo o Peteru. Na ia faia ni mea sesē ma manatu ai ua leai sona aogā. Nai lo le faaauau ona mafaufau faapena, na saʻili e Peteru le fesoasoani mai i ana uō e alolofa iā te ia. O taimi e matuā leaga ai lava le tulaga o loʻu maʻi, e lofitūina ai aʻu i faalogona lē lelei, ma ou manatu ai e leai soʻu aogā. I le pei o Peteru, na ou aʻoaʻoina e tatau ona ou vavalalata atu pea i aʻu uō, o ē e fesoasoani mai ina ia aua neʻi oʻu faavaivai.

“O se tasi o tagata o le Tusi Paia e avea ma faamāfanafanaga tele iā te aʻu, o le tupu o Tavita. Na masani ona ia lagona le lotovaivai ona o lona tulaga ma lagona nofosala ona o ana mea sesē sa fai. E taitutusa o ma tulaga ma Tavita, ona e iai taimi ou te faia ai se mea po o se tala ou te toe salamō mulimuli ane ai. E faamāfanafanaina aʻu i upu a Tavita o loo i le Salamo 51. Na faapea mai Tavita i le fuaiupu e 3: ʻUa ou iloa lelei aʻu solitulafono, ma ua iai pea i oʻu luma laʻu agasala.’ E faapena oʻu faalogona pe a lofitūina aʻu i le lotomafatia, ma e faigatā ona iai ni oʻu manatu lelei e faatatau iā te aʻu lava. E aogā foʻi iā te aʻu upu a Tavita i le fuaiupu e 10: ʻLe Atua e, ia e faia se lotomamā mo aʻu, ma ia e tuu foʻi i totonu iā te aʻu se agaga fou, o se agaga e tumau.’ E faapena le auala ou te talosaga atu ai i le Atua e fesoasoani mai ina ia sui le auala ou te vaai ai iā te aʻu lava. E faamāfanafanaina foʻi aʻu i le fuaiupu e 17 lea e faapea mai: ʻLe Atua e, e te lē teena le loto e momomo ma nutimomoia.’ Ua faamautinoa mai i lenei fuaiupu e alofa le Atua iā te aʻu.

“O le taulaʻi atu i faaaʻoaʻoga o loo i le Tusi Paia ma mea ua faia e le Atua mo aʻu, ua mafai ai ona faamalosia loʻu faamoemoe mo le lumanaʻi. Ua moni iā te aʻu folafolaga o loo i le Tusi Paia, ma ua fesoasoani ou te tumau ai.”